Ⅵ
Ⅰ Ateeteyo naañahan Móyiis: “Fiye aafacuk eeha inci inkaakaay ha íhinu amansa ya. Panape epeesam efipuwun naakatanii kapikaay, panape epeesam lompo efipuwun naayaanii ti mah ma miteyoo.”
Ⅱ Pútuun pa nene pusok Móyiis: “Inci yem Ateeteyo. Ⅲ Inci yísanooliye ti Abraham, ti Isaak, niŋ ti Jakob nii inci yem 'Pútuun pa piti sempe sa púlooŋ'. Pale sokutii caacawam 'Ateeteyo'.*6:3 Ti kaŋ ya eti Hiburu, caacaw “Ateeteyo” ciyem “Yahweh” cinakoolaa-nakool nii “Inci Yem”. Caacaw ence Pútuun pa mpíyisane Móyiis pati cífita ca ceeyeniye ca pusowo. Efúlii 3:14-15 Ⅳ Ti caanak ca citeyii, nkayeno ekaawoola ti mah ma miti Kanaan, illiil neyii písiyool nii inci fawufanii mah emmuu. Ⅴ Inci síyaasi fiye hiliku ha hiti pakati Israyel, payenka pakati Esipt nkacoke ka pimiikan, ínnawuno písiyool pa putoom niŋ poko. Ⅵ Ekina ewune aafakaay sok pakati Israyel: 'Inci yem Ateeteyo, inci fáfulan aluu ti himiikanate ha ti pakati Esipt iyyihan aluu ti pitiyo pa empa nkatiyane pa aluu. Inci fáseepin epeesam insiiŋanii ti pisiya penfakat, infakan aluu. Ⅶ Inci fáhin nipiyeno pakanam, inci iyyeno Pútuun pa pitaaluu. Tempo éfinimeyi nii inci yem Ateeteyo Pútuun pa pitaaluu, péefulanii pa aluu ti himiikanate ha ti pakati Esipt. Ⅷ Inci facoop aluu ti mah emma inci insintooliye ma kawufan Abraham, Isaak niŋ Jakob, inci fawufan mo aluu kati míyenoonii miti aluu. Inci yem Ateeteyo.'” Ⅸ Móyiis naakaasok eehuu pakati Israyel, pale kapaaliitoo kaatuko káwusenaawusen ti himiikanate ha heeseeñe ha.
Ⅹ Ateeteyo nene asok Móyiis: Ⅺ “Kaay caasok amansa ya ati Esipt akatan pakati Israyel kápuful ti mah ma miteyoo.” Ⅻ Pale Móyiis naañahan Ateeteyo: “Sincan, niŋ pakati Israyel kásiitanutam, puume amansa ya áfaasiitanam, inci eeyinaat a káakup?” ⅩⅢ Fiye Ateeteyo naasok Móyiis niŋ Aaron: “Nikaay pati pakati Israyel niŋ amansa ya ati Esipt innisokii nii inci sokoo áfulan pakati Israyel ti mah ma miti Esipt.”
Móyiis niŋ Aaron símaamayii
ⅩⅣ Payenke kayem símaama sa siti miin ma miti Israyel:
Epuuk pákayiin paka pakati Ruben, añii ya ácook a ati Israyel, kayem: Hanok, Pallu, Hesilon niŋ Kalimi. Ucaw ewwuu úyenoonii kifiinu ka kiti miin ma miti Ruben.
ⅩⅤ Epuuk pákayiin paka pakati Simeyon kayem: Yemuyel, Yamin, Ohat, Yakin, Sohal niŋ Sawul. Sawul íññaa ateyoo ati Kanaan. Ucaw ewwuu úyenoonii kifiinu ka kiti miin ma miti Simeyon.
ⅩⅥ Ehe ucaw epuuk pákayiin paka pakati Lewi, nuukiicee samat nii fa nkapukee fa: Keeson, Kehat niŋ Melali. Lewi naaloŋ sitiil keme niŋ áwii niŋ kaat niŋ súsupak (137).
ⅩⅦ Epuuk pákayiin paka pakati Keeson kayem: Lipeni niŋ Simeyi. Ucaw ewwuu úyenoonii kifiinu.
ⅩⅧ Epuuk pákayiin paka pakati Kehat kayem: Amulam, Yisuhal, Hepolon niŋ Usiyel. Kehat naaloŋ sitiil keme niŋ áwii niŋ ŋaasuwan niŋ síhaaciil (133).
ⅩⅨ Epuuk pákayiin paka pakati Melali kayem: Mahuli niŋ Musi.
Ucaw ewwuu púlooŋ úyenoonii kifiinu ka kiti miin ma miti Lewi, nuukiicee samat nii fa nkapukee fa.
ⅩⅩ Amulam naasa asomfaafoo Yokepet, naapukoo pikampaani pákasupak: Aaron niŋ Móyiis. Amulam naaloŋ sitiil keme niŋ áwii niŋ kaat niŋ súsupak (137).
ⅩⅪ Epuuk pákayiin paka pakati Yisuhal kayem: Kolah, Nefek niŋ Sikili.
ⅩⅫ Epuuk pákayiin paka pakati Usiyel kayem: Misayel, Elisafan niŋ Sitili.
ⅩⅩⅢ Aaron naasa Elisepa ámaacul a ati Aminatap niŋ Naason ahoopoo. Naapukoo epuuk pákayiin pakapaakiil, poko kayem: Natap, Apihu, Eleyasal niŋ Itamal.
ⅩⅩⅣ Epuuk pákayiin paka pakati Kolah kayem: Asil, Elekana niŋ Apiyasaf. Ucaw ewwuu úyenoonii kifiinu ka kiti miin ma miti Kolah.
ⅩⅩⅤ Eleyasal, akampaani ya ati Aaron naasa akee ti púmaacul pa pakati Putiyel. Naapukoo akampaani, caacawoo Pinehas.
Payenkuu púlooŋ kayem símaama sa siti miin ma miti Lewi, an óo an niŋ miin ma miteyoo.
ⅩⅩⅥ Oom Aaron niŋ Móyiis kayem payenka Ateeteyo naasoke ka: “Nífulanii pakati Israyel ti mah ma miti Esipt samat nii uyoŋ uti pusoocaali.” ⅩⅩⅦ Móyiis niŋ Aaron payenkuu kakaaye kapusok amansa ya ati Esipt kati akatan pakati Israyel kápuful ti mah ma miti Esipt.
Aaron, ákupa ya ati Móyiis hátikin amansa ya
ⅩⅩⅧ Ehe heetaakiye ha ti hinoom eeha Ateeteyo náakupe ha niŋ Móyiis ti mah ma miti Esipt, ⅩⅩⅨ apusokoo: “Inci yem Ateeteyo, caasok amansa ya ati Esipt eeha púlooŋ inci insokuu ha niŋ eeha púlooŋ inci inkaakaayuu ha hisoku hátikin.” ⅩⅩⅩ Móyiis naañahanoo: “Sincan, inci yinaat káakup, puume amansa ya áfaasiitanam?”
*Ⅵ:Ⅲ 6:3 Ti kaŋ ya eti Hiburu, caacaw “Ateeteyo” ciyem “Yahweh” cinakoolaa-nakool nii “Inci Yem”. Caacaw ence Pútuun pa mpíyisane Móyiis pati cífita ca ceeyeniye ca pusowo. Efúlii 3:14-15