ⅩⅤ
Hícimu ha hiti Móyiis
Ⅰ Fiye Móyiis niŋ pakati Israyel nkacook Ateeteyo hícimu eehe:
“Inci facook Ateeteyo kamma naaheeke pikamooloo pántoon,
náaseeman pufalinc pa niŋ piteteyana etempo ti kaatii ka.
Ⅱ Ateeteyo ayem sempe sa sitoom niŋ hícimu ha hitoom,
ákeyyookey kafakanam.
Akina ayem Pútuun pa putoom, inci fámuloo,
akina ayem Pútuun pa piti paapaa atoom, inci fámakiyanoo.
Ⅲ Ateeteyo ayem akama ya enfakat a,
caacawoo ciyem Ateeteyo.
Ⅳ Aséemanaa-séeman ti kaatii ka
pisaleet pa piti amansa ya niŋ pusoocaali pa pakateyoo.
Pusoocaali pa keehaŋe ka nkáhinee cíki ti mah ma miti Esipt,
nkáseemanee ti Kaatii ka Kéecunke ka.*15:4 Niŋ ekina tom: “Kaatii ka kiti umpiip wa”.
Ⅴ Kúsuh ka nkimelii,
nkáseem samat nii énankiin.
Ⅵ Ateeteyo, epeesi yáali ehaŋe waah óo waah sempe;
Ateeteyo, epeesi yáali etuncaloole pikamooli.
Ⅶ Ti hamake ha hitii henfakat ha
anheeke keenatuu ka.
Awwánanii káñiken ka kitii samat nii seemak,
nkusowii nii hikaaw.
Ⅷ Emma ánfuuteene ma,
man ma úmmucumpoolo,
ummucoonool ciit samat nii hiniŋ;
man ma méesuna ma ummucokool mipiyank
ti pututa kaatii ka.
Ⅸ Akamool unaa asok hínum:
'Inci fawawantanii incokii
ímpaacinool hisaanumate ha hiteyii,
inconcenool ho fo fomam.
Iññákii káakuntu ka kutoom,
epeesam néepucaloolii.'
Ⅹ Pale awe Ateeteyo, ínfuuteen kaatii ka nkimelii,
nkáseem samat nii énankiin ti hítaapanu man ma.
Ⅺ Fo eyyeyme énaati ecuke nii awe Ateeteyo?
Ekee tempo eyinaatee kaakufumool naawe,
kaatuko awe, ati sempe senfakat, inhaŋ po púlooŋ.
Inféyanani, íntuuno hímuluyee,
ínhin weecukantee.
Ⅻ Impántin epeesi yáali,
etaam ya neemelanii.
ⅩⅢ Ti pálafi pa pitii peepayantoo pa
ántintiŋane pakani payenka anfakane ka,
ti sempe sa sitii ántintiŋanii
la ankine la, la sampanee la.
ⅩⅣ Pakan paka kásiyaasi, nkakikilan,
ewatate neecok pakati Filistin.
ⅩⅤ Fiye ñíhampaatiin ña pakati Etom nkaliim,
piñaap pa pakati Mowap nkayeno ti ewatate enfakat,
pakati Kanaan púlooŋ nkakikilan.
ⅩⅥ Ewatate enfakat néenowii teyii;
Ateeteyo, ti sempe sa siti epeesi kayinaat hiwenu,
nkacuk nii pínankiin,
taamanta pakani kamuusut,
pakani payenka annoome ka.
ⅩⅦ Ateeteyo, aafacoopii iyyenanii
ti tíntiŋ ya etii,
la ammemanoole la aakati kin,
la sampanee la,
la ansiiŋane la.
ⅩⅧ Ateeteyo, awe amansa fo eket maama!”
ⅩⅨ Ta pufalinc pa, pisaleet pa niŋ piteteyana pufalinc pa pakati amansa ya nkanakiye ta ti kaatii ka, Ateeteyo náañahanii man ma teyii. Pale pakati Israyel nkafiitan ti etaam eesuuce.
Miriyam caacook ca citeyoo
ⅩⅩ Ayaamakoola ya Miriyam, Aaron ahoopoo, náacoopii pankalaŋ pa piteyoo. Pakaal Israyel púlooŋ nkácoopalii ñankalaŋ nkanapanoo nkayeno ekii. ⅩⅪ Miriyam nene acook hícimu ha:
“Nicook Ateeteyo kamma naaheeke pikamooloo pántoon,
náaseeman pufalinc pa niŋ piteteyana etempo ti kaatii ka.”
Man ma miti Mala meecoonut ma pálaani
ⅩⅫ Móyiis naacoop pakati Israyel nkáful ti Kaatii ka Kéecunke ka nkahiiŋ ti káahaaŋ ka tes kiti Sul. Nkasapal kunoom kíhaaciil kacukut man. ⅩⅩⅢ Nkacol la nkasok la Mala nkacuk man, pale kayinaat mo pálaani kamma pasampe, ekina ewune nkasok toko Mala (ekina eyem “pasampe”). ⅩⅩⅣ Pakan paka nkayeno káakumutool ti Móyiis nkasokoo: “Weyme nuukaakaay pálaani?” ⅩⅩⅤ Móyiis naakooŋ ti Ateeteyo kayankanan. Ateeteyo náayisanoo hikasap, hikina naacoope naawant ho ti man ma, ímmineeniyii ummucoon pálaani.
Toko Ateeteyo naawufanii kilim keesiiŋanee naasokii eeha nkañaŋe ha íhinu. Toko lompo naawinkiyii ⅩⅩⅥ naasokii: “Niŋ nísiitanaam pinap, inci Ateeteyo Pútuun pa pitaaluu, ínnihin heecoonoole ti ñíkinam, niŋ nísiitanaa eeha inci insoke ha ínnituul kilim ka kutoom keesiiŋanee ka púlooŋ, ínnihinaa eehuu, úkuuñu wa púlooŋ ewwa inci úwwananii wa ti pakati Esipt, étiwananii wo taaluu, kaatuko inci yem Ateeteyo ákuuñana ya ataaluu.”
ⅩⅩⅦ Púful toko nkacol Elim, toko intaak úpun ŋaasuwan núusupak niŋ úyita áwii éhaaciil niŋ ŋaasuwan (70), nkasiiŋan toko púkuut pa piteyii.