Púcook pa
Waah wa weeyem wa ti púkoo eyye
Púkoo eyye eyem éyaañ ya ti hilim ha hiti Pútuun pa nesokee lompo Púcook pa. Heekiicee ha lupo hiyem fa púlunta pa mpiliilee fa, fa an naaliilee fa, niŋ píyaañ kaamuuyen niŋ kúnuul ti púlunta pa. Néeyisan lompo fa Pútuun pa mpikaakaay kaacoopool pakan paka.
Púkoo eyye néepaacinoolee ti kifiit kúsupak kenfakat.
Hifiit ha híyaañ ha hiyem efantu 1 – 11. Ti hifiit eehe aafacuk fa Pútuun pa mpiliile fa púlunta pa, an fa naaliilee fa niŋ fa lompo an naamuuyene fa ti Pútuun pa. Toko aafacuk hiti Ataam niŋ Eef, Kayin niŋ Abel, niŋ fa Pútuun pa mpuhootane fa púlunta pa kamma kaamuuyen. Aafacuk lompo kiti ekumpaan ya eehaane ya eti Babel.
Hifiit ha hísupiyenu ha hiyem efantu 12 – 50. Le aafacuk hiti símaama pakati Israyel. Maamaa ateyii áyaañ ayem Abraham, náameyiyee ti kaapii kiti káyinan niŋ hítuulu Pútuun. Aafacuk lompo hiti Abraham añiinoo Isaak niŋ eesokoo maamaa Jakob. Jakob, aŋa nkasok ya lompo Israyel, naataak epuuk pákayiin kayema ŋaasuwan niŋ pákasupak. Epuuk ya payenkuu káyenoonii písii pa ŋaasuwan niŋ pákasupak pa piti Israyel.
Ti epuuk ya ŋaasuwan niŋ pákasupak paka payenkuu intaak oonool teyii aŋa nkasok Josef, paapaa ateyii akina naahaŋe pálafi ti epuukoo púlooŋ. Ñúnuwoo nkataak paheeka teyoo nihiwun nkanoomanoo punoomana kati ayeno amiikan, nkasok paapaa ateyii nii élukuleen etaatulooloo. Ti páhinal Pútuun, náayenoonii an enfakat ti mah ma miti Esipt. Po hátikin, épankul neeyeno ti púlunta pa, naafakan teyyo paapaa ateyoo niŋ miin ma miteyoo púlooŋ.
Fa púkoo ya neekiicee fa:
1–11 Hifiit híyaañ
1–2 Hiliiluyee ha hiti Púlunta pa niŋ An
3 Píyaañ kaamuuyen niŋ ñíyoka
4–5 Hiti Ataam fo ti hiti Nowe
6–10 Nowe niŋ kaahootan ka
11:1-9 Ekumpaan ya eehaane ya eti Babel
11:10-32 Hiti Sem fo ti Abram
12–50 Hifiit hísupiyenu
12–35 Hiti miin ma miti Abraham, Isaak niŋ Jakob
36 Miin ma miti Esawu
37–45 Hiti Josef niŋ ñúnuwoo niŋ atuwoo
46–50 Pakati Israyel ti mah ma miti Esipt
Ⅰ
Hiliiluyee ha hiti púlunta pa niŋ waah óo waah weeyem lupo
Ⅰ Ti púcook pa, Pútuun pa mpiliil patiila niŋ t’etaam. Ⅱ Fiye, etaam ya etaakut himuum etaakut likee pale man meeliiñoole ummuhootan etaam ya púlooŋ. Enímaan néewufalool pásune man ma. Kunuu ka kiti Pútuun pa nkiyeno káleeleehan patiila etemmo.
Ⅲ Púful toko, Pútuun pa mpusok: “Ecaaŋ etaako!” Ecaaŋ ya neetaako. Ⅳ Pútuun pa mpucuk nii ecaaŋ ya enapaanap. Fiye, mpíkatinool ecaaŋ ya niŋ énimaan ya. Ⅴ Pútuun pa mpulu ecaaŋ ya “hanakan”, mpulu lompo énimaan ya “hánant”. Intaako kániim intaako lompo pucom: hikina hiyem hinoom ha híyaañ ha.
Ⅵ Púful toko, Pútuun pa mpusok: “Káahaaŋ kitaako ti pututa man ma kípikatinool man ma miti patiila niŋ miti t’etaam!” Ⅶ Fiye, Pútuun pa mpíhin káahaaŋ ka, mpíkatinool man ma miti patiila niŋ miti t’etaam, iyyeno fo. Ⅷ Pútuun pa mpulu káahaaŋ ka “patiila”. Intaako kániim intaako lompo pucom: hikina hiyem hinoom ha hísupiyenu ha.
Ⅸ Púful toko, Pútuun pa mpusok: “Man ma meeyem ma t’etaam muconcool nantoonool, etaam eesuuce éfulii!” Iyyeno fo. Ⅹ Pútuun pa mpulu etaam ya eesuuce ya “etaam”, mpulu lompo man ma meeconcooliye ma “kaatii”. Pútuun pa mpucuk nii napaanap.
Ⅺ Fiye, Pútuun pa mpusok: “Etaam ya epukool píheeni óo píheeni empa mpitaak etukal, niŋ enuun óo enuun eyya netaak ñaliyal niŋ pukoon!” Iyyeno fo. Ⅻ Etaam ya néepukii píheeni óo píheeni empa mpitaak etukal etempo, niŋ enuun óo enuun eyya netaak paliyal eteyyo niŋ pukoon eteyyo. Pútuun pa mpucuk nii napaanap. ⅩⅢ Intaako kániim intaako lompo pucom: hikina hiyem hinoom ha híhaaciyenu ha.
ⅩⅣ Púful toko, Pútuun pa mpusok: “Waah úsupak ewwa nuucaaŋan utaako patiila kati úkatinool hánant ha niŋ hanakan ha! Waah ewwuu úyisan ñahaaño ña, kunoom ka niŋ sitiil sa, ⅩⅤ uyeno patiila upucaaŋan t’etaam!” Iyyeno fo. ⅩⅥ Pútuun pa mpíhin waah úsupak wenfakat ewwa nuucaaŋan: weehaŋe wa pafom nuumankool hanakan ha; weehaŋe wa káafomaati nuumankool hánant ha; mpíhin lompo picaaŋaŋ pa. ⅩⅦ Pútuun pa mpisiiŋan wo patiila upucaaŋan t’etaam, ⅩⅧ kati umankool hanakan ha niŋ hánant ha núukatinool ecaaŋ ya niŋ énimaan ya. Pútuun pa mpucuk nii napaanap. ⅩⅨ Intaako kániim intaako lompo pucom: hikina hiyem hinoom ha hípaakiilenu ha.
ⅩⅩ Púful toko, Pútuun pa mpusok: “Kaatii ka kimeeŋ niŋ soon niŋ pikee púlukuleen, pusuwa píyititool patiila niŋ t’etaam!” ⅩⅪ Fiye, Pútuun pa mpiliil púlukuleen penfakat piti kaatii, niŋ lompo élukuleen óo élukuleen eyya newac niŋ esuwa óo esuwa. Pútuun pa mpucuk nii napaanap. ⅩⅫ Pútuun pa mpisampan po mpusok: “Nipukool nimeeŋan kaatii ka, pusuwa pa lompo pimeeŋ t’etaam!” ⅩⅩⅢ Intaako kániim intaako lompo pucom: hikina hiyem hinoom ha hísakiyenu ha.
ⅩⅩⅣ Púful toko, Pútuun pa mpusok: “Etaam ya etaak élukuleen óo élukuleen: puwuluwul niŋ piti elampa, penkilis niŋ penfakat!” Iyyeno fo. ⅩⅩⅤ Pútuun pa mpíhin élukuleen óo élukuleen ewuluwul niŋ élukuleen óo élukuleen eti elampa, enfakat niŋ enkilis. Mpucuk nii napaanap.
ⅩⅩⅥ Fiye, Pútuun pa mpusok: “Umemanoolaa an éefule unaa, samat nii unaa, apiyeno ati hikaw ha ati soon sa, pusuwa pa niŋ púlukuleen pa púlooŋ: puwuluwul pa niŋ piti elampa ya, penfakat pa niŋ penkilis pa empa mpumuusool pa t’etaam.”
ⅩⅩⅦ Pútuun pa mpiliil an éefule po, áyiin niŋ aal Pútuun pa mpiliile.
ⅩⅩⅧ Pútuun pa mpisampanii mpusokii: “Nipukool, nimeeŋan etaam ya inniheek yo! Niyeno pakati kikaw eteyyo, kiti soon sa, pusuwa pa, niŋ púlukuleen pa púlooŋ empa mpumuusool pa t’etaam!”
ⅩⅩⅨ Fiye, Pútuun pa mpusok: “Nísiitan, inci ufanaa aluu píheeni óo píheeni empa mpitaak pukoon, niŋ enuun óo enuun eyya netaak paliyal ti etaam ya púlooŋ. Pukoon pa niŋ ñaliyal ña efiñiyeno pákuumanal aluu. ⅩⅩⅩ Pale púlukuleen pa púlooŋ piti elampa ya niŋ pusuwa pa púlooŋ niŋ púlukuleen pa púlooŋ empa mpumuusool pa t’etaam, inci ufanaawufan po píheeni pa niŋ pahatal pa púlooŋ piti punuun pa pipiyeno pákuumanal etempo.” Iyyeno fo.
ⅩⅩⅪ Pútuun pa mpucuk nii eeha mpíhine ha púlooŋ hinapaanap meemak. Intaako kániim intaako lompo pucom: hikina hiyem hinoom ha heewase ha isak niŋ hoonool.