Ⅰ Yéesu naasokii: “Inci pusok aluu pánipani ya, an óo an eenaput ti hunkut ha hiti híkinku ha hiti písaacii pa pale naasilo ti híkinku ha, oom an álipa, akanca. Ⅱ Pale eenape ya ti hunkut ha ayem afaasa ya ati písaacii pa. Ⅲ Awásuma híkinku ha áfaapankinoo hunkut ha, písaacii pa mpísi hilimoo; sáacii óo sáacii eteyoo, afaayonkal yo ti caacaw eteyyo mpinapanoo tíkitaaŋ. Ⅳ Niŋ áfulaniyoo písaacii pa piteyoo púlooŋ, naanow po hátikin, pikina mpinapanoo kamma mpikiiwe hilimoo. Ⅴ Etipinapan akaawoola, pale efipiteyoo kamma mpikiiwut hilim ekaawoola ya.” Ⅵ Yéesu naakamanii hícantiitu eehuu, pale kámiit eeha náalafiyii ha hisoku.

Ⅶ Fiye Yéesu nene asok: “Inci pusok aluu pánipani ya, inci yem hunkut ha hiti písaacii pa. Ⅷ Kéekeyii ka púlooŋ le niŋ inci fácolii, pílipa niŋ pikanca. Pale písaacii pa písiitanutii. Ⅸ Inci yem hunkut ha. An óo an eenape ti inci afaafakanee. Afánayini énakoonii niŋ hífulu nataak paliyal. Ⅹ Alípa ya nákeykey káalipu, himuku niŋ káapucalool lamma. Pale inci kéyyookey pakan paka kati kataak eloŋ, nkaloŋ yo pánipani.

Ⅺ “Inci yem afaasa ya eenape ya. Afaasa ya eenape ya nacooncoon kawufan eloŋoo kamma písaacii pa piteyoo. Ⅻ Pikee pa áhampaatiin a ati písaacii pa naacoop an apiyeno afaasa ati písaacii pa piteyoo. Oom an efaas naayaake kamma naakaakaayee cooy; niŋ acukaa eyen elampa ti ékey afaatah toko písaacii pa naatey, kaatuko piteyoo tom. Fiye eyen elampa ya neelaako po neehancalool po. ⅩⅢ Ayíin a ateyaatey kamma naacoopee páhin, cokutoo ti písaacii pa. ⅩⅣ-ⅩⅤ Inci yem afaasa ya eenape ya. Paapaa ya náameyiyam inci lompo ímmeyi Paapaa ya, fo lompo incuke inci méyimeyi písaacii pa putoom, písaacii pa putoom lompo mpímeyiyam. Inci incooncoon kawufan eloŋ ya etoom kamma písaacii pa. ⅩⅥ Inci taakaataak pikee písaacii peeneetaat ti híkinku eehe, empuu lompo ñaŋaa po écoopii, éfipisiitan hilimam. Ancuk koolee yoonool etaakiyaa niŋ afaasa oonool. ⅩⅦ Paapaa ya álafiyaamlafi kamma inci incoon kawufan eloŋ ya etoom kati sa yo nene. ⅩⅧ An ayinaat hicoopu eloŋ ya etoom pale inci uwwufan yo ti pásuumayam. Inci taakaataak kayine kiti kawufan eteyyo niŋ kayine kiti hisayu eteyyo nene, eehe Paapaa atoom naasokaam kati hín.”

ⅩⅨ Kilim enkuu nene kípaacinool Pusuwif pa. ⅩⅩ Hícump teyii nkasok: “Hísaalumant híwuuliyoo! Awuyaawuyo! Weyme ínnisiitanoo?” ⅩⅪ Pale pakakee paka nkasok: “An aŋa hísaalumant níhiwuuliye ákupantoo fiye. Fo hísaalumant éfihiyini káapankin ñíkin éefuume?”

ⅩⅫ Pahaaño pa piti ekumpaan ya enfakat ya eti Pútuun pa*10:22 Máamun sitiil keme niŋ áwii éhaaciil (160) le niŋ Yéesu afaapukee, pikamool Pusuwif pa nkanako ti ekumpaan ya enfakat ya eti Pútuun pa kapilecatan yo. Fiyuu Pusuwif pa nkayinaat kaawaaseen Pútuun pa. Hikee hinoom, akee áyiin aŋa nkasok Yutas Makape naaheek pikamoolii naakuulan ekumpaan ya enfakat ya. Pahaaño pa piti ekumpaan ya enfakat ya, eehuu mpínawunan. eeyem ya Jerusalem mpúcolii, tempo ti caanak citi pamon. ⅩⅩⅢ Yéesu naayeno kaamuumuusool ti ekumpaan ya enfakat ya, la nkasok la címpaŋ ya eti Solomon. ⅩⅩⅣ Fiye, pakati kikaw ka pakati Pusuwif pa nkákiitooloo nkasokoo: “Fo teyme aafakat unii ti énimaan? Iyyema awe yem Eenucee ya ati Pútuun pa caaŋan unii.” ⅩⅩⅤ Yéesu naañahanii: “Sokaasok ho aluu pale níyinanut. Píyisan empa inci ínhin pa ti caacaw Paapaa atoom, pikina píyisane aŋa inci iyyem ya. ⅩⅩⅥ Pale aluu níyinanut, kaatuko nineetaat ti písaacii pa putoom. ⅩⅩⅦ Pinapana pa pakatoom kacukaacuk nii písaacii empa mpísiitan hilimam. Inci méyiyiimeyi nkanapanam. ⅩⅩⅧ Uwwufanii eloŋ ya eepayantoo ya. Inci étipuulii, an lompo átayiniyii hilamu ti epeesam. ⅩⅩⅨ Paapaa atoom eewufanaamii ya ahaŋa an óo an, an ayinaatii hilamu ti epees Paapaa atoom. ⅩⅩⅩ Inci niŋ Paapaa ya an oonool.”

ⅩⅩⅪ Pusuwif pa nene kayesal pukumpa kati kanunkal Yéesu fo aket. ⅩⅩⅫ Pale Yéesu naasokii: “Hícump páhin peenape inci íyyisane aluu púpufulii pati Paapaa ya, empeyme tempo puwune ínnilafiyam kaanunkal pukumpa fo ket?” ⅩⅩⅩⅢ Pusuwif pa nkañahanoo: “Neetaat páhin peenape puwune núulafiyi himuku, pale fa anteñale fa Pútuun pa, awe an kenseŋ insok nii awe Pútuun!” ⅩⅩⅩⅣ Yéesu naasokii: “Fo kiicutee ti hilim ha heesiiŋanee ha hitaaluu nii Pútuun pa pusok: 'Inci sok, aluu ñútuun'?✡10:34 Kícimu 82:6 ⅩⅩⅩⅤ Uméyiyaameyi nii hilim ha hiti Pútuun pa hiyinaatee hípucu. Ooto niŋ piyonkalaa payenka mpúkupe ka neyii 'ñútuun', ⅩⅩⅩⅥ weyme uwune innisok nii inci teñalaateñal Pútuun pa kamma inci insoke nii inci yem Añii ya ati Pútuun pa? Apan inci yem aŋa Paapaa ya naamamale ya náapoñiyam ti púlunta pa. ⅩⅩⅩⅦ Niŋ inci hínut páhin pa piti Paapaa atoom, timpi níyinanam, ⅩⅩⅩⅧ pale niŋ inci hínaa po, háati níyinanutam, níyinan eeha inci ínhin ha kati nímeyi innikiiw nii Paapaa ya oopa ti inci, inci lompo oopa ti Paapaa ya.” ⅩⅩⅩⅨ Fiye, nene kayeno hiŋes hicokuyoo pale naafakii.

ⅩⅬ Púful toko, Yéesu naañoho apifiitan musuu ma miti Jordan la Saŋ náacooke la íhinu pátise, naayeno toko. ⅩⅬⅠ Hícump pakan nkákey teyoo. Nkasokool: “Saŋ, háati áhinut píyisan poonool pale waah ewwa naasoke wa púlooŋ kiti áyiin a aŋe, uti pánipani.” ⅩⅬⅡ Hícump pakan toko, nkáyinan ti Yéesu.