Ⅰ Yéesu naasok pinapana pa pakateyoo: “Fan óo fan incuke, efitaak waah weekaakaay kanakan an ti kaamuuyen, pale kúnuul efikiyeno ti aŋa éfuunapii ya teyoo. Ⅱ Fisaka apicenkee ti ekun énankiin enfakat naawantee ti musuu le niŋ afaanakan akee ti kenkilis ka payenke ti kaamuuyen. Ⅲ Nisiiŋo púsooni!

“Niŋ atii ya amuuyenaa, watanoo, niŋ awatanooliyaa mponketoo. Ⅳ Niŋ amuuyenaa ti awe ñiyema isak niŋ ñésupak ti hinoom ha hoonool ha, náañohoonii ti awe ñiyema isak niŋ ñésupak kaaluum kaaponket, aañaŋoo kaaponket.”

Ⅴ Pupoñapoñ pa nkasok Ateeteyo: “Penan unii káyinan.” Ⅵ Ateeteyo naañahanii: “Niŋ nitaakaa káyinan keefomut nii ekoon sootoo, níyiniyini hisoku enuun eyyuu: 'Lúpinoolo nkaasiiŋanoolo ti musuu,' éfeehin eeha innisoke ha.

Ⅶ “Usokaa akee ti aluu ataake amiikan ayaya niŋ fotom afaasa púlukuleen pa piteyoo. Mpáyetaliyoo ti kaakit, fo aafasokoo: 'Hiliikan kéy yeno aapili'? Ⅷ Haani, aafasokoo: 'Kéy yikam waah ewwa inci fali káciim, naapayaa hiik, immemanoolo uwwufanam pili illaan, niŋ inci payaa, awe conko, illi illaan.' Ⅸ Fo aafasok amiikan a apalaka kamma náahine eeha ansokoo ha áhin? Ⅹ Fo lompo incuke ti aluu, niŋ níhinaa waah ewwa nkasoke wa aluu níhin, nisok: 'Unii pimiikan kenseŋ, páhin pa putoonii lamma núuhine.'”

Ⅺ Yéesu ti pikaayu Jerusalem, naanap ti pututa mah ma miti Samali niŋ Kalilee. Ⅻ Akina ti pinako ti cikee cisaatee, pakan ŋaasuwan keekuulut kamma kanuk nkákey kapipaakoolanoo. Nkasiiŋo kápilaaŋoo ⅩⅢ nkaceekoo niŋ uwiiluyii: “Yéesu, Ahámpaatiin, keti hikaw ti unii!” ⅩⅣ Yéesu apicukii, naasokii: “Nikaay cániyisanoolo pati puwaaseena pa pakati Pútuun pa.” Poko ti pítin pa nkakuulanee.

ⅩⅤ Akee ti poko, ápipanum nii ákuuñaneekuuñan, náañohoonii ti wootoo, naayeno hímulu Pútuun pa niŋ kaawiiluyoo. ⅩⅥ Naanow ti woot Yéesu, puhooŋuyoo t’etaam, naasokoo apalaka. Antuŋ ati Samali. ⅩⅦ Yéesu naacakan: “Fo ŋaasuwan ya púlooŋ tom ekuulanee? Isak ya niŋ pakapaakiil paka peyme nkayem? ⅩⅧ Háati akee ti poko ayinaat éñohoonii ápumul Pútuun pa fo niŋ neetaat ati Samali ya aŋe, eeneetaat a ati Israyel?” ⅩⅨ Naasokoo: “Lito, kaay, káyinan ka kitii kúkuuñanuu.”

ⅩⅩ Hikee hinoom, pakakee Pufalisaay nkacakan Yéesu: “Teyme cáwii ca citi Pútuun pa éficikey?” Yéesu naañahanii: “Cáwii ca citi Pútuun pa éticikey samat nii waah ewwa nuucukee. ⅩⅪ An atasok: 'Nisincan! Ehee co!' niŋ fotom 'Ahaa co!' kaatuko cáwii ca citi Pútuun pa unca ti aluu.”

ⅩⅫ Púful toko Yéesu naasok pinapana pa pakateyoo: “Caanak unca ti ékey, éfinilafi fanfaŋ hicuku hinoom hoonool ti kunoom ka kiti inci, Añii An, pale etinicuk ho. ⅩⅩⅢ Pakan efikasok aluu: 'Nisincan! Eheeyoo le!' niŋ ekina tom: 'Ahaayoo pa!' Pale timpi nikaay, timpi ninapanii. ⅩⅩⅣ Samat nii pamaliñoolal etiil fa mpicaaŋan fa patiila púlooŋ písik ti púcook fo ti pikelan, fo lompo pakan paka nkakaakaay hicuku inci, Añii An, ti hinoom ha eeha fáñohoonii ha. ⅩⅩⅤ Pale fo inci yáañ yeno ti kúnuul kenfakat, mpookee ti ekaay eyye.

ⅩⅩⅥ “Samat nii fa intaakiye fa ti caanak ca citi Nowe,✡17:26 Púcook 6–9 fo lompo nkaakaay pitaako ti kunoom ka kiti inci, Añii An. ⅩⅩⅦ Pakan paka nkayeno hili, pálaani, esa niŋ pinimo fo ti hinoom eeha Nowe náayuukiye ha ti piteen pa penfakat pa. Fiye, etiil ya néenupii man menfakat fo mumukalii púlooŋ cew. ⅩⅩⅧ Fo lompo incuke ti kunoom ka kiti Lot:✡17:28 Púcook 18:16–19:29 Pakan paka nkayeno hili niŋ pálaani, hinoom niŋ kaanooman, pusuk niŋ kulut. ⅩⅩⅨ Pale hinoom eeha Lot náafule ha Sotom, seemak niŋ kíceek ínsifulii patiila, insimukalii púlooŋ cew.

ⅩⅩⅩ “Fo lompo facuk ti hinoom eeha inci, Añii An, nkaakaay ha éyisanoolo. ⅩⅩⅪ Ti oom hinoom aŋa eeyem patiila ti kankalaŋ ekumpaan ya eteyoo naataak waahoo páhantuwa, añaŋut éwanoonii apicoop wo. Fo lompo incuke aŋa eekaaye piya, añaŋut éñohoonii pati ekumpaan ya eteyoo. ⅩⅩⅫ Nínawuno heetaakiye ha Lot aaloo!✡17:32 Púcook 19:26 ⅩⅩⅩⅢ Aŋa éelafiye kafakan eloŋ ya eteyoo, áfaapuul teyyo, aŋa éepuule ti eloŋ ya eteyoo afaafakan yo. ⅩⅩⅩⅣ Inci pusok aluu: Oom hánant pakan pákasupak efikahinto nantoonool, oonool áfaaseepinee akee ya naakatee toko. ⅩⅩⅩⅤ Pakaal pákasupak efikayeno pútuum ti ésiken yoonool, oonool áfaaseepinee, akee ya naakatee toko.” [ ⅩⅩⅩⅥ ]

ⅩⅩⅩⅦ Pinapana pa pakateyoo nkacakanoo: “Ahámpaatiin, peyme eehuu nihikaakaay pitaako?” Naañahanii: “La ehunuŋ neeyem, toko píketul pa mpuconcool.”