Ⅴ
Císaacii ca niŋ kaahit ka keepoonee ka
Ⅰ Púful toko, incuk ti epees yáali ya eti eeyeniye ya ti elemeyu ya kaahit keepoonee.✡5:1 Esekiyel 2:9-10; Esaaya 29:11 Kaahit enkuu nkitaak pakiical páhantuwa niŋ tíkitaaŋ etenko, nkipankee niŋ pasotal sontel piyema isak niŋ púsupak. Ⅱ Incuk lompo maleekoo eti sempe ti káatuunan niŋ hilim heeceeke, neesok: “Ayme ayem éetuuniye kati áfulan pasotal sontel ya, náapankin kaahit ka?” Ⅲ Pale taakut an alacana, niŋ fotom t’etaam, niŋ fotom páhantuwa etaam ya, eeyina káapankin kaahit ka, naasincan páhantuwa etenko. Ⅳ Inkooŋ meemak kamma an naataakutee éetuuniye kati ápankin kaahit ka niŋ fotom naasincan páhantuwa etenko. Ⅴ Fiye akee ti ñíhampaatiin ña naasokam: “Timpi kooŋ! Sincan, Cata ya eti miin ma miti Juda,✡5:5 Púcook 49:9 Hínkonk ha hiti Dawid,✡5:5 Esaaya 11:1,10 aheekaaheek. Ayíniyini káfulan pasotal sontel ya isak niŋ púsupak pa, náapankin kaahit ka.”
Ⅵ Fiye incuk císaacii, ceecuke nii citaaŋeetaaŋ hínum,✡5:6 Esaaya 53:7 incisiiŋo ti pututa elemeyu ya niŋ waah wa upaakiil wa weeyem wa kaloŋa, ñíhampaatiin ña nkákiipool co. Císaacii ca incitaak usiin isak niŋ úsupak niŋ lompo ñíkin isak niŋ ñúsupak, ukina uyem Kunuu ka keenape ka isak niŋ kúsupak ka kiti Pútuun pa keepoñee ka ti púlunta pa púlooŋ.✡5:6 Sakaliya 4:10 Ⅶ Císaacii ca incikaay incicoop kaahit ka ti epees yáali ya eti eeyeniye ya ti elemeyu ya. Ⅷ Ta Císaacii ca incicoope ta kaahit ka, waah wa upaakiil wa weeyem wa kaloŋa niŋ ñíhampaatiin ña áwii niŋ pakapaakiil paka nkákilipo hátikin etenco. An óo an teyii naataak kóntiŋ nkayekanal pupool piti sanoo peemeeŋe caminkoloŋ, ekina eyem kaluum ka kiti keesampanee ka pakati Pútuun pa. Ⅸ Nkacook hícimu héeyeeni,✡5:9 Kícimu 33:10; 98:1; Esaaya 42:10 nkasok:
“Aátuunaatuuno aakati coop kaahit ka
ínfulan pasotal etenko,
kamma antaaŋee;
niŋ hísim ha hitii annoome Pútuun pa pakan
kéefulii ti síi óo síi,
híleeluuf óo híleeluuf,
pakan óo pakan
niŋ mah óo mah.
Ⅹ Aáhiniihin kapiyeno cáwii niŋ puwaaseena pakati Pútuun pa putuunaa,
efikayeno pumansa pa pakati etaam ya.”
Ⅺ Innene sincan, incuk hícump pumaleekoo, piyema púwuli niŋ pimiliyoŋ.✡5:11 Dañel 7:10 Mpíkiipool elemeyu ya niŋ lompo waah wa upaakiil wa weeyem wa kaloŋa niŋ ñíhampaatiin ña. Insí kilim etempo, Ⅻ mpiyeno caacook meemak, pupusok:
“Císaacii ca ceetaaŋee ca hínum
cítuunaatuuno
kati cisa kayine niŋ hisaanumate,
ecohato niŋ sempe,
kámakiyan, hamake niŋ hímulu!”
ⅩⅢ Fiye ínsi waah wa púlooŋ weeliilee wa alacana, niŋ t’etaam ya, niŋ páhantuwa etaam ya, niŋ ti kaatii ka, niŋ waah óo waah weeyem ti púlunta pa púlooŋ ti caacook, ti hisoku:
“Alímaati eeyeniye ya ti elemeyu ya
niŋ Císaacii ca
kataak hímulu niŋ kámakiyan,
hamake niŋ sempe
fo cancowiyaaw púley!”
ⅩⅣ Waah wa upaakiil wa weeyem wa kaloŋa nuusok, “Amíini”, ñíhampaatiin ña nkákilipo nkámul Pútuun pa niŋ Císaacii ca.