Ⅻ
Aal a niŋ nínkinankoo ya
Ⅰ Píyisan penfakat mpúfulii alacana: aal éesooliye caanak ca, hiim ha nihiyeno t’etaam wootoo, éwuulu eti amansa eetaake sicaaŋaŋ ŋaasuwan niŋ súsupak ti hikawoo. Ⅱ Naayeno niŋ munow, niŋ hiceeku ti ñíseeña akina ti ékey hipuku. Ⅲ Fiye pikee píyisan nene púfulii alacana: nínkinankoo enfakat éecunke samat nii seemak, neetaak kikaw isak niŋ kúsupak, usiin ŋaasuwan niŋ síwuulu siti amansa siyema isak niŋ súsupak ti hikaw eteyyo.✡12:3 Dañel 7:7 Ⅳ Híyeeni eteyyo nihineeŋ máamun himpaac hoonool ti kimpaac kíhaaciil kiti picaaŋaŋ pa ti útiŋu wa, níhiwantii po ti etaam ya.✡12:4 Dañel 8:10 Nínkinankoo ya enfakat ya neesiiŋo hátikin aal a eeyem a ti ékey hipuku ancuk kati eli añiinoo papukalee. Ⅴ Aal a náapukii ciñii cikampaani, enca eficiyeno ati hikaw ha ati púlunta pa púlooŋ, íncitintiŋanii niŋ hikasap hiti mañ.✡12:5 Esaaya 66:7; Kícimu 2:9 Pale añiinoo náalamutee apucoopee patiila pati Pútuun pa ti elemeyu ya eteyoo. Ⅵ Fiye aal a naatey pati káahaaŋ ka tes la Pútuun pa mpimemanooloo la, kati amankoolee fo kunoom wúli niŋ sikeme súsupak niŋ áwii éhaaciil (1,260).
Ⅶ Hikam nihitaako alacana. Maleekoo ya enfakat ya eyya nkasok ya Misel niŋ pumaleekoo eteyyo nkátaakoolan nínkinankoo ya, nínkinankoo ya niŋ pumaleekoo eteyyo lompo nkásiiŋoonii kápitaakool. Ⅷ Pale nínkinankoo ya neeheekee ti hikam ha, ekina niŋ pumaleekoo eteyyo nkayaanee alacana. Ⅸ Nínkinankoo ya enfakat ya néewantiyee t’etaam, niŋ pumaleekoo eteyyo. Ekina eyem epululoola ya étuuta ya eyya nesokee ya Akamool a, niŋ fotom Seetaani ya, eelincane ya púlunta pa púlooŋ.✡12:9 Púcook 3:1 Ⅹ Fiye ínsi hilim heeceeke alacana heesoke:
“Fiye kafakan ka kiti Pútuun pa kúcoliyoo!
Pútuun pa píyisanaayisan sempe etempo nii amansa!
Eenucee ya atempo áyisanaayisan kayine ka kiteyoo!
Kaatuko eesiiŋiye ya hátikin Pútuun pa piti unaa
nanook pakan unaa ti káyinan hánant hanakan,✡12:10 Job 1:6-11; Sakaliya 3:1-2
áwantiyeewant t’etaam.
Ⅺ Kaheekooheek pínapii ti hísim ha hiti Císaacii ca
niŋ ti tooñaa ya eyya nkátuunane ya,
kálafiit eloŋii meemak apan kafeyut eket.
Ⅻ Ekina ewune, awe alacana niŋ aluu keekine ka po,
nitaak pásuuma!
Pale kúnuul kiyeno ti etaam ya niŋ kaatii ka,
kamma Seetaani ya néewanoonii ti aluu!
Yoopiya éñikene fúf,
kamma neemeya nii caanak eteyyo cítamitami.”
ⅩⅢ Ta nínkinankoo ya néepannume ta nii éwantiyeewant ti etaam ya, neetey niŋ aal a eepuke ya ciñii ca cikampaani ca. ⅩⅣ Pale aal a naawufanee úpitu úsupak uti hisiwita henfakat, ancuk kati áyit apikaay ti káahaaŋ ka tes pa memanoolee pa kati akin. Po afaamankoolee fo sitiil síhaaciil niŋ kancaŋ.✡12:14 Dañel 7:25; 12:7 ⅩⅤ Nínkinankoo ya néelafi kaahootan aal a, néefulanii man ti putum eteyyo samat nii musuu kati mucoopoo. ⅩⅥ Pale etaam ya neeyankanan aal a, néepankin putum eteyyo neemelan musuu ma emma nínkinankoo ya néefulanii ma ti putum eteyyo. ⅩⅦ Nínkinankoo ya néeñiken meemak ti aal a, neeca eyitan hikam ti epuuk ya keetowiye ka pakati aal a, kéetuule ka púlooŋ hilim ha heesiiŋanee ha hiti Pútuun pa nkacok piliit ti tooñaa eyya Yéesu náayisane ya. ⅩⅧ Nínkinankoo ya neesiiŋo ti kantant ka pukol kaatii ka.