Na Niyug-is Ta Chachi Mamati Wi Hebreo
1
Jesu Cristun Nangipaakammu Ta Ukud Apudyus
Juan 1:1-18
1 Na awi, kanayun Apudyus ipaakammun ukudna ta chachi profetasna wi nan-ob-ofot na inyòoyyanay nangipaakammun chicha ta chichan mangifaka ta chachi aapputauy Judio. 2 Ngim na sanay anungus na sinuman, à Jesu Cristu wi mismuy Anànan nangipaakammun chitau ta ukudna. À Jesu Cristu, siyan chinutukan Apudyus wi nangwa ta lufung, ya siya kon nangipiyarana wi mangin-uwa ta losani ingkaw. 3 Ad siya kon mangil-antau ta kinafarun Apudyus wi maid miyisuwana ya siya kon issuissun na kina-Apudyus Apudyus. Ya siya kon manitingngil ta lufung kapu ta mannakafalin na ukudna. Finayachana ad na kachusaan na fasurtauy taku, nangulin ad langit ad tummùchu ta machiwawan Apudyus wi angatuwani Ali.
Nangatngatù Jesu Cristu Nu Aangheles
4 Siyan naaawwatan wi nangatngatù Jesu Cristu nu aangheles, ta nangwanaan Apudyus an Jesus à Anàna, siyan mangil-an wi napatpatog na ngachanna nu aangheles. 5 Tan maid nangifagfag-an Apudyus ta uray sinumani anghelnà amasna,
“Sian anàu, tan na sana ilawag-u wi saon na Amam.”
Ad maid pu ko anghel à nangwanaan Apudyus ta amasna,
“Man-amaà an siya, ad siyan man-anàu.”
6 Ngim chanchani pun na mangipaaliyan Apudyus ta Anànay machaychayaw ta lufung, imfakana kon mipangkop ta Anàna,
“Losani aangheles Apudyus, masapur mampalintumongchan siya.”
7 Ad imfakan ako Apudyus na mipangkop ta aangheles,
“Chachi aangheles-u, chichan sanilù wi fafàunò. Ad na mampàwaà ta oyyooncha, mafalini mamfalinò chicha isù puyupuy winnu kilab.”
8 Ngim na ifakan Apudyus ta sachi Anàna, amasna,
“Siay Apudyus, maid pagpag na manturayam à ing-ingkana! Pasig ustu ya malimpiw na pinagturaynu. 9 Siya pipiom na sinumani mamfaru, ya larawwingom na lawing. Siyan kapu ta amaschi, à saon wi Apudyusnu, chinutukà sia ya imparagsak-ù sia tan impangatù sià nangatngatu nu chachi losan wi nan-angatu.”
10 Ad anana ko,
“Na chamchamu, siay Apun nangwa ta annay luta ya uray akon sinumani awad ad langit. 11 Ad uray nu maumas losan chachi iningwam, achia pun tan iingkaw-à ing-ingkana. Ngim chachi iningwam, chumatong na pumallosancha wi isun na pumallosan na luput. 12 Kupinom chichà isù kunsur ad masukatanchà mamfarù isun na mansukatan ta luput. Ngim à sia, maid mamfarfaliwam tan sissiyaà ing-ingkana, wi uray à atawwotawwon, maid pagpag na mafiyakam.”
13 Ya maid pu ko imfakan Apudyus ta uray sinuy anghelnà isun na amasna,
“Tumùchua ta annay achayawan wi apot ta chiwawan-u ingkanà ipaafak-u na losani afusurnu ta isù papattayam ta ikim chicha.”
14 Maid pu amaschì imfakan Apudyus ta uray sinuy anghelna, tan na aangheles, chicha kan sanilun Apudyus wi mansilfin siya tan fafàunona chichà fumachang ta chachi takuy masaraknifan.