2
Zaꞌe zamaze tibunadu, zaeꞌa bare nize mae ovoroꞌi
1 Za Keriso teite tibuzateꞌeanoꞌo inareꞌohe? Kerisoꞌa zae zamarateꞌeanoꞌo za manoḡahe? Za Vine Zaḡoḡa teite radiuꞌenaꞌa, ane teite matuꞌe tiburuꞌeꞌhehe? Za vaze mazao manoreꞌeꞌhehe, zu vetuḡaziꞌeꞌhehe? 2 Za ꞌouge radoꞌidene, zamazeꞌe zamare ḡiriḡiroꞌi! Zamarone tiba hina zamaro titoꞌi! Zamaze tibunadu gauoꞌi! Zaꞌe ꞌouge haḡaeꞌenaꞌa, eḡe matuꞌu borofe hunoꞌi! 3 Ago inahoꞌi! Nize boro reihi raꞌeteꞌe zu zaeꞌa bare niguzoga rae, ḡau ꞌahoga ago haḡaoꞌi! Rehano zaeꞌa bare nize mae ovoradu, vaze zamare ḡihizoꞌi, u zaꞌe ze ꞌuꞌuḡano rae zamaroꞌi! 4 Zae zaeꞌa manoḡa hidoga veize daꞌo ago zamaroꞌi, rehano vazeꞌa manoḡa hidoga veize zuni zamaroꞌi!
5 Zaꞌe, radoneze zamaḡano haḡaize zu zamaronezeꞌe Keriso Iesuꞌa haḡaidoteꞌe teige haḡaoꞌi!
6 Ibite bone Keriso ane huga, Badiꞌa teite idaḡa rehano, Badiꞌa teite idaruꞌeteꞌe niḡa boro mene obone giganiro.
7 Ebu niḡa boro modadu, vaze raenaꞌa, tuḡure vazeḡa teigiro.
8 Ebu ani vazeo reirotene, aneꞌa ane bare mae ovoiro.
Ebu Badiꞌa ḡoere mene variꞌohaudo. Aneꞌa rudaꞌuma ibiḡa rehano onaminu.
Ebu vaze haḡaiḡa sauꞌa boro teige, satauroniro ebu rudaro.
9 Eꞌanoꞌo Badiꞌaꞌa ani mae ḡihine hitana huneo ohoniro, ebu ni ḡihiꞌa haro.
Eꞌe niḡaꞌe ni ꞌahoga ꞌahoga niduꞌa vitinoga.
10 Badiꞌaꞌa ꞌougirotaꞌaꞌe, adureo radiuꞌeteꞌe, zu rahao radiuꞌeteꞌe, zu raha ꞌuꞌuḡano radiuꞌeteꞌe niduꞌaꞌa Iesu matuꞌo hauꞌenaꞌa, ḡuḡuroga veize.
11 Ebu ḡuḡurateꞌe niduꞌaꞌa ꞌahige rae furenoga veize: Iesu Kerisoꞌe Zuhiꞌa Boro.
Ze ꞌouge haḡaeꞌenaꞌa, Badiꞌa emeḡe Mama ni mae ḡihiꞌuma.
Ḡabone hidiꞌuma ibiḡano inare onamoꞌi
12 Eꞌanoꞌo vazehe manoḡa niduꞌa, zaeꞌa Badiꞌa ḡoere ibiḡano iḡaiḡa onamidoteꞌe teige, rihau rudauꞌenaꞌa, ḡabone hidiꞌuma ibiḡano inare onamoꞌi! U mene eḡeꞌa zae teite radiuꞌeteꞌe zamaḡano daꞌo, rehano izidi eḡe oꞌoꞌano zuni borofe inare gauoꞌi! 13 Mazaḡa zaeꞌa Badiꞌa ura haḡaiḡa haḡaoga veize Badiꞌaꞌa zae zamao gaueꞌenaꞌa inaraziꞌohe, zaeꞌa uratadu eꞌe haḡaeꞌohe.
14 Ḡau niduꞌa zamaḡano ago ḡoereꞌenaꞌa zu taꞌiro titeꞌenaꞌa, haḡaoꞌi! 15 ꞌOugine zaꞌe vaze duduḡa tauḡi reꞌuma, zu vazeꞌa mene debaze ḡoeriꞌuma. Ebu izidi ega, haḡai veꞌoḡa azaḡa ḡunuḡano, sauꞌani ꞌahoga mene haḡaadu, Badiꞌa ubuga ubuga teiḡe, radifo. Zaꞌe, eꞌe ḡunuḡano buzuvaꞌa adureo agaruꞌeteꞌe teige agaranoꞌi! 16 Ebu ḡabone tuḡutuḡu hidiꞌuma ḡoeꞌa vaze veize rae furenoꞌi! ꞌOugine, eꞌe, Kerisoꞌa bare ovaiꞌuma madaḡano, eḡeꞌa zae boꞌaḡano gau aduga haḡaidotaꞌaꞌe hugeita raenaꞌa, zae uꞌano matuꞌe rudaꞌuma. 17 Ebu zaeꞌa Keriso mazao fieꞌeteꞌe uꞌano aduga hideꞌohe rehano, zaeꞌa Zuhia Boro veize gauine, eḡeꞌa zae uꞌano rudaune e matuꞌeꞌohe. Zu e ura zae niduꞌa teite matuꞌe tiburatihi. 18 Eꞌanoꞌo zae zuni eḡe teite matuꞌe tiburatihi.
Pauloꞌa Filipi azaḡa uꞌa Timoteo tuḡuniꞌuma
19 Zuhiꞌa Boro Iesuꞌa uratine, e zae vaḡe Timoteo ariga tuḡune ameꞌohe. ꞌOugadu aneꞌa baradu, zae hari meꞌodonine eḡe zuni matuꞌiꞌuma. 20 Zeaꞌa faine radiuꞌe ga mene rae Timoteoꞌe hube hune zamareꞌohe. ꞌAdama ani heuḡa zae zamareꞌeteꞌe eꞌe vazeḡa ꞌahoga oꞌoꞌa. 21 Mazaḡa vaze ḡehaḡaꞌe Iesu Kerisoꞌa urateꞌeteꞌe ḡauḡa mene zamaradu, zeḡe huneꞌa urateꞌeteꞌe ḡauḡa zamare borofeꞌohe. 22 U za edeḡa, Timoteoꞌe haḡai manoḡano Badiꞌa gau haḡaeꞌohe, mazaḡa ani hari manoḡa haramoga veize eḡe teite faifaine gaue onainu. Aniꞌe ubuganiꞌa moga dananeꞌeteꞌe teige eḡe teite gaue onainu. 23 Eꞌanoꞌo ꞌadao eḡe mazao naginiꞌa fureratiteꞌe ederiꞌuduꞌu, Timoteo zae vaḡe tuḡuniꞌuma. 24 Ebu eḡe zuni zae vaḡe ariga amiꞌuma raꞌohe. Eꞌe ibiḡaꞌe Zuhiꞌa Boroꞌa haḡaoniꞌuma rae hube hune zamareꞌohe.
Pauloꞌa Epafrodito Filipi azaḡa vaḡe tuḡuniꞌuma raꞌohe
25 U Efaforodito, ani eḡe nego. Ani eḡe teite gaueꞌohe, zu uti azaḡa teige eḡe teite hari manoḡa bireꞌohe. Aniꞌe zaeꞌa eḡe uꞌa tuḡuniro. Eꞌanoꞌo ani onaadu e ḡau nunu mene idaruꞌetene aniꞌa danahinu. Rehano izidi Efaforoditoꞌe zae vaḡe bare tuḡunine manoḡa raꞌohe. 26 Mazaḡa ani zae niduꞌa ḡiazihi radu zamare huneꞌohe. Zaeꞌa ani ibite uginiroteꞌe egadu, zamazeꞌa adudaro. Aneꞌa za ꞌougiroteꞌe igirotene, ani zamaḡa mene idararo. 27 Aniꞌe hube hune ugi boroꞌa madu nariga rudaro. Rehano Badiꞌaꞌa vetuḡaneadu fainiro. ꞌOugadu eꞌe, aduga zamaḡano, aduga hena mene bare ragatiro. Badiꞌa ani Epafrodito daꞌo mene vetuḡaniro rehano, eḡe zuni vetuḡahiro. 28 Eꞌanoꞌo e ura, aniꞌe ḡarihe zae vaḡe tuḡune amihi raꞌohe. ꞌOugine, za ani teite hidadu matuꞌiꞌuma, zu eḡe zamaꞌa aduduꞌeteꞌeꞌa ufiraꞌuma. 29 Eꞌanoꞌo Zuhiꞌa Boro ibio, matuꞌo hau runeꞌenaꞌa, mae ḡihinoꞌi! Za ani heuḡa vazeḡa nigunine manoḡa! 30 Mazaḡa Keriso gau uꞌano ani nariga rudaro. Aniꞌa zaeꞌa danahifoteꞌe gauḡa haḡaadu, nariga rudaro.