2
Jonase to me kanji te
Nje-kisi ke ndɔ ke ndɔ are tɔku kanji ddee uru Jonase. Jonase to ndɔ muta, ke til muta me kanji te le. Jonase duju Nje-kisi ke ndɔ ke ndɔ ke to Lubba laa me kanji te: N̂-pa na:
«Me ne wungu te ke ingam,
m-duji ei Nje-kisi ke ndɔ ke ndɔ, a ilam te.
Lo te le nje-yoje
m-bbari kare umam a, oo ndum.
Ilam gel maann te beer dann ba te,
maann ke aw ula guku dɔm,
maann ke e-dda are aw kuja,
maann ke e-dda are aw lenge nday dɔm te.
A ema m-pa na:
« E-tubbam ilam ddew ew sei!
A kem a koo key lei ke maji tɔyn bbay.»
Maann uwam gɔsem te.
Buja ubbam,
mu bbiri dɔm te.
M-ddisi ndereng gɔl ddingirije te.
Nange utu tae dɔm te nyɔm.
A, ei, Nje-kisi ke ndɔ ke ndɔ
Lubba lem ɔrum kem baa me buja te!
Kare ke singam goto a,
mole mem dɔ ei Nje-kisi ke ndɔ ke ndɔ te,
ngaa tar-duju lem aw ndereng tee rɔi te
me key te lei ke maji tɔyn.
Dewje ke undaje mede dɔ kɔrje te ke to neje ke baa
daw n̂-tubbaje neje ke maji rɔde te ke ddang.
10 A ema, ma kari ne-polo ke pa tam te ta kari ne wooyo.
Ma dda ne ke munn ndum ta dda.
Kaji to me ji Nje-kisi ke ndɔ ke ndɔ te.»
11 Nje-kisi ke ndɔ ke ndɔ unn ndu are kanji le ngaa kanji le tɔmɔ Jonase ilae dɔ nange te ke tutu.