Matyuu
Oligaa Buŋa Matyuunoŋ ooro.
Jeŋ-asa-asari
Matyuu qa iikawaa kania ii Pombaanoŋ kaleŋ. Qata moŋ Liwai. Room gawmambaa takis meme ejaga laligoro. Gawoŋ ii meŋ laligoro Jiisasnoŋ kaŋ oono uuta meleema gowoko 12 yoŋoo batugianoŋ laligoro.
Oligaa Buŋa koi Jiisaswaa kania iyaŋaa kanagesouruta Juuda yoŋoojoŋ jeŋ asariŋ oŋomambaajoŋ ama ooro. Qaa kota waŋa ii kokaeŋ, “Jiisas Kraistnoŋ Hamoqeqe Tonana ano Kiŋ Poŋnana kolooja.” Juuda ejemba yoŋoojoŋ qaa ii mende sokono uugianoŋ boliro amamaagi. Kawaajoŋ Matyuunoŋ Jiisas gawoŋaa kania ii asuganoŋ jeŋ asariŋ tororo kuma oŋono. Soomoŋgo Walaganoŋ hamoqeqewaa soomoŋgo qaa (promis) eji, ii kuuya Jiisaswaajoŋ ama asuganoŋ asugiŋ qebulugoŋ hoŋawo koloodabororo. Hamoqeqe Toya ii Hibruu qaanoŋ Mesaia ano Griik qaanoŋ Kraist.
Jiisasnoŋ uuwaa gawoŋ bakaya karooŋ meŋ laligoro: Iinoŋ Oligaa Buŋa ejemba kuma oŋoma uugia iikanoŋ kuuŋ omejiilaŋ konjoma oŋoma jigia meŋ qeaŋgoŋ laligoro. Kaeŋ meŋ keno aŋgoleto kolooro laligoŋ maripooŋ gerenoŋ uma komuro roŋ koŋgi mombo waaro. Iikanoŋ Anutuwaa bentotoŋaa kania qendeema nonono. Kaeŋ ano anana letoma Anutuwaa meraboraaŋa koloowombaa kania kolooro. Jiisaswaanoŋ qaaya waŋa 5 ii kokaeŋ: 1) Boŋ 5-7, 2) Boŋ 10, 3) Boŋ 13, 4) Boŋ 18 ano 5) Boŋ 24-25
Buk kokawaa bakaya waŋa 7 ii kokaeŋ:
Jiisaswaa ambosakoŋuruta ano kolokolooya 1.1–2.23
Jon Oomulu ejanoŋ uuwaa gawoŋ mero 3.1-12
Jiisas oomulu mero Satanoŋ aŋgobato meŋ muro 3.13–4.11
Jiisasnoŋ Galili uutanoŋ qenjaaro gawoŋ mero 4.12–18.35
Jiisasnoŋ Galili mesaoŋ Jerusalem keno 19.120.34
Sonda konoga Jerusalem laligoŋ komuro 21.1–27.66
Koomunoŋga waama laligoŋ Siwenoŋ uro 28.1-20
1
Jiisas Kraistwaa ambosakoŋa yoŋoo qa areŋgia
Luuk 3.23-38
1 Jiisas Kraistwaa ambosakoŋa yoŋoo qa areŋgia ii kokaeŋ: Aabrahambaa gbili moŋ Deiwid. Deiwidwaa gbili moŋ Jiisas.
2 Aabrahambaa meria Aisak. Aisakwaa meria Jeikob. Jeikobwaa merauruta Juuda ano iwaa daremuŋuruta. 3 Juudawaa merawoita Perez ano Zera, nemuŋgara Taamar. Perezwaa meria Hezron. Hezrombaa meria Ram. 4 Rambaa meria Aminadab. Aminadabwaa meria Naason. Naasombaa meria Salmon. 5 Salmombaa meria Boaz, nemuŋa kantri mombaa embiaga Raahab. Boazwaa meria Oobed, nemuŋa kantri mombaa embiaga Ruut. Oobedwaa meria Jesi. 6 Jesiwaa meria kiŋ Deiwid. Deiwidwaa meria Solomon, nemuŋa wala Uriawaa embiaga laligoro. Juuda kiŋ kuuya ii Deiwidwaa gbiliuruta kolooŋ laligogi.
7 Solomombaa meria Rehoboam. Rehoboambaa meria Abija. Abijawaa meria Asa. 8 Asawaa meria Jehosafat. Jehosafatwaa meria Jehoram. Jehorambaa meria Usia. 9 Usiawaa meria Jootam. Jootambaa meria Aahaz. Aahazwaa meria Hezekia. 10 Hezekiawaa meria Manase. Manasewaa meria Aamon. Aamombaa meria Joosia. 11 *2 Kiŋ 24.14-15; 2 Hist 36.10; Jer 27.20Joosiawaa merauruta Jekonia ano iwaa daremuŋuruta. Kambaŋ iikanoŋ Babilon yoŋonoŋ Israel kanageso uŋuaŋgi Babilon kema kapuare miri laaligo tani kaaŋa weleŋqeqegiaga laligogi.
12 Babilon kapuare miri laaligo tani kaaŋa laligoŋ iikanoŋ Jekoniawaa meria Sealtiel kolooro. Sealtielwaa meria Jerubaabel. 13 Jerubaabelwaa meria Abiud. Abiudwaa meria Eliakim. Eliakimbaa meria Azor. 14 Azorwaa meria Jaadok. Jaadokwaa meria Akim. Akimbaa meria Eliud. 15 Eliudwaa meria Eleazar. Eleazarwaa meria Matan. Matambaa meria Jeikob. 16 Jeikobwaa meria Joosef, Mariawaa loya. Marianoŋ Jiisas merota qata Kraist Hamoqeqe Toya jeŋkejoŋ.
17 Kambaŋ Aabrahambaanoŋga kanaiŋ laligoŋ kougi kiŋ Deiwid kolooroti, isi iyoŋoo jaŋgo areŋgia ii 14. Mombo kiŋ Deiwidwaanoŋga kanaiŋ laligoŋ kougi Israel kanageso uŋuaŋgi Babilon kema kapuare miri laaligo tani kaaŋa laligogiti, isi iyoŋoo jaŋgo areŋgia ii kaaŋagadeeŋ 14. Babilon kapuare miri laaligo tani kaaŋa laligogiti, kambaŋ iikanondeeŋ kanaiŋ laligoŋ kougi Kraist kolooroti, isi iyoŋoo jaŋgo areŋgia ii kaaŋagadeeŋ 14.
Jiisas Kraist ii kokaeŋ kolooro:
Luuk 2.17
18 *Luuk 1.27Jiisas Kraist koloorotiwaa sunduya ii kokaeŋ: Iwaa nemuŋa Maria ii Joosefwaa buŋaga laligoŋ mende mindiriŋ aoŋ laligori kambaŋ iikanoŋ Uŋa Toroyanoŋ meŋ letoma muro korowo laligoro kania mokoloogi. 19 Kaeŋ mokoloogi eja buŋaya Joosef iinoŋ laaligo dindiŋa laligorotiwaajoŋ Mariawaa kanianoŋ asuganoŋ asugiro gamuyawo koloowaatiwaajoŋ togoro. Kaeŋ togoŋ uutanoŋ ii oloŋ mesaomambaa momo areŋa ano.
20 Kaeŋ romoŋgoŋ ero Pombaa gajoba moŋnoŋ gaonoŋ asugiŋ muŋ kokaeŋ ijoro, “Joosef Deiwidwaa gbili, Uŋa Toroyanoŋ mono Maria meŋ letoma muro koroyawo laligoja. Kawaajoŋ gii mono ii wama miriganoŋ kaŋ embaga koloowaatiwaajoŋ toroko mende moba. 21 *Luuk 1.31Marianoŋ koko meraga mewaa. Eja iikanoŋ kanagesoya siŋgisoŋgogianoŋga hamo qeŋ oŋono solaŋaniwuya. Kawaajoŋ giinoŋ mono qata Jiisas qaba.” Kaeŋ ijoro.
22 Poŋnoŋ gejatootoo eja moŋ sololooro qaa moŋ jeroti, iikanoŋ hoŋawo koloowaatiwaajoŋ iwoi kuuya ii kolooro. Gejatootoo qaa ii kokaeŋ, 23 *Ais 7.14“Emba saraŋ jumuŋa moŋnoŋ koroyawo kolooŋ mera ejaga mero qata Imanuel qabuya.” Qa iikawaa kania ii kokaeŋ, “Anutunoŋ ananawo laligoja.”
24 Joosefnoŋ uuta tooro waama Pombaa gajobanoŋ jeŋ kotoŋ muroti, iikawaa so ama Maria embia koloowaatiwaajoŋ wama mirianoŋ keni. 25 *Luuk 2.21Kema laligorito, kambaŋ biiwianoŋ iikanoŋ motooŋ mende eri kema meria mero Joosefnoŋ qata Jiisas qaro. Mera mero iikawaa gematanoŋ loemba laligori. Kiaŋ.