Taituswaa Tere
Poolnoŋ Taituswaa Tere ano.
Jeŋ-asa-asari
Eja gbaworo qata Taitus iinoŋ uuta meleema Poolwo ororoŋ somoŋgoŋ ilaaŋ misin gawoŋ meri. Meŋ kowe biiwianoŋ wato qata Kriit (Crete) kanoŋ laligori Poolnoŋ batuyanoŋ kotoŋ ala ilailaaya mesaoro zioz gawoŋ areŋgoŋ iima gosiŋ galeŋ kono. Poolnoŋ mesaoŋ kema iwaajoŋ qama kooliŋ laligoŋ Buŋa Tere koi ooro.
Kriit ii qaa Griik iikawo gajugowabo. Kriit ii kowe biiwianoŋ wato moŋ ano Griik (Greece) ii kantri moŋ.
Poolnoŋ Taituswaajoŋ majakaka karooŋ moma qambaŋmambaŋ qaa kokaeŋ ooŋ muro: Kriit yoŋoo kaniagia ii dogodabororo bao jaagoo kolooŋ laligogi. Tosianoŋ uugia meleeŋgi laaligogianoŋ diŋgoroti, iyoŋonoŋ mombo boliwubo. Kawaajoŋ yoŋoo jotamemegianoŋ sili awaa totooŋ qendeema qamakooli ano Baibel stadi gawoŋ mende mesaoŋ tuuŋgia mindiŋgoŋ laligowutiwaajoŋ jeja. Uugia meleeŋgiti, iyoŋoo batugianoŋ tuuŋ boloboolo ii nomaeŋ mindiŋgoŋ kuma oŋoma laligowuyaga? Eja waŋa, emba waŋa, emba saraŋ, eja gbaworo ano weleŋqeqe yoŋoo qambaŋmambaŋ qaagia ii aŋa aŋa kokaeŋ jeŋ asarija: “Uugia meleema Buŋa qaa otaaŋ luaenoŋ laligoŋ somata yoŋoo qaa baatanoŋ kema jegeŋa komuniti gawoŋ awaagadeeŋ meŋ nama jumbubotiwaajoŋ kazi aŋgowowo mesaoŋ laligowu.”
Buk kokawaa bakaya waŋa 5 ii kokaeŋ:
Poolnoŋ aposol gawoŋaa kania jeja 1.1-4
Anutuwaa jotamemeya yoŋoo gejanono qaagia 1.5-16
Ejemba tuuŋ boloboolo yoŋoo gejanono qaagia 2.1-15
Uukuukuu ano galeŋ meme qaa 3.1-11
Yeizozo ano qaa tetegoya tosia 3.12-15
1
Poolnoŋ aposol gawoŋaa kania jeja.
1 Anutunoŋ ejemba meweeŋgoŋ oŋonoti, iyoŋoo momalaarigianoŋ kolooŋ somariiwaatiwaajoŋ ama Jiisas Kraistnoŋ Pool nii wasiŋ nono iwaa aposolya koloojeŋ.
Niinoŋ Anutu weleŋa qeŋ muŋ qaa hoŋa kuma oŋomakejeŋ. Qaa hoŋa ii moma kotoŋ koma gbiliwuti eeŋ, oŋoo laaligogianoŋ mono utegoŋ letomakebaa. Kawaajoŋ tere koi oojeŋ.
2 Anutunoŋ qaa qoloŋmoloŋgoya jewaatiwaa so qaago, iinoŋ monowaa monoyanoŋ laaligo kombombaŋa nonomambaajoŋ jeŋ somoŋgoŋ iikawaa gematanoŋ iwoi kuuya mokolooro. Oŋonoŋ qaa hoŋa moma kotoŋ moma laarigi iikanoŋ mono nemuŋ koma oŋono laaligo kotiganoŋ keubombaajoŋ mamboma jejeromoŋromoŋ amakeju. 3 Anutu, Hamoqeqe Tonananoŋ oyaŋboyaŋ laaligoyaa qaaya jeŋ somoŋgoŋ iikawaa kambaŋa dindiŋa mero kaŋ kuuro iikanoŋ Buŋa qaaya ninisaama ii jeŋ seiwombaa jeŋkootoya ano. Iikawaa so ii jeŋ asarigi Anutunoŋ nii ii jeŋ seimaŋatiwaajoŋ moma laariŋ noma kuuŋ nono.
4 *2 Kor 8.23; Gal 2.3; 2 Tim 4.10Oo uumeleeŋ mera sorona Taitus! Niinoŋ ilaaŋ gombe uuga meleema ala ilailaana kolooŋ motooŋ Poŋ moma laariŋ laligoŋkejo.
Maŋnana Anutu ano Hamoqeqe Tonana Jiisas Kraist yoronoŋ mono kaleŋmoriaŋ goni luaenoŋ laligowa.
Galeŋ jotamemeya yoŋoo qaa areŋ
5 Kowe wato Kriit (Crete) kanoŋ motooŋ misin gawoŋ meŋ batuyanoŋ gomesaomambaajoŋ ama kokaeŋ jeŋ kotoŋ gombe: “Uumeleeŋ yoŋonoŋ iliŋgosoŋ laŋ laligojuti, ii mono areŋgoŋ oŋoma (eja to pasto ano) jetamemeurugia gomaŋ ano taoŋ so kuuŋ kuma oŋona areŋgiawo zioz gawoŋ meŋ laligowu.” Kaeŋ jeŋ deeni.
6 *1 Tim 3.2-7Uugia meleeŋgiti, iyoŋoo batugianoŋga eja koi kaaŋa meweeŋgowa: Mombaa selianoŋ koposowaa qaaya qaa, embia motooŋgo meŋ laligoja. Meraboraaŋanoŋ uugia meleema Anutu moma laariŋ yaŋgiseŋ gejajuju siligiaa qaa selegianoŋ mende kuuŋ jeŋ oŋomakeju.
7 Uumeleeŋ kanagesowaa somatagia pasto (bisop)*Ouwasia, zioz paris liida, bisop, gawoŋ meme waŋa iinoŋ qa somata eeŋ mende bosimbaato, paris tuuŋuruta yoŋoojoŋ qama kooliŋ kuma oŋoma uugia kuuŋ gawoŋgiaa areŋgia oŋoma gejanono qambaŋmambaŋ qaganoŋ galeŋ koma mindiŋgoŋ oŋomakebaa. iinoŋ Anutuwaanoŋ kanageso galeŋ koma oŋomakebaati, iikawaajoŋ mono eja koi kaaŋa kuuwa: Mombaa selianoŋ koposowaa qaaya qaa, jaba-arambaraŋ ano goroŋkikia qaa. Apu kotiga mende neŋ manja tondu mende qeŋ mondomondo qaganoŋ injarere laligoŋ moneŋ iwoiwaajoŋ mende kaparaŋ komakeja. 8 Iwaanoŋ kawuti, ii saanoŋ koma horoŋ kalaŋ koma oŋoma qaa nanamemeŋ awaawaa siiŋa moma uuta iikanoŋ ama laligowaa. Kilikalu kepiriria qaa, qaa kuuya dindiŋagadeeŋ gosiŋ soraaya toroya qaita moŋ kolooŋ iyaŋaa nanamemeŋa tororo galeŋ koma aoŋkeja.
9 Buŋa qaa kuma nonoŋgi iikanoŋ tando ejia kaaŋa laaligo dooŋgoŋ naŋgomambaajoŋ nanji, pastonoŋ ii mono koronsoŋ meŋ iikanoŋ qokotaaŋ nambaa. Kaeŋ nama saanoŋ Buŋa Tere otaaŋ momalaariwaa qaa batuya batuya ejemba kuma oŋoma iikanoŋ uugia kuuŋkebaa ano tosianoŋ Buŋa qaa meeraŋgoŋ qetamakebuti, iyoŋoo qaagia doogoya ii saanoŋ qewagoŋ mindiŋgoŋkebaa. Kiaŋ.
Boi takapolakaya mono qotogoŋ oŋombu.
10 Ejemba mamaganoŋ qaa qeŋ gejajuju ama sosoŋae kaaŋa qaa seŋa seŋa jeŋ ejemba tiligoŋ oŋomakeju. Anutuwaa aiweseya selegianoŋ kotogiti, iyoŋoo tuuŋnoŋga ejemba jaasooŋgonoŋ iikaaŋa kolooŋkeju.
11 Ejemba iikaaŋa yoŋoo qaagia mono qowogowu. Yoŋonoŋ Buŋa qaa kuma oŋombombaajoŋ mondoŋ moneŋ iwoi horowombaajoŋ moma kesa-awaraŋ qaa laŋ jegi gamuyawo kolooŋkeja. Kaeŋ ama sumaŋ tosaaŋa mono korebore meŋ sooŋ oŋoŋgita eŋkaloloŋ koloogi. 12 Kriit iyaŋgiaa gejatootoo eja moŋnoŋ kaiyakagiaajoŋ kokaeŋ jeŋ ooro, “Kriit ejembanoŋ mono kambaŋ so qaa qoloŋmoloŋgoŋ injarere qezeŋ laligoŋ jeraŋai kombo kaaŋa ewaewaŋ koma baonoŋ newageeŋ nepaqepalo neŋkeju.” 13 Yoŋoojoŋ qaa kaeŋ naŋgoŋ jeroti, ii hoŋaga. Kawaajoŋ jigia iikanoŋ qaono momalaarigianoŋ asugiŋ hoŋawo koloowaatiwaajoŋ ii mono kotakota jeŋ tereŋgoŋ oŋomakeba.
14 Momalaarigianoŋ hoŋawo kolooro Juuda nonoo beŋ sosombanana ano ejemba qaa hoŋa soŋgiŋ jeŋkooto amakejuti, qaa iikaaŋaajoŋ geja mende ambu. 15 Uunana meleeniŋ Uŋa Toroyanoŋ koŋkonjora meŋ nonono soraaya koloojoŋi, ananaa nembanene mombaa soŋgoya ii mende eja. Anana nembanene kuuya saanoŋ newoŋatiwaa so koloojato, qewoloŋ ejemba qaa hoŋaajoŋ yaŋgiseŋ amakejuti, iyoŋonoŋ ii me woi aŋgi uugianoŋ kileŋ tilooŋkeja. Uugianoŋ kokojinjiŋawo kolooro uu gejagia duuro mono bao jaagoo tani kaaŋa laligoju.
16 Yoŋonoŋ “Anutu moma yagojoŋ,” jegianoŋ kaeŋ jeŋ kaiyakagianoŋ ii qakooma qewagoŋkeju. Kaaŋa kolooŋ Anutuwaanoŋ qaa qegi iŋiiro arokuukuugiawo kolooro gawoŋ awaa moŋ mewutiwaa so mende kolooju. Kiaŋ.
*1:4: 2 Kor 8.23; Gal 2.3; 2 Tim 4.10
*1:7: Ouwasia, zioz paris liida, bisop, gawoŋ meme waŋa iinoŋ qa somata eeŋ mende bosimbaato, paris tuuŋuruta yoŋoojoŋ qama kooliŋ kuma oŋoma uugia kuuŋ gawoŋgiaa areŋgia oŋoma gejanono qambaŋmambaŋ qaganoŋ galeŋ koma mindiŋgoŋ oŋomakebaa.