1 Ti nɩ ‑do a 'mʋ 'yri, ‑ɛ ‑bɩ 'kɩɩn Helɔdɩ ‑tʋa ‑Yusu a nyibli ‑bɩ ꞊hɩʋɛn a ꞊tutuo, 'kɩ 'lɩ Jrusrɛ, 2 'ɛ lee nɛ 'a 'sɛyo, 'kɩ bʋ nu ‑tʋanɩɛ, bʋ 'la Sakɩ, ‑ɛ mɔ Saan a 'dɩayɩ. 3 ‑Tɛ ɛ 'ye꞊e, ‑ɛ mɔ, dɛ a 'mʋ, ɛ ‑nu, ɛ kwlɛɛ ‑Juukʋɛ* a nyibli gbagbɩ kɩ, ‑ɛ ‑bɩ ɛ lee nɛ 'a 'sɛyo nɩ de, 'kɩ bʋ klɔ Piɛlɩ, ʋ 'mʋ꞊ʋ ꞊jɩ' pʋ. Ti a 'mʋ, ɛ mɔ la ‑Juukʋɛ a lɛ'mimle, ‑ɛ mɔ Pakɩ a ti ꞊nɩɔ la. 4 Piɛlɩ bʋ nɩ 'kɩ 'lɩ ꞊jɩ', ‑ɛ ‑bɩ 'kɩɩn Helɔdɩ lee nɛ 'a 'sɛyo nɩ ‑pu ꞊tu 'ʋ ꞊hlon‑do, bʋ nu dui nɩ ‑hɛn, bʋ ‑hie ꞊gbɛ, bʋ ꞊tu Piɛlɩ 'yie, ‑ɛ di꞊e nu, Pakɩ 'bʋ ‑hi, ɛ 'mʋ꞊ʋ ‑bati lɛ ‑pʋʋ ‑nɩ, 'kɩ 'ʋ nyibli a pɛpɛ yɩ, nyibli a 'mʋ, ʋ 'mʋ꞊ʋ hla, ‑ɛ mɔ, ɛ kɔ bʋ 'kʋ. 5 'Kɩ Piɛlɩ nɩ 'lɩ ꞊jɩkayu bʋ, 'ʋ ꞊tui꞊e 'yie. Ti nɩ ‑do a 'mʋ 'yri, ‑Yusu a nyibli ‑mɔ ‑bɩ, ʋ nyɛɛ Nyɩsʋa lɛ, 'kɩ bʋ ‑hɛɛ Piɛlɩ.

6 ‑Nyrɔwɔ ‑mʋ', ‑ɛ kɔ 'kwli 'kɩɩn Helɔdɩ di la Piɛlɩ ‑bati lɛ ‑pʋʋ ‑nɩ, 'kɩ 'ʋ nyibli yɩ, 'tɩ‑ ‑nyrɔwɔ a 'mʋ, ɛ 'mʋ 'ʋ nyre, 'a 'tɔ, 'kɩ 'lɩ ꞊jɩkayu bʋ, Piɛlɩ nɩ 'lɩ 'sɛyo nɩ 'hʋɛn ‑gbati, 'ʋ nu 'cɩɩn, 'ʋ mʋa nɛ 'a dabʋɩ 'sɛyotayo nɩ 'hʋɛn a 'mʋ, 'waa dabʋɩ yɩ bʋ, 'ɛ pɛ 'lɩ ꞊nʋ 'nyɩ bʋ, 'ɛ yɩ ŋme, 'kɩ 'lɩ ꞊jɩkayu a 'mʋ a paalɛ', 'sɛyo ‑bɩ nɩ 'ʋ, 'ʋ ꞊tui ꞊jɩkayu 'yie. 7 Ti nɩ ‑do a ti 'yri, Nyɩsʋa a lɛlenyɔ 'hrɩɩ 'lɩ ꞊jɩkayu a 'mʋ bʋ, ‑nyrɛ 'ɛ 'bɛɛ 'lɩ, Nyɩsʋa a lɛlenyɔ a 'mʋ, 'ɛ ‑hrɛn Piɛlɩ a ꞊mʋɛyɛ lɛ, 'ɛ ‑ha꞊a ŋmena', ɛ wɛn: «'Kɩka ‑nɩ, ‑bʋ 'du ye'.» Ti nɩ ‑do a ti 'yri, ‑ɛ ‑bɩ 'cɩɩn ble 'lɩ꞊ɩ dabʋɩ lɛ. 8 ‑Ɛ ‑bɩ ɛ wɛn 'nɩ de: «Pʋ ‑tɛblɩ 'hʋɩ lɛ, ɛ kɔ, ‑bʋ pʋ 'suin,» Piɛlɩ 'ɛ pʋ ‑tɛblɩ 'hʋɩ lɛ. ‑Ɛ ‑bɩ Nyɩsʋa a lɛlenyɔ wɛn: «Pʋ ‑na kʋɛtɩ kɩ, ‑bʋ kʋɛ 'mʋ ꞊wien,» 9 Piɛlɩ 'ɛ kʋɛ꞊ɛ ꞊wien, 'ʋ 'hrɩ 'lɩ ꞊jɩkayu bʋ. Kɛɛ, ɛ 'yɩ꞊ɩ ꞊han‑tɩ ‑pʋ, dɛ a 'mʋ, Nyɩsʋa a lɛlenyɔ ‑nu, bʋ di sɛyɩ a ‑tɩ' pa. 'A ꞊wlʋ ‑mɔ ‑bɩ, ɛ wɛn, ɛ yɩ 'yee 'lɩ lɛ. 10 Yɩ‑hɛsɛyo ‑mʋ', ‑ʋ ꞊tui ‑yaa 'yie, ʋ ‑hi ꞊nʋ lɛ, 'ʋ ‑hi 'hʋɛn a 'sɛyo lɛ ‑wɛ, 'tɩ‑ 'ʋ nyre 'ʋ ‑yaa a 'mʋ, 'a 'maju 'yri, ‑ɛ mɔ 'plɩmaju, ‑ɛ kɔ 'yri ʋ nɛɛ 'ʋ, 'ʋ yɩ 'lɩ 'dɩɔ 'kwli bi. ‑Tɛ ʋ nyre 'ʋ, ‑ɛ ‑bɩ 'maju a 'mʋ, ɛ nɩ ‑do ɛ ‑hɔn 'ʋ ‑wlu, 'ʋ 'hrɩ, 'ʋ bi 'lɩ 'hru wlɔn, 'ʋ mi. Ti nɩ ‑do a ti 'yri, ‑ɛ ‑bɩ Nyɩsʋa a lɛlenyɔ ‑hɔn 'ʋ Piɛlɩ 'hʋɩ nɩ. 11 ‑Ɛ ‑bɩ ꞊wlʋ dii Piɛlɩ ‑mɔ, ɛ wɛn: «Ɛ 'yɩ 'lɩlɛ'yiye 'pa‑, 'nɩ 'ye꞊e 'lɩ lɛ. Dɛ ‑bʋ, 'n yɩ 'ye, ɛ mɔ ꞊han‑tɩ ꞊nɩɔ. Kʋkɔnyɔ Nyɩsʋa tɛ 'a lɛlenyɔ bʋ, 'ɛ ꞊gblɛ 'mʋ, 'ɛ ‑ha 'lɩ 'mʋ 'kɩɩn Helɔdɩ a 'klɩ bʋ, ɛ kɔ ‑Juukʋɛ* a 'crɛ a pɛpɛ ‑mʋ', ʋ ‑hʋɛ bʋ nu wɛn 'mʋ 'yi ꞊hlɔn lɛ.» 12 ‑Tɛ Piɛlɩ ‑hie 'lu lɛ, ‑ɛ ‑bɩ 'kɩ ɛ mu 'lɩ Mari a ‑tɛ, ‑ɛ mɔ Saan a 'dii, Saan ‑mʋ', ‑ɛ kɔ kɩbʋhlanyrɛ ‑mɔ Makɩ. 'Kɩ 'lɩ 'kayu a 'mʋ bʋ, 'kɩ nyibli ‑hʋɔhʋɩ 'kukue 'lɩ lɛ, 'kɩ 'ʋ Nyɩsʋa a dɩda a ‑ta'. 13 ‑Tɛ Piɛlɩ nyre 'ʋ ‑yaa a 'mʋ, 'a 'maju 'yri, ‑ɛ ‑bɩ ɛ ‑tʋa 'maju a bibilɛ, ‑kʋannunʋgba ꞊dʋ, 'ɛ mu 'ʋ 'maju 'yri. Nʋgba a 'mʋ, 'a 'nyrɛ mɔ Rodɩ. Nɔ‑ 'bɛti ‑nɩ, ‑ɛ mɔ: «Nyɔ‑ nɩ 'ʋ 'lɩ?» 14 ‑Ɛ ‑bɩ ɛ yru Piɛlɩ a win nɩ. Dɔdʋ a ‑tɩ, ɛ 'yɩ 'ʋ 'maju 'ʋ ‑ha, 'ɛ gba 'lɩ cigbɛ 'kayu bʋ, ɛ wɛn: «Piɛlɩ di nɩ. 'Kɩ ɛ nɩ 'ʋ 'maju 'yri,» 15 nyibli 'ʋ lee ꞊nɛ, ʋ wɛn: «꞊Bɩ ‑na 'lu ‑hɔn 'ʋ 'hru wlɔn, ꞊nɩ hlɛ ‑tɩ a 'mʋ?» ‑Ɛ ‑bɩ kɛ‑ ɛ pɩ de: «꞊Han‑tɩ 'n pʋ 'lɩ, Piɛlɩ ꞊nɩɔ.» ‑Ɛ ‑bɩ ʋ wɛn: «'Ʋʋn‑, Piɛlɩ a ‑hihiu, nɔ‑ ꞊ye, ‑kɔtɩ ʋ 'la꞊a nɩ a 'gbɛ.» 16 Ti nɩ ‑do a 'mʋ 'yri, Piɛlɩ ‑mɔ ‑bɩ, ɛ 'tɩɛ yɩ 'maju ‑bibi ‑nɩ. ‑Tɛ ʋ ‑ha 'ʋ 'maju 'ʋ, 'ʋ 'ye꞊e, ‑ɛ mɔ, Piɛlɩ ꞊nɩɔ. ‑Ɛ ‑bɩ 'waa ꞊wlʋ kɛɛ lɛ, 17 Piɛlɩ 'ɛ nu 'a dabʋ, 'ɛ lee ꞊nʋ, ‑ɛ mɔ, bʋ ma wien, 'ɛ ‑tʋa ‑mɔlɛnɩna, ‑tɛ Kʋkɔnyɔ nu 'lɩ 'a ꞊jɩkayu a bʋ‑hɩhɩa. ‑Ɛ ‑bɩ ɛ wɛn 'nɩ: «Ba mu, ba lee Sakɩ kɔ 'dɩayɩnʋ ‑bɩ 'hʋɛn‑.» ‑Tɛ ɛ ‑yrɛ, ‑ɛ ‑bɩ ɛ 'hrɩ nɩ, 'ɛ ‑hɔn 'lɩ Jrusrɛ 'kwli, 'ɛ mu 'lɩ ‑tɩtɛ ‑bɩ.

18 ‑Tɛ ‑nyrɛ ‑nyɛ, ‑ɛ ‑bɩ ꞊gbugblolɛ bi 'lɩ 'sɛyo 'nyɩ, 'ʋ yɩ 'waa dɩɔnʋ lɛ 'bɛti ‑nɩ: «‑Bɩ' Piɛlɩ mu yɩ 'lɩ?» 19 'kɩɩn Helɔdɩ 'ɛ lee 'sɛyo ‑bɩ, 'kɩ bʋ ꞊mʋɔ꞊ɔ lɛ, 'ʋ ꞊mʋɔ꞊ɔ lɛ ‑mʋɔmʋɔ, 'ʋ 'yɩ꞊ɩ 'ye, Helɔdɩ 'ɛ da 'sɛyo ‑mʋ', ‑ʋ ꞊tui 'tʋ Piɛlɩ 'yie, 'kɩ 'lɩ ꞊jɩkayu bʋ, 'ɛ pʋʋ ꞊nʋ ‑bati lɛ, ɛ wɛn: «A kɔ ba 'kʋ,» 'ɛ mɔ ꞊han‑tɩ, 'ʋ 'la ꞊nʋ. ‑Tɛ ɛ ‑hi, ‑ɛ ‑bɩ 'kɩɩn Helɔdɩ a 'mumu, ɛ ‑hɔn 'lɩ Sudeblʋgba 'kwli, 'ɛ mu 'lɩ Sesalɩ. 'Kɩ 'lɩ 'dɩɔ a 'mʋ 'kwli, ɛ ‑hii 'lɩ ti ‑hʋɔhʋɩ.

20 Nyibli ‑mʋ', ‑ʋ nɩ 'lɩ Tilɩdɩɔ kɔ Sidɔdɩɔ 'kwli, 'kɩɩn Helɔdɩ a 'mʋ, ɛ pɩɩ ꞊nʋ yrʋ lɛ dɩakɩ. 'A ‑tɩ, ɛ ‑hʋɛ bʋ gba 'lɩ ꞊nʋ tʋ ‑mɔ. Ɛ nɔ‑ nu꞊o, 'dɩɩ nɩ 'hʋɛn a 'mʋ, 'a nyibli 'ʋ bibi 'yi lɛ, 'ʋ mu꞊o 'ye mɔ, 'kɩ 'lɩ Sesalɩ, ‑ɛ di꞊e nu, ɛ kɔ ꞊nʋ 'hʋɛn‑, ʋ 'mʋ kɩ bʋ ‑wɛɛn ‑nɩ, ‑kɔtɩ 'kɩ dii‑tɛblɩ ‑hʋɔhʋɩ ‑hʋɛn 'lɩ Helɔdɩ a 'blʋgba 'kwli lɛ. Ɛ kɔ 'sɛyotayu gbagbʋ ꞊dʋ. 'A 'nyrɛ mɔ Blatusɩ. Nɔ‑ ꞊tui 'kɩɩn Helɔdɩ a 'kayu 'yie. Nyɩbɛyu a 'mʋ, nɔ‑ ʋ mu 'lɩ ‑mɔ, 'ʋ nyaa ꞊nɛ lɛ, 'kɩ bʋ ‑hɛɛ ꞊nʋ, ‑ɛ di꞊e nu, ʋ kɔ 'kɩɩn 'hʋɛn‑, ʋ 'mʋ kɩbʋwɛɛnlɛ kɔ. ‑Tɛ ʋ hla꞊a, ‑ɛ ‑bɩ ɛ wɛn nɩ, 'ʋ mu 'lɩ 'kɩɩn Helɔdɩ ‑mɔ, ʋ wɛn: «‑A ‑hʋɛ꞊ɛ nɩ, ‑kɔ ‑a mʋ 'hʋɛn‑, ‑ba wɛɛn kɩ bʋ.» 21 ‑Tɛ ʋ 'ye꞊e, ‑ɛ ‑bɩ ɛ wa ‑nyrɔwɔ 'nyrɛ, ‑ɛ kɔ 'kwli ɛ di 'lɩ ꞊nʋ ‑mɔ ‑hlee ‑nɩ. ‑Tɛ ‑nyrɔwɔ a 'mʋ, ɛ nyre 'kɩ 'ʋ, ‑ɛ ‑bɩ ɛ pʋ 'a 'kɩɩn wlawlʋ nɩ, 'ɛ nɩ bʋ, 'kɩ 'lɩ 'a 'kɩɩngbata 'kwli, 'ɛ ‑tʋa hihle. 22 ‑Ɛ ‑bɩ nyibli wɛn: «Nyɩsʋa, ‑ɛ yɩ hle, ɛ 'yɩ ‑tonyiblo 'pa‑.» 23 Ti nɩ ‑do a ti 'yri, Nyɩsʋa a lɛlenyɔ nu꞊o nɩ, 'kʋɛ 'ɛ klɔ꞊ɔ, ‑ɛ nu꞊o, ɛ 'yɩ nyibli ‑lee ‑nɩ, ‑ɛ mɔ, bʋ 'kee nɛ 'a ‑tɩ a 'yi'bʋalɛ, Nyɩsʋa, nɔ‑ kɔ ‑tɩ bʋ 'bʋa 'yi. Hɛnnɩ di꞊e ‑didi, 'ɛ 'kʋ.

24 Ti a 'mʋ 'yri, Nyɩsʋa a ‑tɩ 'hɛɛn la bʋ, 'kɩ 'lɩ 'blʋgba a pɛpɛ 'kwli, 'ɛ nu꞊o, nyibli ‑hʋɔhʋɩ, 'ʋ kuo ‑Yusu ꞊wlʋ yɩ.

25 ‑Tɛ Banabasɩ kɔ Pɔlʋ 'hʋɛn‑, ʋ ‑yra ‑kʋan 'lu, 'kɩ 'lɩ Jrusrɛdɩɔ 'kwli, ‑ɛ ‑bɩ ʋ ꞊hɩan ‑mɔ, 'ʋ mu 'lɩ Atiɔsɩ. ‑Tɛ ʋ yɩ nɩ mi, ʋ gba nyɩbɛyu ꞊dʋ. 'A 'nyrɛ mɔ Saan, 'a kɩbʋhlanyrɛ mɔ Makɩ.