1 ‑Tɛ ɛ ꞊tu 'kɩ 'ʋ꞊ʋ bʋ, ‑ɛ ‑bɩ Pɔlʋ 'du 'yii ye', 'ɛ 'ye ‑gbolugbo a nyibli, ɛ wɛn: «'Dɩayɩnʋ ‑na, kʋɛ la 'lɩ bʋ, ‑bʋ yɛ kɛ ‑nyrɔwɔ ‑bʋ kɩ, 'nɩ 'ye꞊e lɩ dɛ ‑hʋan ꞊dʋ, ꞊bʋ di nu, 'kɩ 'ʋ Nyɩsʋa ye', ‑kɔtɩ 'na ꞊wlʋ 'mʋ 'mʋ ‑tɩ ‑yɛɛ ‑nɩ.» 2 Bʋ pʋ 'kɩ lɛ, ‑ɛ ‑bɩ ‑cɔhlʋnpinyʋ a nyiblo gbagbʋ, ‑ɛ mɔ Ananiasɩ, ɛ lee nyibli ‑mʋ', ‑ʋ nɩ 'ʋ Pɔlʋ 'hʋɩ, ɛ wɛn: «Ba pʋ 'ʋ꞊ʋ ŋma wien.» 3 ‑Ɛ ‑bɩ kɛ‑ Pɔlʋ pɩ꞊ɩ yɩ, ɛ wɛn: «Sʋʋ‑. ‑Mɔ ‑bʋ, ‑ɛ nɛɛ 'li nɩ 'hʋɛn, Nyɩsʋa a ꞊gbɛtʋ, nɔ‑ di ‑mʋ bi. 'Na ‑batilɛpʋʋ‑tɩ, ꞊nɩ nɩ 'ʋ ‑tɛ ‑mʋ' bʋ, ꞊wɩ yɩ, ‑tɛ ‑aan tete ni 'a hɩhla. Kɛɛ, ‑yɩ hie 'ʋ tete a 'mʋ bʋ, ꞊nɩ yɩ nyibli ‑lee ‑nɩ, bʋ bi 'mʋ.» 4 ‑Ɛ ‑bɩ nyibli a 'mʋ, ‑ʋ nɩ 'ʋ Pɔlʋ 'hʋɩ, ʋ wɛn: «꞊Bɩ Nyɩsʋa a ‑cɔhlʋnpinyʋ a nyiblo gbagbʋ, nɔ‑ ‑hɛ 'yri lɛ?» 5 ‑Ɛ ‑bɩ Pɔlʋ wɛn: «'Dɩayɩnʋ ‑na, 'n 'yɩ꞊ɩ ‑yi, bʋ di ‑cɔhlʋnpinyʋ a nyiblo gbagbʋ' pa. Ɛ mɔ ꞊han‑tɩ, ʋ 'crɩ la꞊a nɩ, 'kɩ 'lɩ Nyɩsʋacrɩɛn 'kwli, ‑ɛ mɔ: ꞊Yɩ yɩ ‑blɛɛ ‑nɩ, ‑bʋ ‑ha ‑na dakɔ a ye'nanyɔ 'yri lɛ.»

6-8 Pɔlʋ yi꞊e nɩ, ‑ɛ mɔ, ‑gbolugbo a 'mʋ a nyibli ‑bɩ mɔ Sadusɩ꞊tumu* a nyibli, ‑ʋ bɩ 'ʋ mɔ Falisi꞊tumu* a nyibli. ꞊Tumu nɩ 'hʋɛn a 'mʋ, ʋ 'yɩ ‑pɛ. Sadusɩ꞊tumu a nyibli 'nɩ ‑pʋ꞊ʋ lɩ꞊ɩ ꞊han‑tɩ, 'kɩ nyibli ‑bʋ, ‑ʋ 'kʋ, bʋ di 'lɩ 'kʋkʋnyibli 'nyɩ ‑hɔn, bʋ di 'klɔ 'hrɩ. Ʋ 'nɩ pʋ꞊ʋ lɩ꞊ɩ ꞊han‑tɩ de, 'kɩ Nyɩsʋa a lɛlenyʋ kɔ 'kuo 'hʋɛn‑, bʋ di 'klɔ nɩ. Falisi꞊tumu a nyibli ‑mɔ ‑bɩ, ‑tɛblɩ a 'mʋ, ʋ pɩ꞊ɩ ꞊han‑tɩ. Ɛ nɔ‑ kɔ ‑tɩ Pɔlʋ 'ɛ 'yaa 'lɩ win, ɛ wɛn: «'Na 'dɩayɩnʋ ‑na, 'mɔ Falisi꞊tumu a nyiblo ꞊nɩɔ. 'Na 'baɩ mɔ Falisi꞊tumu a nyiblo ꞊nɩɔ ‑wɛ. Dɛ ‑bʋ, ‑ɛ mɔ nyibli bʋ 'kʋ, bʋ ‑hɔn 'lɩ 'kʋkʋnyibli 'nyɩ, bʋ 'hrɩ 'klɔ, 'n kuo dɛ a 'mʋ ꞊wlʋ yɩ, 'nɩ yɩ꞊ɩ ‑ple, 'kɩ 'lɩ ꞊wlʋ a 'lɩla 'kwli. 'Na ꞊wlʋ a yɩkuolɛ a 'mʋ, ɛ nɔ‑ kɔ ‑tɩ 'a pɩɩ 'mʋ ‑bati lɛ.» ‑Tɛ ɛ hla 'kɩ ‑tɩ a 'mʋ, ‑ɛ ‑bɩ Falisi꞊tumu a nyibli kɔ Sadusɩ꞊tumu a nyibli 'hʋɛn‑, ʋ ‑tʋa 'blini a nunuo, ‑gbolugbo a nyibli 'ʋ 'bɛ ꞊tɩɔ, 'ʋ ꞊mʋmʋɛ lɛ. 9 'Waa ‑cici a lɛpʋpʋʋ, ɛ yɩ klɛ 'nɩ ‑bii ‑nɩ dɩakɩ, 'tɩ‑ tetetɔɔnyʋ, ‑ʋ mɔ Falisi꞊tumu a nyibli, 'ʋ 'du ye', 'ʋ nyra ‑gbolugbo yɩ bʋ, ʋ wɛn: «‑A mʋ ‑bʋ, dɛ ‑hʋan, nyiblo ‑bʋ, bʋ di nu, ‑a 'nɩ 'ye꞊e lɩ꞊ɩ. ‑Baklɛ 'ku ꞊dʋ, ‑ʋ'ʋ‑, Nyɩsʋa a lɛlenyɔ ꞊dʋ, nɔ‑ hlee 'lɩ Pɔlʋ ‑mɔ, 'ɛ nu꞊o, 'ɛ hlɛ ‑tɩ a 'mʋ.»

10 ‑Tɛ ʋ hla ‑tɩ a 'mʋ, ‑ɛ ‑bɩ ‑cici bii kɩ dɩakɩ de. Ɛ nu꞊o nɩ, hʋannʋ 'ɛ bi 'lɩ 'sɛyo a nyiblo gbagbʋ 'kwli, ‑kɔtɩ ‑gbolugbo a nyibli ‑wɛ 'lɩ bʋ 'hʋhwla Pɔlʋ lɛ nɩ. Ɛ nɔ‑ mɔ bʋ lee nɛ 'a 'sɛyo, bʋ mu 'lɩ nyibli a 'mʋ 'nyɩ, bʋ ‑ha 'lɩ Pɔlʋ, ‑ɛ di꞊e nu, ʋ 'mʋ 'lɩ꞊ɩ 'sɛyo a 'kayu bʋ gba.

11 ‑Tɛ ʋ bi 'lɩ 'tɔlʋwɔ 'kwli, Pɔlʋ nɩ 'lɩ ŋmena', Kʋkɔnyɔ 'ɛ 'hrɩɩ ꞊nɛ yɩ, ɛ wɛn: «‑Na ꞊wlʋ 'nɩ 'bie 'lɩ ꞊hlɔn. ‑Tɛ ‑nu, ꞊nɩ hla 'na ‑tɩ, 'kɩ 'nɛ‑ Jrusrɛ 'kwli, ɛ blɛɛ yɩ, ‑bʋ hla꞊a, 'kɩ 'lɩ Rɔmʋdɩɔ 'kwli.»

12 ‑Tɛ ‑nyrɛ ‑nyɛ, ‑Juukʋɛ ‑bɩ 'kukue lɛ, 'ʋ 'sʋʋ ꞊nɛ, ‑ɛ mɔ, ʋ 'yɩ 'lɩ꞊ɩ ‑wɛ bʋ di dɛ, kɔ bʋ 'na, 'bʋ mɔ, 'bʋ 'yɩ Pɔlʋ 'la. 13 Nyibli ‑mʋ', ‑ʋ ‑yra ‑tɩ a 'mʋ, ʋ ‑hi nyibli a ‑wlɩ nɩ 'hʋɛn 'lu. 14 Nʋ‑ mu 'lɩ Nyɩsʋa a ‑cɔhlʋnpinyʋ* gbagbɩ kɔ 'blʋ a nyibli ‑mɔ, ʋ wɛn: «‑A 'sʋʋ ꞊nɛ nɩ, ‑ɛ mɔ, ‑a 'yɩ 'lɩ꞊ɩ 'lɩ ‑wɛ, ‑ba di dɛ, 'bʋ mɔ, ꞊ba 'yɩ Pɔlʋ 'la. 15 'A ‑tɩ, a kɔ ‑gbolugbo a nyibli 'hʋɛn‑, ba mu 'lɩ Romakʋɛ a 'sɛyo a nyiblo gbagbʋ ‑mɔ, ba lee ꞊nɛ, ‑ɛ mɔ, a ‑hʋɛ Pɔlʋ nɩ, a 'mʋ 'lɩ 'a dɛ 'kwli lɛ yru ‑tɛɛ. 'A ‑tɩ, bʋ ya 'a mɔ꞊ɔ yɩ. 'Bʋ yɩ 'lɩ꞊ɩ nɩ yɛ, ‑a di ‑wɛ ‑mɔ, ‑ɛ di꞊e nu, ‑a 'mʋ꞊ʋ 'hru wlɔn 'laa ‑nɩ, 'tɩ‑ ɛ 'mʋ 'nɛ‑ nyre.»

16 Kɛɛ, ‑tɛ ʋ hlɛ ‑tɩ a 'mʋ, Pɔlʋ a 'dɩayɩ nyrɔyu a 'yu nyɩbɛyu, nɔ‑ 'wɩn Pɔlʋ a 'lɩla‑tɩ, ‑tɛ ʋ yɩ꞊ɩ nɩ hlɛ. Ɛ nɔ‑ mu 'lɩ 'sɛyo a 'kayu ‑mʋ', ‑ɛ kɔ bʋ Pɔlʋ nɩ 'lɩ, 'ɛ lee ꞊nɛ, 17 Pɔlʋ 'ɛ da 'sɛyo a nyiblo gbagbʋ a ‑sɛkɛ ‑bɩ, 'ɛ lee ꞊nɛ, ɛ wɛn: «Gba 'lɩ gblotayu ‑bʋ 'aan nyiblo gbagbʋ ‑mɔ, ‑ɛ nu꞊o, ɛ kɔ ‑tɩ bʋ lee ꞊nɛ,» 18 'sɛyotayu a 'mʋ, 'ɛ gba 'lɩ꞊ɩ 'a nyiblo gbagbʋ ‑mɔ, ɛ wɛn: «꞊Jɩklapi ‑bʋ, ‑ɛ mɔ Pɔlʋ, ɛ nɔ‑ da 'mʋ, 'ɛ lee 'mʋ, ꞊bʋ ya ‑mʋ gblotayu ‑bʋ yɩ, ‑tɩ ɛ ‑ya, ɛ 'mʋ ‑mʋ ‑lee ‑nɩ,» 19 'sɛyo a nyiblo gbagbʋ a 'mʋ, 'ɛ 'ble gblotayu a 'mʋ, 'a dabʋ kʋa, 'ʋ bii yɩ, 'tɩ‑ 'ɛ 'bɛti꞊e yɩ, ɛ wɛn: «‑Tɩ a 'dɩ ‑bɩ ‑ya, ‑hʋɛ ‑bʋ lee 'mʋ 'lɩ?» 20 ‑Ɛ ‑bɩ ɛ wɛn: «‑Juukʋɛ a nyibli gbagbɩ ‑yra꞊a nɩ, 'kɩ bʋ di 'nɛ‑ ‑mʋ ‑mɔ, ‑ɛ di꞊e nu, ʋ 'mʋ ‑hʋan ‑mʋ ‑lee ‑nɩ, ꞊mʋ ‑hʋan 'ʋ Pɔlʋ ‑Juukʋɛ a ‑gbolugbo yɩ gba, ʋ 'mʋ꞊ʋ lɛ 'bɛti ‑nɩ, ‑ɛ di꞊e nu, ʋ 'mʋ 'a ‑tɩ lɛ yru ‑tɛɛ. 21 Kɛɛ, ꞊nɩ 'pʋʋ 'lɩ 'waa win a 'mʋ ꞊han‑tɩ, ‑ɛ nu꞊o, ʋ ‑wɛ 'lɩ nyibli a ‑wlɩ nɩ 'hʋɛn, 'ɛ nɩ dɛ lɛ, ʋ nʋ‑ di ‑hli, ʋ 'mʋ꞊ʋ klɔ. Ʋ 'sʋʋ ꞊nɛ nɩ, ‑ɛ mɔ, ʋ 'yɩ 'lɩ꞊ɩ 'lɩ ‑wɛ, bʋ di dɛ, kɔ, bʋ 'na, 'bʋ mɔ, 'bʋ 'yɩ Pɔlʋ 'la. Ʋ ‑wɛ ‑mɔ, ‑na win nɩ ‑do ʋ yɩ ‑ple.» 22 ‑Ɛ ‑bɩ 'sɛyo a nyiblo gbagbʋ wɛn: «‑Tɩ ‑bʋ, ‑na ‑mɔ lɛ, ꞊nɩ 'lee 'kɩ nyiblo ꞊dʋ. Kɛɛ, ꞊hɩan ‑mɔ, ‑bʋ mu 'lɩ 'kayu bʋ.»

23 ‑Tɛ ɛ ‑hi, ‑ɛ ‑bɩ 'sɛyo a nyiblo gbagbʋ a 'mʋ, ɛ da 'a ‑sɛkɛpʋ nɩ 'hʋɛn ‑bɩ, ɛ wɛn: «Ba 'kukue 'sɛyo a (200) ‑wlɩ nɩ ‑pu lɛ, kɔ ‑soenaanyʋ a (70) ‑wlɩ nɩ ta ꞊tu 'ʋ ‑pu, ɛ kɔ 'sɛyo ‑mʋ', ‑ʋ 'ble 'dio kʋa lɛ, 'a nyibli a (200) ‑wlɩ nɩ ‑pu. 'Aan pɛpɛ, ba ‑wɛ ‑mɔ, mu 'ʋ 'tɔlʋnaɩ a ti 'yie. A di mu kɛ 'lɩ Sesalɩdɩɔ 'kwli. 24 Ba ‑wɛɛ ‑soe ‑mɔ ‑wɛ, a 'mʋ Pɔlʋ gba. ‑Gʋlʋnʋma ‑mʋ', ‑ɛ nɩ 'lɩ Sesalɩ, ‑ɛ kɔ 'nyrɛ mɔ Felisɩ, ɛ nɔ‑ kɔ ‑mɔ a gbɛ 'lɩ꞊ɩ 'lɩ,» 25 'ɛ 'crɩɩ Felisɩ a 'mumu ‑mɔ, ɛ wɛn: 26 «‑Gʋlʋnʋma Felisɩ, ‑na 'wio. 'Mɔ Klodɩ Lisiasɩ ꞊nɩɔ, ‑ɛ yɩ 'crɩɛn ‑bʋ 'crɩ. 27 Nyiblo ‑bʋ, 'na 'sɛyo ya 'nɛ‑ ‑mʋ ‑mɔ, ‑Juukʋɛ* a nyibli gbagbɩ, nʋ‑ klɔ꞊ɔ, 'ʋ ‑hʋɛ bʋ 'la꞊a. Kɛɛ, 'n 'wɩn nɩ, ‑ɛ mɔ, Romakʋɛyu ꞊nɩɔ, 'nɩ gba 'lɩ 'na 'sɛyo, 'ʋ ‑ha ꞊nʋ꞊ʋ ꞊jɩ', ‑ɛ di꞊e nu, ʋ 'nɩ ꞊ha꞊a 'la. 28 ‑Tɩ ‑bʋ, ʋ yɩ꞊ɩ ‑yɛɛ ‑nɩ, ɛ nɔ‑ 'n ‑hʋɛ ꞊bʋ yi. Ɛ nɔ‑ nu꞊o, 'nɩ gba 'lɩ꞊ɩ 'waa ‑gbolugbo a nyibli yɩ, ʋ 'mʋ꞊ʋ lɛ 'bɛti ‑nɩ. 29 ‑Tɛ ʋ yɩ 'kɩ꞊ɩ lɛ nɩ 'bɛti ‑nɩ, ‑ɛ ‑bɩ 'n 'ye꞊e nɩ, ‑ɛ mɔ, ʋ yɩ yɛɛ ꞊nɛ ‑tɩ, 'kɩ 'ʋ 'waa tete a ‑ta'. Kɛɛ, ɛ 'yɩ ꞊dedede ‑nu, ‑bʋ blɛɛ 'kʋkʋʋ yɩ, kɔ, ‑ɛ blɛɛ ꞊jɩ' a pʋpʋʋ yɩ. 30 Dɛ ‑bɩ, 'n 'wɩn de, ɛ nɔ‑ mɔ, ‑Juukʋɛ a nyibli gbagbɩ pʋ 'lɩ꞊ɩ nɩ, 'kɩ bʋ 'la꞊a. ‑Tɛ 'n 'wɩn, ɛ nɔ‑ mɔ, ti nɩ ‑do a ti 'yri, ꞊bʋ lee 'na 'sɛyo, bʋ ya ‑mɔ꞊ɔ yɩ, ɛ kɔ, nyibli ‑mʋ', ‑ʋ yɩ꞊ɩ ‑tɩ ‑yɛɛ ‑nɩ, bʋ ya ‑mʋ ‑hawi.» Kɛ‑ 'sɛyo a nyiblo gbagbʋ nu 'cɩcrɩɩ.

31 ‑Tɩ a 'mʋ, 'sɛyo a nyiblo gbagbʋ ‑hla, ʋ ꞊tuu 'ʋ꞊ʋ nɩ, 'tɔlʋwɔ nɩ ‑do a 'mʋ, 'kɩ ʋ gba 'ʋ Pɔlʋ, 'ʋ mu 'lɩ Atipatrisɩdɩɔ 'kwli. 32 ‑Tɛ ‑nyrɛ ‑nyɛ, 'sɛyo ‑mʋ', ‑ʋ nɛɛ bʋɩ, ʋ ꞊hɩan ‑mɔ, 'ʋ mu 'lɩ Jrusrɛdɩɔ 'kwli, 'kɩ 'lɩ 'waa bʋnɩɩlɛ', 'sɛyo ‑mʋ', ‑ʋ nɛɛ ‑soe, ʋ nʋ‑ kɔ Pɔlʋ 'hʋɛn‑, ‑ʋ gba 'dagba 'lu ‑mɔ. 33 ‑Tɛ ʋ nyre 'lɩ Sesalɩ, ‑ɛ ‑bɩ ‑soenaasɛyo a 'mʋ, ʋ ‑ha 'lɩ 'crɩɛn nɩ, 'ʋ ‑nyi꞊e ‑gʋlʋnʋma, 'tɩ‑ 'ʋ ‑ha 'lɩ Pɔlʋ, 'ʋ ꞊tu 'lɩ ꞊nɛ꞊ɛ ‑jɩ' bʋ. 34 ‑Tɛ ‑gʋlʋnʋma a 'mʋ, ɛ ‑hre 'crɩɛn a 'mʋ, ‑ɛ ‑bɩ ɛ 'bɛti Pɔlʋ nɩ, ɛ wɛn: «'Blʋgbakɩbɩa a 'dɩ ‑bɩ ‑kɔ 'lɩ 'kwli 'lɩ?» ‑Ɛ ‑bɩ Pɔlʋ wɛn: «'Kɩ 'n kɔ 'lɩ Silisi.» ‑Tɛ ɛ 'wɩn 'kɩ, 35 ‑ɛ ‑bɩ ɛ wɛn: «Ti ‑mʋ' ‑kɔ 'yri nyibli ‑mʋ', ‑ʋ yɩ ‑mʋ ‑tɩ ‑yɛɛ ‑nɩ, ʋ di 'mʋ ‑hawi ya, 'kɩ 'n di 'ʋ ‑mʋ 'ʋ 'bɛti ‑nɩ,» 'ɛ lee nɛ 'a ‑kʋannunyibli, bʋ gba 'lɩ꞊ɩ Helɔdɩ a 'kayu bʋ, ʋ 'mʋ꞊ʋ 'yie ꞊tu.