5
Atakorwe Mandro Ile Reh Ta Oduu
1 Kristus indreruwyon tidu. Lo kah madan inso tatidu pwi. Ile pe ndrike' oduu kihes, nombrun adahran oduu kile lumwe' sa ndre we hahnan oduu kile ndramta marai ke porah.
2 Atahrung kehii. Yu Pol umpa ile ta oduu. Kipe ye oduu adahran su ndramat kuti hepini keltun marta' oduu ha-au, pe etkakik kile Lo ta su Yuda, eri marai ndre Kristus ipu ti we hepe kindrehnuwii oduu pwi. 3 Adampahar, yu kupwe petsih yi. Iy si ndramat ndre kihran pe hepini keltun martan ke-eu, eri nombrun kitmbru-e handrai Lo. Lo ndre sulo-on ti iy kihtot ndre eriy kenon. 4 Oduu kehe ndre edengkeles atpa atla huye' oduu odo madan Lapan ile pahndran Lo, eri ndrokoro oduu pe Kristus ti indremendrih. Oduu ti etndre-au odo huyen ta Lapan.
5 Tidu Kristen ndramat, ile puko-on ta Lapan Mulwen impo marai ile pahndran bilip ta tidu ile ta Yesus Kristus, eri tidu titreh titpa Lapan we kiduwe tidu titla huyen odo madan. Iy kuti sa tidu tidengkelyen tih. 6 Tidu titndrehtok ndroda Yesus Kristus, ile pe kalatun martai kile pini ndre pwi, eri porah kopwi. Sa mandra-an lakopwi ti tapa bilip ile pahndran reh ta tidu ile ta sa ndramat se yi.
7 Bilip ta oduu ile ta Yesus Kristus ti inehtot huyen. Iy si ihnan pe oduu otnum tahrung nolou ndrokene tih? 8 Lapan ti pwi. Iy ti iyuwen oduu atla Kristen ndre mamunen kopwi. 9 Yis ti hepe kopwi odoke inahnan palawa ndre sih intaptap. 10 Yu tuno ihpa ndre Lapan we kihnuwii oduu, pe oduu we odohtot tawene todo tih. Yu tuno, oduu we otndrohtot ye sih tawene pwi yi. Iy si ndramat ndre inehyan tawene ta oduu, eri Lapan we kihndrusi iy.
11 Kipe ye ihpa ndre su hapa, yu mapwi kumpehre kupwe sa kamal hepini keltun marta' su ha-au, eri ihpa kehe pe su Yuda ma hontudou ngendre-en ile todo tih? Oduu Kristen ndramat todo, etndre-et kile todo oh. Kipe ye ndre ndrokene, yu ma kuntatuhne ndramat kile eriy, eri nolou ndre yu umpehre upwe Yesus Kristus imet idu kei tondrih ti we kindrahyan tawene ta sa lau pwi. 12 Yu wasu-u upwe su ndramat ndre henahnan tawene ta oduu ile mo-on ti hepini keltun marta' su ha-au pe hada mbruwe' su kile ndrodan yi.
13 Oduu bilip ndramat todo, Lapan ke indretakuni oduu yi, ile pe oduu kah fri. Oduu ka oto ile reh ta oduu. Odoke nombrun etawe reh kuti kiduwe oduu otpo sane mo-on kile pahndran waso ta sengiy. Homou ahwasu-um homou, pe edehnuwii iy si ndre tadan marai. 14 Odo Lo ndre sulo-on kehe ndre iyus ndrongon Moses ti hala ke handrai hemin komanmen sih. Komanmen erti kurti, “Ehwasu-um ndramat homou yi ihpa ndre ou wasu-um ou ndre ou tih.” 15 Odoke kipe ye oduu adata-at oduu pe otyo-on oduu kihpa ndre puyep eri adampahar, kihne oduu ndre sulo-on edehrut ndresale.
Lapan Mulwen pe Sengiy
16 Homosa yu upwe kupwe ti kutih. Mandro pe lila ta oduu ti etawe Lapan Mulwen ki-in munen, kile pe oduu we etndrepo sane mo-on ndre sengi' oduu irreh ti pwi. 17 Odo sane ndre sengi' tidu irreh ti Lapan Mulwen ti mboren pe sane ndre Lapan Mulwen waso-on eri sengi' tidu ti wamolon. Horu ndre rundrei ti handrai impo pahun ile pule-en handrai. Ile pe kipe ye Lapan Mulwen ki-in munen mandro pe lila ta oduu ti oduu etndranon etndrepo sa ndre sengi' oduu irreh ti pwi. 18 Odoke kipe ye oduu etawe Lapan Mulwen ki-in mune' oduu, eri Lo ti tadan puko-on odo we kihndrusi oduu ti pwi.
19 Punou mo-osa ndre sengiy waso-on ti he-en ke moleu:
punou mo-on puso-on ihpa ndre punou ta mweh,
pirihei mo-on pe ndramat kamal pe pedih hementir su ke porah kopwi,
20-21 lotu isela ta Lapan ndrokene ti pwi,
tapupu-uh sane ihpa ndre ngam,
purku-um pe sane posing,
ndramat hanta su ile nolou,
henendringis sane ta ndramat homou yi pe hompo loroh,
ndramat hapa hosor ranga' su,
ndramat tuno' su sa ndramat se yi ti pwi,
ndramat hemir hemir henesarpat pe hompo pahun ile pule-e' su,
koloi inehrut ile sane ta sa ndramat,
koloi inehrut ile ta sa ndramat se yi,
hompo pahun pe horoh sa,
heni-ing wo puko-on ea ineluhen palai,
koloi inehrut ile ta sa ndramat ndre mandro-o sa huyen, pe sane punou mo-on se sulo-on yi.
Yu kupwe kile ta oduu ihpa ndre yu undripa munen tih. Su kehe ndre hompo keri-it sane mo-on kuti we hanna pahndran kapman ta Lapan pwi.
22-23 Odoke Lapan Mulwen inahngahang sane kutih:
herreh tan ndramat,
pwo-es,
ndrinei ineweh,
ndrinei isenai sowin pwi,
hangahang sane,
huyei illa tan ndramat homou yi,
hohtot ile punou huyen rang sei sei,
homou intamangsan homou ile huyen,
pe ndramat henehndrepti su odo tawene mo-on.
Sih Lo indranon we kihndrehndrusi si ndramat ndre impo sane punou huyen kuti pwi.
24 Su ndramtan Yesus Kristus ti hendrepiyen punou mo-on odo sengi' su ti indra-au ndresale. Punou mo-on erti su hopo nilim ile kei tondrih pe indrimat. 25 Lapan Mulwen iduwe laip ise tatidu, ile pe tidu tidahran Iy ki-in munen tidu odo lila-a tidu ndre sulo-on. 26 Titmesi-iy ke ndre tidu kolwii, titakursi ndrinen ndramat se yi kolwii, titndringis sane o ndramat se yi kolwii.