1 Ya yinni yaꞌa mor antuꞌa ne o baꞌabiig, ka pu more keŋ bane a Winaꞌam nidib saꞌan ka ba laꞌase maali, ka more keŋ bane kaꞌ Winaꞌam nidib koto ni maal, li pu mor nyannee? 2 Ya ziꞌ ye Winaꞌam nidib na ti kad dunia dim saria? Ka ya yaꞌa na ti kad dunia dim saria, ya ku nyaŋe tuꞌas antuꞌabibis yela nannanna? 3 Ya ziꞌ ye tiname na ti kad maleknam saria, ka kelle dunia kaŋa nwa yela? 4 Ka ya yaꞌa mor antuꞌa bama, bo ka ya more ken bane pu dol Winaꞌam saꞌane? 5 Neꞌeŋa ane nyan n tisi ya. Winaꞌam nidib soogin sieba yaꞌa nwaꞌas ne taaba, nid soꞌ kaꞌ ya soogin mor yaꞌam na tunꞌe maal ba pianꞌad la bee? 6 Ka Winaꞌam nidib soogin sieba more ba antuꞌa ka pu tuꞌasi li ba meŋa, ka lee more li keŋ bane kaꞌ yadda niŋidib la koto ni ka ba tuꞌasi li.

7 Asida ya pun poꞌogne, yanam mor ya antuꞌa kenn koto ni ne ya yadda niŋidib taaba la. Li a suꞌum ka ya siak poꞌogir, bee ban na zu ya laꞌad ka ya bas taal n gaad yaname na mor ya yadda niŋidib taaba n keŋ koto ni. 8 Amaa yaname maan taaba beꞌed ka zuud taaba, bane a ya baꞌabiis, Winaꞌam dolim ni.

9 Ya pu baŋ ye tuumbeꞌed dim ku ti kpenꞌ Winaꞌam soꞌolim la nii? Da maꞌa ya meŋa. Nimbane a poꞌasaꞌamidib bee bane maan bada bee dap bane dig ne ba dap taaba la, 10 bee naꞌayiis bee bane mor fufum, bee bane nut daam n koon bee bane tuꞌud nidib bee faandib, baa ba yinni ku kpenꞌ Winaꞌam soꞌolim la nii. 11 Ya sieba daa ane ala. Ka Winaꞌam daa pie ya tuumbeꞌed ka ya lieb o meŋ nidib, ka o ke ka ya a popielim dim o tuon, yaname a yinni ne ti Zugsob Yesu Kiristo ne Winaꞌam Siig Suŋ.

12 Soꞌ na yel ye, “M mor suer na maal man bood siꞌel wusa.” Sida. Amaa li kaꞌ siꞌel wusa a suꞌum n tisid oo. O ye, “M mor suer na maal man bood siꞌel wusa.” Sida. Amaa m ku siak n lieb siꞌel yamugo. 13 “Diib be ne poor yela, ka poor me be ne diib yela.” Sida! Amaa Winaꞌam na saꞌam babayi la wusa. Niŋgbiŋ la kaꞌane dausaꞌuŋ bee poꞌasaꞌuŋ yelle, li ane Zugsob yela. Zugsob la me be ne ti, ti niŋgbina yela. 14 Winaꞌam vuꞌug Zugsob la kumin, ka o paŋ la me na vuꞌugi ti. 15 Ya ziꞌ ye Kiristo soꞌe ya niŋgbina lua wusa? Dinzugo li na a suꞌum ye m zaŋ Kiristo niŋgbina n laꞌas ne poꞌagoonda niŋgbina bee? Ayei baa biꞌelaa. 16 Ya ziꞌ ye one laꞌas o meŋ ne poꞌagoondir on ne poꞌagoondir la lieb ne niŋgbiŋ yinni? Li sob Winaꞌam gbauŋin, dau ne o poꞌa yela ye, “Babayi la na lieb niŋgbiŋ yinni.” 17 Amaa one laꞌas o meŋ ne Zugsob la on ne Zugsob la ane yinni siig la ni.

18 Luakim dausaꞌuŋ ne poꞌasaꞌuŋ. Bozugo tuumbeꞌed wusa ban ka ninsaal maan la pu be o niŋgbinaa. Amaa tuumbeꞌed dine a poꞌasaꞌuŋ la be ne ninsaal niŋgbina ni. 19 Ya ziꞌ ye ya niŋgbina la ane Winaꞌam Siig Suŋ la yire, one bee ya ni la on ka ya diꞌe Winaꞌam saꞌan laa? Ya pu soꞌe ya meŋa. 20 Winaꞌam daꞌa ya ne. Dinzugo naꞌasimi Winaꞌam ne ya niŋgbina.