1 Li ane sida ye m more yolisim, ka a Kiristo Tumtum ka da nye ti Zugsob Yesu la. Ka m tuuma lin ka m tum n tis Zugsob la ke ka yanam a yadda niŋidib. Bee m maꞌanee? 2 Hale sieba yaꞌa pu siak ye m ane Kiristo Tumtum, li nar ka yanam siak. Yaname a yadda niŋidib la, nie bigis ye m ane Kiristo Tumtum.

3 Nidib yaꞌa yel ye m kaꞌa Kiristo Tumtum na, anwana ka m na lebis yiisi m meŋ yel la ni. 4 Man ne Barnabas pu mor suer ye ba tisi ti diib ne nuub ti tuuma zugo? 5 Ti pu mor suer n na ke ka poꞌa kane me puꞌusid Winaꞌam doli ti goond wenne ti Tumtum taaba la ne Zugsob pitib la ne Piita niŋid siꞌem la bee? 6 Ya tenꞌes ye man ne Barnabas maꞌaa nar ye ti tum n diisi ti meŋa? 7 Sogia be yaani n tum zaalim ka pu diꞌed yoode? Anoꞌon seed tiis ka ku di li wela? Ka anoꞌon kim niigi ka ku di ba binꞌisim.

8 M pu yel neꞌeŋa ne ninsaalib paŋa, Winaꞌam wada la me yele ala. 9 Li sob wada ban ka Winaꞌam da tis Moses la gbauŋin ye, “Mit ka ya liꞌa naꞌaraad bane kuod la ne yuko.” Li ane niigi ka Winaꞌam daa yet bee? 10 Ayei, li ane tinam yela, bee kaꞌa alaa? Eenn nwa sobne ti zug. Bozugo one kuod ki la kuodne ka one buꞌudi li la me buꞌudne, ka babayi wusa mor tiꞌir ka mor potenꞌer ye ba na pudugi li n di. 11 Ti tum tuuma bane a suꞌum n tisi ya siis wenne wuu bane but biili. Li a suꞌum ka ti diꞌe laꞌad bane a suꞌum ya saꞌan wenne wuu bunib. 12 Sieba yaꞌa mor suer kan ka ba na diꞌe laꞌasuma bama ya saꞌan, tinam mor suer hale ka li gaad ala.

Amaa ti pu zaŋ suer kan la ye ti diꞌe siꞌel ya saꞌanee. Amaa ti siak ye ti ku maal siꞌel line na giŋ Kiristo labasuŋ la moolugo. 13 Ya miꞌ ye bane tum Winaꞌam puꞌusum yin la, ba diib bene anina. Ka bane maan maana n tisid Winaꞌam ka tum maan maalug zinꞌig la tuuma la, ba me diꞌedi ba diib anina. 14 Ala men, Zugsob la tis noor ye bane moon labasuŋ la na paamidi ba siꞌel wusa ne anina.

15 Amaa man pu zaŋ sueya ban ka m mor la yinni diꞌe siꞌel, ka me pu sobid neꞌeŋa ye ya tis im siꞌela. Hale m yaꞌa kpi, sonꞌe soꞌ naa ke ka m ku nyaŋe nweꞌe nyoꞌogo. 16 Man moon labasuŋ la pu ke ka m tunꞌe nweꞌe nyoꞌogo. Li ane tilas ka m niŋid ala. M yaꞌa pu mool labasuŋ la, yeltoog na be m zugin. 17 M yaꞌa mool labasuŋ la ne m meŋ boodim, m na diꞌe li nyood. Amaa m yaꞌa pu mool li ne m meŋ boodim, lin ane ye m kun moole sa. 18 Ka neꞌ yaꞌa a sida bo a man nyoode? Li ane man yiti moon labasuŋ la zaalim ka pu zaŋ suer kan ka m na diꞌe siꞌel labasuŋ moolug tuuma la nii.

19 Hale baa man mor yolisim ka soꞌ pu soꞌe man la, m zaŋi m meŋ lieb yamug n tis nidib wusa ye m more ba bedego n kenn Kiristo saꞌan na. 20 M yaꞌa be Jew dim saꞌan, m liebid wuu Jew nid ne, ye m more ba kenn Kiristo saꞌan na. Ka m yaꞌa be ne bane dol wada ban ka Winaꞌam da tis Moses la saꞌan, m liebid wuu ba nid yinni baa ne man pu dol wada la, ye m more bane dol wada la kenn Kiristo saꞌan na. 21 Ka bane pu dol wada la saꞌan ka m daa me lieb wuu ban nid yinni, ye m more ba kenn Kiristo saꞌan na. Ka neꞌeŋa pu paꞌalne ye m pu dol Winaꞌam wada laa. M dolne Kiristo wada. 22 Ka ban yadda pu zuꞌe la saꞌan, ka m daa me lieb wuu ba yinni ye m suŋi ba. M dolne sueya konꞌob konꞌob nidib buudi wusa saꞌan, ye m tiligi ba sieba. 23 Labasuŋ la zug m niŋid neꞌeŋa wusa ye m ti diꞌe li bareka.

24 Ya miꞌ ye zoogin, zotzotib wusa zotne, amaa ba yinni maꞌaa dit ka diꞌed piini. Dinzugo kpeꞌeŋimi ya meŋ bedego, wuu zotzotib n zot siꞌem la, ye ya ti diꞌe piini Winaꞌam saꞌan. 25 Zotzot wusa gbanꞌedi ba meŋ siꞌel wusa ni ye ba diꞌe piini kane ku yuug ka saꞌam. Ka tinam gbanꞌedi ti meŋ ye ti ti diꞌe piini kane kaꞌ naare. 26 Dinzug man pu zot yoo yoogo, ka me pu zabid yoo yoogo wuu one zabid nweꞌed sisiꞌem laa. 27 M mugusidi m meŋ tum wenne yamug ne. Ka mam mool labasuŋ la n tisid nidib la, mam meŋ da koꞌoŋ nyood Winaꞌam saꞌanee.