1 Dinzugo, tiname n ziꞌ yaname a siꞌem la, ke ka ti ku lem nyaŋe modig yaꞌasa, ka siak ye ti be Atens teŋin ti konꞌo konꞌ, 2 ka tum ti pitu Timoti one a ti Winaꞌam tumtum tiraan n paꞌan Kiristo labasuŋ la, ye o kena suŋi ya, ya yadda niŋir poogin, ka kpeꞌeŋi ya sunya 3 ka namisug bama da ke ka ya soꞌ bas Winaꞌam suer la dollim. Yanam miꞌ ye li ane Winaꞌam boodim ye ti namis. 4 Tiname daa nam be ne ya la, ti daa deŋi yeli ya ye ti wusa na nye namisug. Ka yanam miꞌ ye line la sid niŋ la. 5 Dinzugo, mam daa ku nyaŋe modig la, ka m tum Timoti ye m baŋ ya yadda niŋir a siꞌem, ka zot ye Sutaana paꞌati panꞌasi ya, ka ti tuuma ya saꞌan la lieb zaalim.

6 Ka nannanna ka Timoti yi ya saꞌan n leb na, ka mor labasuŋ ya noŋilim ne ya yadda niŋir yela la na, ka yeli ti ye ya tenꞌesidi ti yela saŋa wusa suꞌuŋa, ka bood bedego ye ya nyee ti, wuu tiname bood ye ti nyee ya siꞌem la. 7 Dinzugo m baꞌabiise, tiname wum ya yadda niŋire a siꞌem yela la ke ka ti sunya kpiꞌem ya yela ti daamug ne ti namisug poogin. 8 Ya yaꞌa ziꞌe kiŋ kiŋ ka dol Zugsob la, ya sid na be beilim suŋ. 9 Ka nannanna ti na nyaŋe puꞌus Winaꞌam bareka ya zug, ka me puꞌus o bareka tinam mor sumalisim o tuon ya yela la zug, 10 ka sosid o ne ti sunya yuꞌuŋ ne nintaŋ, ye ti nyee ya ne nif, ka suŋi ya ne dine pasig ya yadda niŋirin.

11 Ti sosidi ti Baꞌ Winaꞌam, ne ti Zugsob Yesu Kiristo ye o maal suer tisi ti, ka ti keenn ya saꞌan na. 12 Ka sosid Zugsob ye o ke ka ya taaba noŋilim ne nidib wusa noŋilim a siꞌem na nobug bedego wuu tinam noŋi ya siꞌem la, 13 ye o kpeꞌeŋi ya sunya ka saŋkan ka ti Zugsob Yesu na kena ne o nidib wusa la, yanam na di buod ka a suꞌum nyain ti Baꞌ Winaꞌam la tuon.