1 Man Paul, one ka ya yel ye m yaꞌa bee ya saꞌan m a dabieug, ka m yaꞌa kaꞌa ya saꞌane m mor sukpiꞌeuŋ n pianꞌadi ya yela la, belimidi ya ne Kiristo sumbugusum, 2 ka sosidi ya ye m yaꞌa ti kena, li ku nar ka m pianꞌad ne sukpiꞌeuŋo. M miꞌ ye m na nyaŋe mor sukpiꞌeuŋ n saꞌal bane yel ye ti tum ne ka li dolne ti ninsaalib boodim la. 3 Hale ne tinam be dunia ni la ti pu nweꞌed tanp wenne dunia nidibi niŋid siꞌem laa. 4 Lin ka ti more zabid la kaꞌane dunia dine, ka lee more Winaꞌam paŋ ka saꞌamid line mor paŋ wusa. 5 Ka saꞌamid ziri tenꞌes beꞌed dim ne bane duꞌosid ba meŋ ne Winaꞌam baŋir yela la. Ka ti nyaŋ potenꞌer beꞌed wusa ka ba siak a Kiristo din. 6 Ka ti yaꞌa keenn ya saꞌan na, ka ya paꞌali ti ye ya sid siak Winaꞌam noor, tiname tiaꞌ ye ti saans one pu siak Winaꞌam noor la.

7 Gosimi lin ka ya nyet la ka kpansi ba. Soꞌ yaꞌa be ka tenꞌes ye o a Kiristo nid, on tenꞌesim o meŋ yela ye on a Kiristo nid la tinam me ane ala. 8 M nweꞌed nyoꞌog ne paŋ kan ka Winaꞌam tisi ti la yela, line a ye ti kpeꞌeŋi ya, ka kaꞌ ye ti saꞌami yaa. Hale ne man nweꞌe nyoꞌog ka li gaad lin nar siꞌem la, m ku di nyan ne li yelaa. 9 M pu bood ye m niŋ ka li a wuu m bood ye m kpenꞌesi ya dabiem ne m gbana laa. 10 Sieba yet ye, “O gbana la kpiꞌemne ka tebis hale. Amaa o yaꞌa bee ti saꞌan o mor dabiem ka o pianꞌad kaꞌa gbin ne.” 11 Niŋkan daana baŋim ye lin ka ti yet gbana ni la, ti yaꞌa keenn ya saꞌan na, ala ka ti me na niŋ.

12 Ti ku yel ye ti a suꞌum wuu bane tenꞌes ye ba a suꞌum hale la, ka maki ti meŋ ne baa. Ba meŋ boodim gbanꞌe line a suꞌum ye ba niŋ, ka ba maki ba meŋ ne ban gbanꞌe siꞌem la, ka me maki ba meŋ ne ba taaba. Linzug ba kaꞌa yaꞌam. 13 Ka ti ku nweꞌe nyoꞌog ka li gaad Winaꞌam tisi ti siꞌem la benne, ka lee na nweꞌe nyoꞌog n zemis tuumkan ka o tisi ti la ben. Ka ti tuuma ya saꞌan la zemis on tisi ti la ben. 14 Ka lin sadigim a sida la, tiname daa a yiiga dim n keenn ya saꞌan na n mor Kiristo labasuŋ na la, ti daa pu gaadi one tisi ti siꞌel la ben ne. 15 Dinzugo ti pu nweꞌed nyoꞌog ne tuumbane ka sieba tum laa, line gaad Winaꞌam tisi ti siꞌem ben laa, ka lee mor potenꞌer ye ya yadda niŋir Winaꞌam ni na nobug ka ti na nyaŋe tum ya saꞌan ka li gaad tinam daa yiti tum siꞌem ya saꞌan la, ka li kpelim zemis ne Winaꞌam tisi ti siꞌem la ben. 16 Ka ti yuꞌun na mool labasuŋ la teens bane be ya tuon la ni, ka ku nweꞌe nyoꞌog ne tuumkan ka soꞌ deŋim tum o soꞌolim kan ka Winaꞌam tis o ye o tum la nii. 17 Li dolne lin da sob Winaꞌam gbauŋin siꞌem ye, “One bood ye o nweꞌe nyoꞌog on nweꞌem nyoꞌog ne lin ka Zugsob la niŋ la.” 18 Li kaꞌane niŋkane yel o meŋ suꞌum yela la a ninsuŋo, amaa li ane niŋkane ka Winaꞌam yel o suꞌum yela la a ninsuŋ.