1 M zuanoŋa, neꞌeŋa a m gbauŋ kane peꞌesi ayi ka m sobi tisi ya. Gbana ayi la ni ka m bood ye m tienn ya line ka ya deŋim baŋ la ka nie ya potenꞌer soma. 2 M bood ye ya tenr pianꞌaban ka Winaꞌam nodiꞌes soma da deŋim pianꞌa yumpokuda la, ne ti Zugsob one aa ti Faangid la noyelug kan ka o Tumtum bane ka o tum ya saꞌan la da pianꞌa la.

3 Ka yiiga line nar ka ya baŋ ane ye dunia naar saŋa la, zamdim na ti kena ka paꞌan dine dol ba meŋ yaꞌamleog boodim. 4 Ba na yel ye, “Yesu n daa yel noore ziꞌel ye o na leb na la be yaani? Hale ka ti yaanam ti kpi n ti paae saŋa nwa, siꞌel mekama kpelim nan ane ala wuu dunia pinꞌilugin da a siꞌem la.” 5 Ba maali ponꞌosim n tam ye li yi ne Winaꞌam pianꞌadin la ka o da maal saazug kudumin sa ka ke ka teŋ yi kuꞌomin ka lem ke ka kuꞌom maale li. 6 Ne kuꞌokan la ka dunia line da pun be sa la, ka li uak n saꞌami li. 7 Ka Winaꞌam kan ziꞌel noor ye dunia ne saazug line kpelim be la, gur ye bugum ti saꞌami li laꞌam ne tuumbeꞌed dim la.

8 M zuanoŋa, da tami yel sida kaŋaa, ye Winaꞌam potenꞌerin daar yinni wenne yuma tusir ne, ka yuma tusir me wen wuu daar yinni ne. 9 Winaꞌam pu bugis ne line ka o yeli ziꞌel wuu sieba tenꞌesid siꞌem laa, amaa o niŋidi ya ne suguru, ka pu bood ye soꞌ saꞌam, ka lee bood ye soꞌ mekama tiake o tuumbeꞌedin.

10 Ka Zugsob la ken daar la na wen wuu naꞌayiigi ken siꞌem la ne. Ka saazug na gaad naae ne vuud hale, ka bugum na kanb siꞌel wusa. Dunia ne bun line be li ni wusa me na dig zaalim.

11 Ka neꞌenam wusa sadigim na saꞌam la, li nar ka ya beilim na a wala? Asee ka ya pesigi ya meŋ n tis Winaꞌam ka doli o suer, 12 ka guri Winaꞌam ken daar la ka kpeꞌeŋi ya meŋ n tum ye li niŋ toꞌoto. Daakan la ka bugum na kanbi saꞌam saazug ne dine be dunia ni wusa. 13 Ka ti guri Winaꞌam n ziꞌel noor siꞌa la ye, “Saazug paal ne dunia paal na be, ka ani a popielim teŋ.”

14 M zuanoŋa, yaname sadigim guri neꞌenam yela la, kpeꞌeŋimi ya meŋ ka ya a nyain ka gbaꞌa siꞌa da be ya ni, ka bei ne Winaꞌam ne sumalisim, 15 ka geligid ye Zugsob la suguru diib ket ka ya nyet faangir. Ala men ka ti baꞌabinoŋir Paul daa sobi tisi ya line yi yaꞌam line ka Winaꞌam tis o la. 16 O sobidne ala o gbana la wusa ni. O sobir la ni ka o yel yelsieba, ka li toe ye ti baŋi li gbin, ka bane ziꞌ siꞌel la ne bane pu kpiꞌem ne ba yadda niŋirin la nweligi li ka li a ba saꞌuŋ, wenne ban niŋid siꞌem ne Winaꞌam gbana wusa la.

17 M zuanoŋa, yaname pun deŋim miꞌi li la, guꞌusimi ka tuumbeꞌed dim da ke ka ya yidig bee basi ya yadda niŋir laa. 18 Amaa ke ka Winaꞌam yelsum ne baŋir nobug ti Zugsob Yesu Kiristo one aa ti faangid la ni.

O yuꞌur na nye naꞌasi nannanna ne saŋa kane kaꞌ naare. Ami.