Winaꞌam Tumtumnib
TUUMA
1
Teofilus, m daa yel uf m yiiga gbauŋ la poogin Yesu n daa pinꞌili tum ka paꞌal nidib siꞌel la wusa, hale n ti paae daar kan ka Winaꞌam zaŋ o n du arazana ni la. O daa mor Winaꞌam Siig Suŋ la paŋ ka paꞌal Tumtumnib bane ka o daa gaŋ la ban na tum siꞌem. Ka Winaꞌam naan zank o n du arazana ni. Yesu namisug nyaꞌaŋ la dabisa piisnaasi poogin, ka o nie o meŋ n paꞌali ba la, ka tum tuumnyalima bedego line paꞌal ye o voe. Ka ban nye o la o tuꞌasi ba Winaꞌam naꞌam la yela. Ka ban laꞌas ne Yesu n dit la, ka o tisi ba noor ye, “Da yi Jerusalem nii, ka gur Winaꞌam Siig Suŋ one a o piini kan ka m da yel ziꞌel la. Ka Joon daa suudi ya ne kuꞌom. Amaa li ku yuuge ka man na suu ya ne Winaꞌam Siig Suŋ.”
Winaꞌam n daa zank Yesu n du arazana ni la yela
Ka tumtumnib la laꞌas taaba ne Yesu ka buꞌos ye, “Zugsoba, fu na lem lebis Israel dim naꞌam la nannanna n tisi ba?”
Ka Yesu yeli ba ye, “Ya baꞌa kaeꞌ ka ya baŋ saŋa ne dabisa ban ka m Baꞌ Winaꞌam da ziꞌel ne o meŋ paŋ la. Amaa ya na diꞌe paŋ, Winaꞌam Siig Suŋ la yaꞌa keenn ya saꞌan na, ka ya na tuꞌasi m yela Jerusalem ne Juuda ne Samaria ne dunia ben wusa.”
On tuꞌasi naae la ka ba gosid o, ka Winaꞌam zaŋ o n dut ka saŋgbana ligil o. 10 Ka ban nam kpelim gosid saa agol la, ka dapa ayi ye fupiela n ziꞌe ba saꞌan, 11 ka buꞌosi ba ye, “Galilee dima, bozug ka ya ziꞌe n gosid agole? Yesu one yi ya saꞌan n ken arazana ni la, o na ti leb na wuu yaname n nye o ka o keŋ siꞌem la.”
One n diꞌe Judas zinꞌig la yela
12 Ka o Tumtumnib la yi Olives Zuerin n leb Jerusalem. Li pu lal ne Jerusalem. 13 Ka ban paae Jerusalem la, ba du girimbiisa line a ba yir sigidirin. Ka bane daa be ani la daa a Piita ne Joon ne Jemes ne Andrew ne Filip ne Tomas ne Bartolomew ne Mateo ne Jemes one a Alfeus biig la ne Simon Zealot ne Judas one a Jemes biig, 14 bama wusa ne poꞌab ne Meeri Yesu ma ne Yesu pitib daa laꞌased ne taaba n sosid Winaꞌam ne ba yaꞌam wusa.
15 Ka dabisa bama ka yadda niŋidib la daa laꞌased taaba ka ba kal a wuu kobuga ne piisi. Ka Piita due n ziꞌe ba sisoogin n yel ye, 16 “M zuanama, li ane tilas Winaꞌam gbauŋ pianꞌad kan ka o Siig Suŋ da pun yel ka li yi naꞌab David noorin la lieb ameŋa ne Judas niŋ siꞌel la yela. 17 O daa gaad tuon n dol nidib bane keŋ n gbanꞌe Yesu la. O daa ane ti tumtum tiraan ka Winaꞌam gelig o laꞌas ne ti.”
18 (Dau kaŋa nwa daa daꞌ poog ne o tuumbeꞌed yood. O daa lu teŋin anina, ka o poor pusig, ka o nyood wusa yi. 19 Ka Jerusalem teŋ nidib la wusa n wum la, ba pud poog la yuꞌur ne ba pianꞌad ye Akeldama. Li gbin ane Ziim Poog.)
20 Ka Piita ye, “Li sobne Winaꞌam yuuma gbauŋin ye,
‘Kel ka o yir na yo damzuunr,
ka nidib ku lem be aninaa.’
Ka lem sob ye,
‘Kel ka soꞌ diꞌe o tuuma tum.’
21-22 “Alazugo li suꞌum ye nid yinni paꞌasi ti ni. O a one daa nye ti Zugsob Yesu kuꞌum vuꞌugir yela. Li suꞌum ka o ane one n daa pun bee ti saꞌan saŋa wusa ti Zugsob Yesu daa goond ne ti, lin pinꞌil ne Joon n daa suud nidib kuꞌom la, n ti paae saŋkan ka Yesu daa yi ti saꞌan n du arazana ni la.”
23 Ka ba yiis nidiba ayi. Ka ayinni yuꞌur buon Josef one ka ba lem buon ye Barsabas ka lem buon Justus. Ka ayinni la yuꞌur buon Mattias. 24 Ka ba sos Winaꞌam ye, “Ti Zugsoba, fun miꞌ ninsaalib poog. Paꞌalimi ti nidiba ayi nwa fun gaŋ soꞌ 25 ye o diꞌe Judas zinꞌig n tum tumtumnib la tuuma lin ka o bas ka keŋ o meŋ zinꞌigin la.” 26 Ka ba bugulim ka li lu Mattias zugin ka ba zaŋ o laꞌas Tumtumnib piina yinni la kalin.