1 Ka nintaŋ koor lin daa a Winsosug saŋa la, Piita ne Joon dol taaba waꞌae Winaꞌam puꞌusum yin. 2 Ka dau soꞌ be anina n a ponꞌor o biilimin sa. Ka daar wusa ba zeed o more kenne zinꞌin Winaꞌam puꞌusum yir zaꞌanoorin ka li buon Venlim zaꞌanoor. Ka o sosid nidib bane kpenꞌed Winaꞌam puꞌusum yin la. 3 On nye Piita ne Joon ka ba bood ye ba kpenꞌ la, o sosi ba ye ba tis o siꞌel. 4 Ka Piita ne Joon gos o kii, ka Piita yel o ye, “Gosimi ti.” 5 Ka o midig o nini goti ba, ka tenꞌesid ye ba na tis o siꞌel.

6 Ka Piita yel o ye, “M pu mor anzurifa bee salima na tis fo. Amaa m na tis uf man mor siꞌel. Ne Yesu Kiristo one yi Nazaret na yuꞌur, duom n keŋ.” 7 Ka Piita gbanꞌe ponꞌor la datiuŋ nuꞌug n zank o agol. Ka o noba la kpelim kpeꞌeŋ toꞌoto yim, 8 ka o due ziꞌe agol ka keŋ n doli ba kpenꞌ Winaꞌam puꞌusum yin n ianꞌasid ka pianꞌad n duꞌosid Winaꞌam yuꞌur suꞌuŋa. 9 Ka nidib wusa nye o ka o kene n duꞌosid Winaꞌam yuꞌur suꞌuŋa. 10 Ka ba miꞌ ye one yiti zinꞌi Winaꞌam puꞌusum yir zaꞌanoor kan buon Venlim zaꞌanoor la ni n sosid la. Ka ban nye line niŋ o la, ka li lidigi ba bedego.

11 Ka ban nye ponꞌor la mor laafe n dol Piita ne Joon la, ka li lidig nidib wusa ka ba zo n laꞌas taaba zinꞌikan daa buon Solomon zaꞌambeŋ la. 12 Ka Piita nye anwa la, ka buꞌos nidib la ye, “Israel dima, bo niŋ ka yelkaŋa nwa lidigi ya? Bee wala ka ya gosidi ti wenne ti meŋ paŋ ne ti tuumsuma zug n due dau nwa ka o kenna? 13 Li ane Winaꞌam on ka Abraham ne Isaak ne Jakob ne ti yaanam da puꞌusid la n duꞌos o Biig Yesu la yuꞌur. On la ka ya daa zaŋ o n niŋ bane soꞌe paŋ nuꞌusin ka zanꞌas o gomena Pilate tuon, hale baa Pilate n daa bood ye o bas o la. 14 Amaa ya daa zanꞌas ninsuŋ one a yelmeŋir dau la, ka lee daa bood ye Pilate bas niŋkuud la n tisi ya, 15 ka ku one soꞌe nyovur suer, on ka Winaꞌam vuꞌug kumin la. Tinam daa nyee li ka tuꞌasidi ya li yela. 16 Li ane yadda niŋir line be Yesu yuꞌurin ke ka dau kaŋa nwa kpeꞌeŋ la, wenne yanam nye la. Li ane yadda niŋir ne Yesu ka dau nwa nye laafe nyain ya wusa tuon nwa.

17 “M zuanam, nannanna m baŋ ye ya ziꞌilim la zug, ka yanam ne ya naꞌanam daa niŋi ala. 18 Lin ka Winaꞌam da pun deŋi yel ne o nodiꞌesidib noor la niŋ ameŋa ye asee ka Kiristo namis. 19 Dinzugo tiakem ya sunya ka leb Winaꞌam saꞌan na, ka o na yiisi ya tuumbeꞌed n bas, ka na tisi ya kpeꞌeŋir. 20 O tum Yesu one a Kiristo ka o pun gaŋ la n tisi ya. 21 O na be arazana ni hale n paae bun paala wusa maalug saŋa, wenne Winaꞌam da pun tuꞌas ne o nodiꞌesuma ka ba yel pinꞌilugin sa la. 22 Moses da yel ye, ‘Ya Zugsob Winaꞌam na gaŋ o nodiꞌes yinni ya buudi soogin wenne on daa gaŋ mam siꞌem la. Asee ka ya kelis bun lin wusa ka o na tuꞌasi ya. 23 Ka on wusa ku diꞌe Winaꞌam nodiꞌes kan noore, ba na saꞌam on daana n yiis o Winaꞌam nidib sisoogin.’

24 “Winaꞌam nodiꞌesidib bane da pianꞌ wusa, lin pinꞌil ne Samuel sa, ne ban da dol o nyaꞌaŋ la, ba bedego da pun tuꞌas dabisa bama yela. 25 Winaꞌam noziꞌelug line yi o nodiꞌesidibin na la, aa ya din. Ka ya laꞌam diꞌe nonakan ka Winaꞌam maal ne ya yaanam, on da yel Abraham ye, ‘Fu yaas la maꞌasim zug ka dunia buudi wusa na ti nye Winaꞌam yelsum.’ 26 Winaꞌam one vuꞌug o Biig kumin la, tum o ya saꞌan yiiga, ye o tisi ya yelsum, n fendigi ya wusa yinni yinni n yiisi ya tuumbeꞌed poogin.”