1 Ka Saul kpelim kpenꞌesid Zugsob nyaꞌandolib la dabiem ye o kuu ba, ka keŋ maalmaan kpeenm saꞌan 2 n bood ye maalmaan kpeenm la sob gbana n tis o ka o more keŋ Jew dim laꞌasug doodin line be Damaskus teŋin, ka o yaꞌa nye soꞌ ka o dol Yesu suer ka a dau bee poꞌa, on gbanꞌe o loo more o keŋ Jerusalem.

3 On be suer zug n ti liꞌel Damaskus la, ka neesim yi arazana ni na n nie nyain n gilig o. 4 Ka o lu teŋin, ka wum kukor ka li yel o ye, “Saul, Saul, bo ka fu namisidi ma?”

5 Ka Saul lebis ye, “Naa, fu a anoꞌone?”

Ka kukor la lebis yel ye, “M ane Yesu on ka fu namisid la. 6 Duom n kpenꞌ teŋ poogin la, ka fu na wum fun na niŋ siꞌem.”

7 Ka dap bane dol o la ziꞌe ka ku nyaŋe yaꞌae noor yel siꞌela, ka lee wum kukor, amaa ka pu nye soꞌo. 8 Ka Saul due n lak o nini ka pu tunꞌe nyet siꞌela. Ka ba veꞌ o n mor o keŋ Damaskus. 9 Dabisa atanꞌ ka o nini pu nyeta. Ka o me pu di diib bee nu siꞌela.

10 Ka nyaꞌandolib ayinni daa be Damaskus, ka o yuꞌur buon Ananias. Ka o nye siꞌel ka li wenne zaansuŋ ne, ka Zugsob la buol o ye, “Ananias.”

Ka o lebis ye, “Mane nwa, Zugsoba.”

11 Ka Zugsob la yel o ye, “Duom n dol suer lin ka ba buon sapi suer la, n keŋ Judas yin ka buꞌos dau kane yi Tarsus, ka o yuꞌur buon Saul la yela. Ka o be anina ka sosid Winaꞌam. 12 Ka o sosug la poogin ka o nye siꞌel ka li wenne zaansuŋ ne, ka dau kpenꞌe na n tik o ne nuꞌus, ye o nini la lak. O yuꞌur daa buon Ananias.”

13 Amaa ka Ananias lebis ye, “Zugsoba, m pun wum dau nwa yela bedego on tum Winaꞌam nidib beꞌed siꞌem Jerusalem ni. 14 Nannanna ka o diꞌe noor maalmaan kpeenmnam saꞌan ye o gbanꞌe ban wusa puꞌusid ne Zugsob yuꞌur la.”

15 Amaa ka Zugsob la yel Ananias ye, “Kem ka m gaŋ o ne ye o tum m tuuma n zaŋ m yuꞌur n keŋ nimbane kaꞌ Jew dim buudi la ni, ne naꞌanam ne Israel yaas saꞌan. 16 Mam meŋ na paꞌal o, one na namis siꞌem Zugsob la yuꞌur zug.”

17 Ka Ananias keŋ n kpenꞌ yin la ka tik Saul ne o nuꞌus n yel o ye, “M baꞌabiig Saul, Zugsob Yesu one nie o meŋ n paꞌal uf suer kan ni ka fu yi na la, one tum man fu saꞌan na ye fu nini la lak, ka Winaꞌam Siig Suŋ la peꞌel uf.” 18 Ka siꞌel line wenne paꞌad kpelim yi Saul nini la ni. Ka o nini lak ka o nyet. Ka o due diꞌe Winaꞌam kuꞌom suub, 19 ka di diib ka o paŋ leb na.

Saul daa kpelim ne nyaꞌandolib la dabisa biꞌela Damaskus teŋin. 20 Ka li pu yuuge ka o kpenꞌ laꞌasug doodin la n moon n yet ye, Yesu ane Winaꞌam Biig. 21 Ka li lidig bane wumi li la wusa. Ka ba yel ye, “Kaꞌa dau kaŋa nwa daa be Jerusalem ni n kpeꞌeŋidi o meŋ n namisid nimbane puꞌusid ne yuꞌur kaŋa nwa laa? Lin yela ka o kenn kpela na ye o gbanꞌe ba lo n more ba keŋ maalmaan kpeenmnam saꞌan.”

22 Amaa ka Saul kpelim paasid ne paŋ, ka nyaŋ Jew dim bane be Damaskus la n nie paꞌali ba ye, Yesu la a Kiristo.

23 Ka dabisa bedego n gaad la ka Jew dim gbanꞌe noor yinni ye ba kuu o. 24 Ka Saul daa baŋ ban gbanꞌe ye ba niŋ siꞌem la. Ba daa gur teŋ la yaŋa ni nintaŋ ne yuꞌuŋ ye ba kuu o. 25 Amaa o nyaꞌandolib la daa zaŋ o yuꞌuŋ n ke ka o zinꞌin peogin n sigis o zaŋguom zug.

26 Ka o daa paae Jerusalem ni la n bood ye o laꞌas ne nyaꞌandolib la. Amaa ba daa zot o dabiem, ban daa pu niŋ o yadda ye o ane nyaꞌandol la zug. 27 Amaa ka Barnabas zaŋ Saul n mor o keŋ Tumtumnib la saꞌan n paꞌali ba Saul daa nye Zugsob la sueren, ka Zugsob la tuꞌas o siꞌem, ne Saul daa mool Yesu yela la ne sukpiꞌeuŋ Damaskus teŋin siꞌem. 28 Ka Saul daa be ne ba Jerusalem ni, ka yiti goond, 29 ka moon Zugsob Yesu yela ne sukpiꞌeuŋ ka tuꞌas ka nwaꞌas nonwaꞌar ne Jew dim bane wum Greek pianꞌad la. Ka ba bood ye ba kuu o. 30 Ka yadda niŋidib la baŋ li yela ka mor o n keŋ Sizerea teŋin n ke ka o yi keŋ Tarsus teŋin.

31 Ka yadda niŋidib la wusa bane be Juuda ne Galilee ne Samaria daa mor sumalisim. Ka ba kal paasid. Ka ba yadda niŋir nobugid. Ka ba naꞌasid Zugsob la ne ba sunya wusa. Ka Winaꞌam Siig Suŋ suŋidi ba.

32 Ka Piita daa goond zinꞌig zinꞌig ba soogin la, ka saŋa siꞌa ka o keŋ Winaꞌam nidib bane be Lidda teŋin la ni. 33 Anina ka o nye dau ka o yuꞌur buon Aeneas. Ka o benꞌ n ponꞌolim digi yuma anii. 34 Ka Piita yel o ye, “Aeneas, Yesu Kiristo tis uf laafe. Duom n maal fu digisig la digil.” Ka o due yimmo. 35 Ka ban wusa be Lidda ne Saron teensin la nye o la, ba noki ba meŋ n tis Zugsob la.

36 Ka nyaꞌandolib la yinni be Joppa ni, ka o yuꞌur buon Tabita. Li gbin ane Dorkas bee Molif. Ka o a tuumsuma daan, ka suŋid noŋ dim. 37 Ka saŋkan la ka o lu banꞌas n kpi. Ka ba su o n zaŋ o du n digil girimbiisa doogin. 38 Joppa daa pu lal ne Lidda. Ka nyaꞌandolib la wum ye Piita be anina la ka tum nidiba ayi ye ba buol o na, ye o da yuuge ka kena.

39 Ka Piita due n doli ba keŋ. Ka ba paae n mor o du girimbiisa la ni. Ka pokonya la wusa ziꞌe kpiꞌe ne Piita ka kum kuur ka paꞌan fuud ban ka Dorkas daa maal n tisi ba on daa be ne ba la.

40 Amaa Piita daa yiisi ba wusa yiŋ, ka igin n sos Winaꞌam ka yel kpiꞌim la ye, “Tabita, duom.” Ka o lak o nini n nye Piita ka due n zinꞌin. 41 Ka Piita gbanꞌe o nuꞌug n due o n ziꞌel, ka buol yadda niŋidib ne pokonya bane niŋ yadda la n zaŋ o tisi ba. Ka o voe. 42 Ka Joppa teŋ dim wusa daa wum yelkaŋa nwa la, ka ba bedego niŋ Zugsob la yadda. 43 Ka Piita daa kpelim Joppa teŋin la dabisa bedego. O daa bene Simon on a gbanzab la yin.