15
Jerusalem ni laꞌasug la yela
1 Ka nidib sieba yi Juuda teŋin n sig na n paꞌan yadda niŋidib la ye, “Ya yaꞌa pu kpenꞌe baŋo wuu Moses wada la paꞌan siꞌem laa, ya ku nyaŋe paam faangire.” 2 Ka Paul ne Barnabas daa nwaꞌas nonwaꞌar hale ne ba, dinzug ka ba gaŋ Paul ne Barnabas ne yadda niŋidib sieba ye ba keŋ Winaꞌam Tumtumnib la ne yadda niŋidib kpeenmnam bane be Jerusalem la saꞌan n buꞌosi ba nonwaꞌar kaŋa yela. 3 Ka yadda niŋidib la yiisi ba tum, ka ba doli yi Fonisia ne Samaria teŋin n yet nidib bane kaꞌ Jew dim la tiaker la yela. Ka li niŋ sumalisim hale n tis Fonisia ne Samaria yadda niŋidib la. 4 Ka ban paae Jerusalem la, ka yadda niŋidib la ne Winaꞌam Tumtumnib la ne ba kpeenmnam wusa diꞌe ba. Ka ba tuꞌas Winaꞌam maal siꞌel wusa ne ba.
5 Ka yadda niŋidib bane a Farisee dim due ziꞌen ka yel ye, “Asee ka ba kpenꞌe baŋo, ka ti zamis ba, ka ba siak Moses wada la.”
6 Ka Winaꞌam Tumtumnib ne yadda niŋidib la kpeenmnam laꞌas ye ba gbanꞌe yel kaŋa nwa gbin. 7 Ka nogban nwaꞌar la yuꞌun galis la, ka Piita due ziꞌen ka yeli ba ye, “M zuanama, ya miꞌ ye pinꞌilugin saŋa ka Winaꞌam daa gaŋ mam ya ni, ye m tuꞌasi o labasuŋ la n tis bane kaꞌ Jew dim la ka ba wum ka siak. 8 Ka Winaꞌam one miꞌ saalib potenda daa tisi ba o meŋ Siig Suŋ la wenne on daa tis tinam siꞌem la n paꞌali ti ye ba siak o noor. 9 Bakir daa kaꞌa tinam ne ban soogin ne. Ba daa niŋ Winaꞌam yadda ka o yiisi ba tuumbeꞌed n bas. 10 Bo ka ya makid Winaꞌam ka tisid o nyaꞌandolib malimkpiꞌema lin ka tinam ne ti yaanam daa pu nyaŋe maale? 11 Tinam siakiya ye tinam na paam faangir ne ti Zugsob Yesu popielim poogin, wenne lin na niŋ bane kaꞌ Jew dim siꞌem la.”
12 Ka nidib la wusa a baanlim, ka kelis Barnabas ne Paul n tuꞌasid tuumnyalima ban ka Winaꞌam tum buudi buudi saꞌan ne ba. 13 Ka ban n pianꞌ naae la, ka Jemes yel ye, “M zuanama, kelisimi. 14 Simon Piita yel n tienn ti Winaꞌam n daa deŋi paꞌali ye o bood ye o tis bane kaꞌ Jew dim la yelsum, n gaŋ nidib ba saꞌan ka ba lieb o nidib. 15 Yel bama nwa dolne Winaꞌam nodiꞌesidib n sob siꞌem la ye,
16 ‘Zugsob la yel ye,
“Neꞌeŋa nyaꞌaŋ m na leb na
n tis tadimnam bane a David yaas la paŋ ye,
17 nidib na ie m,
buudi ban wusa ka m gaŋ ye ba aa m nidib la ne nidib wusa.”
18 Zugsob la maal bun bama n yel ye o ke ka ba baŋ li wusa kudimin sa.’
19 “Alazug mam potenꞌer ane ye ti da daam bane kaꞌ Jew dim buudi ka fendigi keenn Winaꞌam saꞌan la naa, 20 amaa ka lee sob gbauŋ n yeli ba ye ba da di baꞌar diibo ka li kaꞌ nyainee. Ka dap ne poꞌab da saꞌam taaba. Ka da onb bunkonbid bane ka ba sianki kuu, ne niꞌim kane nam mor ziim. 21 Kudimin sa ka ba mool Moses paꞌalug teens wusa ni ka karem o sob la laꞌasug doodin, vuꞌusum daar wusa.”
22 Ka Winaꞌam Tumtumnib ne yadda niŋidib wusa ne ba kpeenmnam tenꞌes ye li a suꞌum ka ba gaŋ nidib ba soogin n tumi ba Antiok teŋin laꞌam ne Paul ne Barnabas. Ka ba gaŋ Judas one ka ba me buon Barsabas la ne Silas, nimbane ka yadda niŋidib la naꞌasidi ba, 23 ka sob gbauŋ n tisi ba ye ba more n keŋ Antiok teŋin.
Gbauŋ kane ka Jerusalem kpeenmnam daa sob la nwa
Ka gbauŋ la yel ye,
Tinam bane a Winaꞌam Tumtumnib ne yadda niŋidib la kpeenmnam puꞌusid yadda niŋidib bane kaꞌ Jew dim buudi, ka be Antiok teŋin ne Siriya ne Silisia teensin la.
24 Ti wumya ye ninsieba yi ti saꞌan na n daami ya ne pianꞌad bane fendigidi ya yaꞌam, ka ti pu tisi ba noore. 25 Alazug ka ti laꞌas taaba n gbanꞌe noor yinni n tenꞌes ye li a suꞌum ka ti gaŋ ninsieba n tumi ba ya saꞌan na. Ban ne ti zuanam Paul ne Barnabas na laꞌam kena, 26 nimbane nyovur n daa be toog ni ti Zugsob Yesu Kiristo la zug. 27 Dinzug ka ti tum Judas ne Silas ye ba meŋ yeli ya bun kan la ne ba noya. 28 Li a suꞌum n tis Winaꞌam Siig Suŋ la ne tinam ka ti da ziꞌeli ya yela n gaad line nara. 29 Ya da di baꞌar diibo, ka da onb niꞌim kane nam mor ziim ne bunkonbid bane ka ba sianki kuu, ka dap ne poꞌab da saꞌam taabaa. Ya yaꞌa pu tum yel bamaa, ya na tum tuumsuma.
Winaꞌam na tisi ya yelsum.
30 Ban daa yiisi ba tum la, ka ba kenn sig Antiok teŋin n laꞌas yadda niŋidib la, ka nok gbauŋ la n tisi ba. 31 Ka ba karem gbauŋ la ka li niŋi ba sumalisim bedego ne ban yel siꞌem n kpeꞌeŋidi ba la zug. 32 Ka Judas ne Silas ban me daa a Winaꞌam nodiꞌesidib la, pianꞌ hale n kpemis yadda niŋidib la. 33 Ka zinꞌin ne yadda niŋidib la yuug biꞌela ka ba nyaan keꞌesi ba ne sumalisim. Ka ba leb bane daa tumi ba la saꞌan. 34 Ka Silas gbanꞌe ye o kpelim anina. 35 Ka Paul ne Barnabas me kpelim anina ka ban ne paꞌanib bedego bane be anina la paꞌan ka moon Zugsob pianꞌad la.
Paul ne Barnabas bakir la yela
36 Ka dabisa biꞌela nyaꞌaŋ ka Paul yel Barnabas ye ba lem n kaae yadda niŋidib teens bane wusa ni ka ba daa mool Zugsob pianꞌad la n gos ban a siꞌem. 37 Ka Barnabas daa bood ye o dol Joon on yuꞌure buon Maak la ka ba laꞌam keŋ. 38 Amaa ka Paul tenꞌes ye li kaꞌa suꞌum ka ba dol one daa zo ka basi ba Pamfilia teŋin ka pu doli ba tum la. 39 Ka ba nwaꞌas taaba pudug konꞌob konꞌob. Ka Barnabas nok Maak ka ba kpenꞌ aaruŋ n keŋ Saipuros teŋin. 40 Ka Paul gaŋ Silas. Ka yadda niŋidib la sos Winaꞌam n tisi ba ye o guri ba ne o yelsum. 41 Ka ba keŋ n yi Siriya ne Silisia teensin n kpemisid yadda niŋidib la sunya.