1 Ba daa gaad Amfipolis ne Apolonia teensin n kenn Tesalonika teŋin na, zinꞌikan ka Jew dim laꞌasug doog daa be. 2 Ka Paul daa kpenꞌ anina vuꞌusum daarnam atanꞌ, wuu on yiti maan siꞌem la, ka tuꞌad ne ba dine be Winaꞌam gbauŋin 3 n bigisidi ba li gbin nyain ye li daa a tilas ye Kiristo namis ka vuꞌug kumin, ka yet ye, “Yesu on ka m mooni o yela tisidi ya la a Kiristo la.” 4 Ka sieba daa siaki dol Paul ne Silas laꞌam ne Greek dim nidib bedego bane puꞌusid Winaꞌam laꞌam ne poꞌab bedego bane a tuon gatib la.

5 Amaa ka Jew dim benꞌ fufum ka buol bugusum dim sieba bane be daꞌan n kaꞌa tuuma la. Ka ba laꞌas n a bedego ka maal tukpeedug n keŋ gilig Jason yir n ied Paul ne Silas ye ba more ba yi nidibin la na. 6 Ka ba pu nyaŋe nyee ba ka gbanꞌe Jason ne yadda niŋidib sieba n more ba keŋ teŋin kpiꞌemnam saꞌan ka tans ye, “Nimbama nwa bo yela n daam dunia wusa. Ka nannanna ba kenn ti teŋin na, 7 ka Jason diꞌe ba. Ba wusa kiꞌisid Room naꞌab wada ka yet ye, naꞌasoꞌ lem be, ka ba buon o Yesu.” 8 Ka ban wum neꞌeŋa la ka li zab nidib la ne teŋin kpiꞌemnam la. 9 Ka ba diꞌe ligidi Jason ne bane dol o la saꞌan, line ka ba na lebisi tisi ba, ba yaꞌa ti nye ka ba pu kpenꞌ yelsiꞌa ni yaꞌase, ka basi ba ka ba keŋ.

10 Ka yuꞌuŋ sob ka yadda niŋidib la yiis Paul ne Silas ka ba keŋ Berea teŋin. Ka ba paae anina n keŋ kpenꞌ Jew dim laꞌasug doogin. 11 Ka Jew dim bama potenda nie gaad Jew dim bane be Tesalonika teŋin la. Ka ba diꞌe pianꞌad la ne ba yaꞌam boodim, ka karem Winaꞌam gbauŋ la n zamisid daar wusa ye ba gos ye Paul n tuꞌasidi ba siꞌel la a sida bee li kaꞌ sida. 12 Ka Jew dim bedego niŋ yadda laꞌam ne Greek dim poꞌab bane mor yuꞌur nidibin ne dap bedego.

13 Ka Jew dim bane be Tesalonika teŋin la wum ye Paul moon Winaꞌam pianꞌad Berea teŋin la, ka ba keŋ anina daam nidib ka ke ka ba sunya pelig ne Paul ne Silas. 14 Ka yadda niŋidib la kpelim ke ka Paul keŋ ateuk gbeug. Amaa ka Silas ne Timoti kpelim anina. 15 Ka bane biel Paul la mor o paae Atens teŋin la ka lebid ka Paul tolimi ba ye ba yaꞌa paae ban yel Silas ne Timoti ye ba kenn nannanna na.

16 Ka Paul daa guri ba Atens teŋin la ka nye ka teŋ la peꞌel ne wina ne baꞌa. Ka o sunf pelig. 17 Ka o keŋ Jew dim laꞌasug doogin tuꞌasid Jew dim ne bane kaꞌ Jew dim ka puꞌusid Winaꞌam wenne ban la, ka tuꞌasid laꞌam ne daꞌan, daar wusa. 18 Ka nimbane zamis yaꞌam hale ka ba buoni ba Epikurea dim ne Stoik dim, nye o. Ka sieba buꞌos ye, “Bo ka yalim kaŋa nwa bood ye o yele?” Ka sieba yel ye, “Ti wum ye one moon win paala la suer yela ka paꞌan Yesu yela, ne kuꞌum vuꞌugir la yela men.” 19 Ka ba mor o keŋ Areopagus zinꞌig kan ba laꞌas nidib na, ka yel ye, “Kel ka ti baŋ paꞌalsaaŋ kan ka fu tuꞌasid la; 20 ka yel bama nwa ane yelsaaŋ n tisi ti ka ti bood ye ti baŋi li gbin.” 21 Ka Atens dim ne saam bane zinꞌi anina bood ye ba tuꞌas yelpaala bee ka me wum yelpaala saŋa wusa.

22 Ka Paul due ziꞌen Areopagus laꞌasug la tuon ka yel ye, “Atens nidiba, m baŋ ye ya siꞌel mekama wusa ni ya dol baꞌa maalug yela suꞌuŋa. 23 Man giligi ya teŋ la ka gos zinꞌis ban ni ka ya puꞌusid la, m nye ya puꞌusum maluŋ zinꞌig ka li sob anina ye, ‘WINAꞌAM KANE KA TI ZIꞌ LA.’ Lin ka ya puꞌusid ka laꞌam ziꞌ la, lin ka m yuꞌun mooni tisidi ya.

24 “Winaꞌam one maal dunia ne line be li ni wusa, ka soꞌe saazug ne teŋ wusa la, pu zinꞌi dood bane ka ninsaalib me maꞌaa nii. 25 Laꞌam ne lin wusa ka ninsaal tum tis o pu paꞌalne ye siꞌel pasig oo. O meŋ mor nyovur ne vuꞌusum ne siꞌel mekama zanꞌasa n tisid nidib wusa. 26 Nid yinni la ni ka o maal nidib buudi wusa n ke ka ba be dunia ni wusa. O meŋ mak saŋkan ne zinꞌis ban ni ka ba na zinꞌin. 27 O tum neꞌeŋa ye ba ie o zinꞌig, ka daasiꞌere ba na nye o. Amaa o pu lal ne tii. 28 O ni ka ti be ka vuꞌusid ka ken wenne yanam Atens solima dim sieba n daa yel ye, ‘Tinam me ane o biis.’

29 “Tiname sagidim aa o biis la, ti da tenꞌes ye Winaꞌam beilim wenne wuu baꞌa ban ka ninsaal nok salima bee anzurifa bee kuga, n tenꞌesi maal ne o nuꞌuse. 30 Winaꞌam da pu mugus ninsaalib saŋkan ka ba da ziꞌ on a siꞌem la. Amaa nannanna o tis noor zinꞌis mekama ni wusa ye nidib wusa tiake ba tuumbeꞌed sueya ni; 31 ka o mak dabiskan ka o na ke ka nid kan ka o daa gaŋ la kad dunia nidib wusa saria ne asida. O paꞌal neꞌenam nyain n tis soꞌ wusa on vuꞌug nid kan kumin la zug.”

32 Ban wum ye Paul pianꞌad kuꞌum vuꞌugir yela la, ka sieba laꞌ o. Amaa ka sieba yel ye, “Ti bood ye ti wum ka o lem pianꞌa pianꞌakaŋa yaꞌas.” 33 Ka Paul yi ba saꞌan. 34 Ka ninsieba laꞌas o ni n niŋ yadda. Dionisius one a Areopagus laꞌasug nid la daa be ba soogin, ne poꞌa ka o yuꞌur daa buon Damaris, laꞌam ne ninsieba.