4
Kiristo niŋgbina a yinni siꞌem la yela
1 Mam one a sarega nid Zugsob la yela sosidi ya ye ya dol suer line nar ne Winaꞌam gaŋi ya la. 2 Li a suꞌum ka ya sie ya meŋ ka a baanlim ka mor suguru ne sumbugusum line yi noŋirin, 3 ka kpeꞌeŋi ya meŋ ka mor noor yinni line yi Winaꞌam Siig Suŋin na la, ka more li ne sumbugusum ka li laꞌasedi ya gumm. 4 Niŋgbiŋ yinni be, ka Winaꞌam Siig Suŋ yinni maꞌaa be. Ka Winaꞌam buoli ya ye ya mor tiꞌir yinni. 5 Ka Zugsob yinni be, ne yadda yinni ne kuꞌom suub yinni 6 ne Winaꞌam yinni one a ti wusa Baꞌ, one gat siꞌel wusa, ka o paŋ be ti ni n tum, ka o lem be ti wusa ni la.
7 Ka ti wusa yinni yinni diꞌe popielim piini line dol Kiristo boodim la. 8 Dinzug ka li sob Winaꞌam gbauŋin ye,
“On daa du agol la,
o daa more bane ka o nyaŋe la keŋ,
ka tis nidib piini.”
9 Line sob ye, “O du agol la” gbin a bo? Li ane ye o daa deŋim sig na hale n ti paae dunia teŋir. 10 Ka on kane sig na la a one me du agola sa, gaad dunia ne saazug wusa ye o be bun wusa wusa ni la. 11 Ka o meŋ tisi ti piinsieba ye sieba liebi o Tumtumnib, ka sieba a o nodiꞌesidib, ka sieba a labasuŋ la moon moonib, ka sieba a bane gur Winaꞌam nidib, ka sieba a paꞌanib. 12 Ka ba tiꞌeb Winaꞌam nidib ka ba na tum n suŋi taaba, ka Kiristo niŋgbiŋ line a o nidib la nobug 13 n ti paae saŋkan ka ti wusa mor noor yinni line doli ti noor siakir ne tiname baŋ Winaꞌam Biig la yela. Ka ti biꞌ naae, n ti paae wuu Kiristo zemis siꞌem la.
14 Ka ti lem kaꞌ biis bane kaꞌ yaꞌam, ka dol damaꞌanam paꞌala line yi bibiꞌelnam yaꞌamin, wuu siꞌel ka sisiꞌem daꞌadi li n tuulum siꞌem laa. 15 Amaa lee more noŋir ka pianꞌami sida tis taaba ye ti nobug yela wusa ni n ti paae Kiristo 16 one wenne zug line ke ka niŋgbiŋ la wusa laꞌase toꞌoŋ taaba ne li duta wusa la. Ka li yinni yinni yaꞌa niŋid line nar, niŋgbiŋ la wusa nobugidne suꞌuŋa, ka li yine noŋirin na ka li biꞌid.
Ti beilim paal la yela
17 Dinzug ka m mudigidi saꞌani ya ye ya da lem niŋid wuu bane kaꞌ Winaꞌam nidibi niŋid siꞌem ne ba yaꞌam line pu dol suer la. 18 Ba potenda pu nie, ka ba pu paꞌas nyovur kan ka Winaꞌam tisid laa, ba ziꞌilim ne ba kpaana la zug. 19 Ka ba sunya digilim ka ba baꞌa kaeꞌ ne nyan ne, ka bood tuumyood hale ne li buudi wusa.
20 Li kaꞌ ala ka ya zamis Kiristo yelaa. 21 Yaname sadigim wumi o yela ka zamis yelsida o saꞌan line be o ni la, 22 basimi yaname da a siꞌem ya beilim kudirin line ke ka damaꞌam yaꞌamleog ke ka ya saꞌam la, 23 ka tiake ya potenda boodim ka li lieb bunpaala. 24 Keli ka ya beilim ae bunpaala line ka Winaꞌam maal ka li wen o la, ka yaname niŋid siꞌel a sida ne popielim line dol Winaꞌam suer.
25 Dinzugo, basimi damaꞌam ka ya wusa pianꞌad a sida n tisid ya kpiꞌes; ka ti laꞌase a niŋgbiŋ yinni ne taaba. 26 Da ke ka ya supeen ke ka ya tum tuumbeꞌede, ka me da ke ka zaam maꞌae ka ya kpen mor supeen ne. 27 Da tisi sutaana suer ka o daami yaa. 28 One daa zuud on da lem zuud yaꞌase, amaa li suꞌum ye o tum ka nye o meŋ nuꞌug tuuma bun, ka na tunꞌe suŋ noŋ dim.
29 Da ke ka ya noya pianꞌad beꞌede, amaa keli ka li yitne pianꞌa suꞌuŋa, ka li suŋ bane kelisid la, ka ba biꞌ ba beilim puugin. 30 Da niŋi line na ke ka Winaꞌam Siig Suŋ la sunf saꞌam ne yaa, bozugo one deŋi zanbili ya n guri daar kan ka o na tisi ya yolisim wusa la. 31 Basimi sutoog ne supeen ne endug ne noŋgban nwaꞌar, ne yuꞌusaꞌuŋ ne potenꞌebeꞌed wusa, 32 ka suŋidi taaba ne nimbaanlzoor ka tis taaba suguru wen wuu Winaꞌam niŋ siꞌem ne Kiristo ka yiis ti tuumbeꞌed n bas la.