1 Biise, siakimini ya duꞌadib noya, Zugsob la ni, ka lina dol suer. 2 Winaꞌam noyelug yiiga line mor noziꞌelug la ane ye, “Naꞌasimi fu baꞌ ne fu ma, 3 ka fu na a suꞌum, ka fu nyovur waꞌam dunia ni.”

4 Saamnama, da ke ya biis sunya pelig ne saꞌala galisugo, ka lee ugusini ba ne saꞌalug ne zamisug line dol Zugsob la suer.

5 Yamise, siakimini ya dunia nwa ni zugsobnam noya ne naꞌasi zotim ne sunf yinni, wuu ba ane Kiristo ne. 6 Li kaꞌane ban na be ne ya gullimnee ye ba tenꞌes ye ya a suꞌum, amaa niŋimi wuu ya ane Kiristo yamis ka tum Winaꞌam boodim ne ya sunya wusa. 7 Tumi ya tuuma ne sumalisim wuu ya tumne tisid Zugsob la ka kaꞌ nidiba, 8 ka more potenꞌer ye one tum tuumsuŋ mekama na di li nyood Zugsob Kiristo la saꞌan, o yaꞌa a yamug bee o kaꞌ yamuga.

9 Yanam zugsobnama, niŋimini ala mene n tisidi ba, ka da mugusidi baa, ka more potenꞌer ye yanam ne ban wusa mor Zugsob yinni arazana ni, one pu mor baragaŋa.

10 Line kpelim ane ye, ya mor sukpiꞌem Zugsob la ni laꞌam ne o paŋ titaꞌar la. 11 Yeemi Winaꞌam zaba laꞌad la wusa ka ya na nyaŋe ziꞌe kiŋkiŋ, ka Sutaana bibiꞌelim yaꞌam da nyaŋe lubi yaa. 12 Ka ti pu zabid ne saaliba, amaa ti zabid ne siisbeꞌednam kpiꞌemnam bane a paŋ dim naꞌanam bane soꞌe dunia line a lik tuumbeꞌed yela la, ne siisbeꞌednam wusa bane be saazug. 13 Dinzugo, nokimi Winaꞌam zaba laꞌad la wusa bobig wuu Room dim sogianami niŋid siꞌem la, ka dabis beꞌug yaꞌa kena ya na nyaŋe ya dataas. Ka zaba la yaꞌa ti naae ya na kpelim ziꞌe ya ziꞌa ni kiŋkiŋ.

14 Dinzugo, tiꞌebim ziꞌe ka nok sida n lo wuu sialoodiŋ ne, ka bobigi popielim wuu gbauŋ tiꞌedugu lusi nyoꞌog. 15 Ka pid taꞌada n tiꞌebi keŋ mool sumalisim labasuŋ la. 16 Ka line lem paꞌas ane ye, zanli lusub bun nuꞌusin line a yadda ka na tunꞌe kpiis pima line dit wenne bugum pielim, lin ka Sutaana toond la. 17 Ka pidi kunt zugpibis line a faangir, ka noki Winaꞌam Siig Suŋ zaba suꞌug line a Winaꞌam pianꞌad la. 18 Niŋimi neꞌenam ka dol Siig Suŋ la sosid Winaꞌam suŋir suꞌuŋa saŋa wusa. Kpelim sosid Winaꞌam n tis nidib wusa, 19 ka me sos Winaꞌam tis man, ye Winaꞌam na ke ka m nyaŋe pianꞌ suꞌuŋa ne paŋ n ke ka labasuŋ line suaꞌa la nie. 20 Labaar la yela ka m liebi li tumtum ka ba loo m ne bana. Sosim Winaꞌam ye m na tunꞌe paꞌali li ne paŋ wuu lin suꞌum ye m pianꞌan siꞌem la.

21 Tikikus one aa ti baꞌabinoŋir ne Zugsob sida suŋid la na yeli ya m yela wusa, ka ya na baŋ line maan ne m, laꞌam ne m tuuma wusa a siꞌem. 22 Lin yela ka m tum o ya saꞌan na ye ya baŋi ti yela la ka ya sunya kpeꞌeŋ.

23 Winaꞌam one a ti Baꞌ la ne ti Zugsob Yesu Kiristo na tisi ti baꞌabiis la wusa noŋir ne sumalisim ne yadda niŋir. 24 Yelsum na be ne bane noŋi ti Zugsob Yesu Kiristo ne noŋir line kaꞌ benne.