HIBIRU DIM
n diꞌe gbauŋ siꞌa la nwa
1
Winaꞌam pianꞌadi yuꞌun yit o Biig saꞌan la yela
1 Winaꞌam da ke ka o nodiꞌesidib pianꞌade o yela kudumin tisidi ti yaanam saŋa bedego ne sueya konꞌob konꞌob bedego. 2 Amaa tinam saŋa nwa, Winaꞌam pianꞌad tisidi ti yiti o Biig la saꞌan, one ka o gaŋ o ye o soꞌe siꞌel wusa la, ka li yine o saꞌan na ka Winaꞌam maal dunia ne line be saŋgbauŋin la wusa. 3 O Biig la nyeene ne Winaꞌam naꞌam la paŋ, ka Winaꞌam a siꞌem la, o me ane ala. Ka li yine o pianꞌad line mor paŋ la ni ka o gosid bun wusa. Ka on pie ninsaal tuumbeꞌed la, ka yuꞌun zinꞌi Winaꞌam one a kpiꞌeuŋ sob n gat siꞌel wusa la datiuŋ.
Winaꞌam Biigi gat maleknam siꞌem la yela
4 Winaꞌam duꞌos o ka o gat maleknam. Ka yuꞌur kan ka o diꞌe la gat maleknam yuda.
5 Ka Winaꞌam nan ziꞌ yel malek ye,
“Fune a m Biig, ka zina ka m liebi fu Baꞌ.”
Ka me pu yel malek ye,
“Mane na a fu Baꞌ ka fun na a m Biiga.”
6 Ka on tumi o bikpeŋ dunia ni na la, o lem yel ye,
“Kel ka Winaꞌam maleknam wusa naꞌas o.”
7 Ka yel maleknam bane aa o tumtumnib la yela ye,
“O ke ka o maleknam la a wuu pebisim ne,
ka o tumtumnib la me a wuu bugum zilima ne.”
8 Amaa o Biig la yela, o yel ye,
“Winaꞌam, fu naꞌam gbauŋ la na be saŋa line kaꞌ benne.
Ka zanli fu naꞌam duor ne popielim.
9 Fu noŋ yelsida,
ka kis line a ziri.
Dinzug ka Winaꞌam, one aa fu Winaꞌam la,
zaŋ kpaam line a sumalisim suenn uf
ka fu gaadi fu taaba.”
10 Ka lem ye,
“Zugsoba, fune maal dunia pinꞌilugin,
ka saazug wusa ane fu nuꞌug tuuma.
11 Li wusa na saꞌam,
ka kudig wuu fuugi kudigid siꞌem la,
amaa fun na kpelim be.
12 Fu na kpilimi li wuu kparib ne,
ka tiake a bunpaal.
Amaa fu pu tiakeda,
ka fu yuma ku mor benne.”
13 Ka malek kane ka Winaꞌam da yel o ye,
“Zinꞌinim m datiuŋ,
ka m ti ke ka fu no fu dataas ne noba?”
14 Ka maleknam a bo? Ba ane siis ne, ka tumne tisid Winaꞌam. Ka o tumi ba ye ba suŋ bane na ti paam faangir la.