1 Dinzugo Kiristo paꞌalug kan ka ti daa zamis pinꞌilugin la, ti basimi tiname da a siꞌem pinꞌilugin la, ka niŋ Winaꞌam yadda, ka keŋ tuon n nobug ka da kpelim wenne ti pinꞌilne n bood ye ti paam tiaker ti tuumbeꞌed yela laa. Ka da kpelim be tuum kane taꞌasid kuꞌum laa. 2 Ne kuꞌom suub paꞌalug ne nok nuꞌus paal nidib zutin yela, ne kuꞌum vuꞌugir yela, ne sariakadib yela line ka li saŋa kaꞌ ben la yela. 3 Winaꞌam yaꞌa siak, ti na niŋ ala.

4 Ka bane da wum Winaꞌam labasuŋ ka baŋi li, ka nye o piini, ka diꞌe o Siig Suŋ, 5 ba miꞌ Winaꞌam labaar yelsum ne tuumkpiꞌema paŋ line na ti kena la, 6 ba yadda yaꞌa lu, ba ku nyaŋe len leb na n tiake bas ba tuumbeꞌed la yaꞌase, bozugo ba na lem kpaꞌ Winaꞌam Biig la kuꞌum dapuudir zug ka diis o nyan nidib soogin.

7 Teŋ kane diꞌed sakuꞌom line niid bedego la, teŋ kan duꞌadi biis tisid kpaadib ka ba nyet Winaꞌam yelsum. 8 Ka teŋ kane yit gonꞌos ne mobeꞌed, li kaꞌ nyoode, li pu lal ne nopoore. Ka li baꞌasug ane bugum na dii li.

9 M zuanoŋa, hale baa ti pianꞌade anwa, ti mor sukpiꞌem ne ya, ka miꞌ ye ya mor yelsum line dolne faangir. 10 Ka Winaꞌam kaꞌ ziri soba na tami ya tuuma ne noŋir line ka ya niŋ o yela n tisi o nidib ka nam kpelim niŋid la. 11 Ka ti bood hale ye ya yinni yinni maal ala men ne nimmua ka ya mor tiꞌir ka pu biꞌesida n ti paae li ben. 12 Ti pu bood ye ya mor gbanyaꞌam, amaa wenne ne ya taaba bane niŋ Winaꞌam yadda, ka modig ka diꞌe Winaꞌam noziꞌel kan ka o digil la.

13 Winaꞌam n da ziꞌel noore n tis Abraham la, ka soꞌ kaeꞌ n gat on Winaꞌam la zug, ka o noki o meŋ n po noor, 14 ka ye, “Asida, m na niŋi fu zug bareka ka fu yaas na ti a bedego.” 15 Ka Abraham da modig ka diꞌe Winaꞌam noziꞌel la.

16 Ka ninsaal yaꞌa ye o po noor, o pood ne one gat o la, ka li guꞌe noŋgban nwaꞌar wusa. 17 Winaꞌam da bood ye o nie li nyain n paꞌali bane na diꞌe o noziꞌel la, ye o kudum ku tiake o yelug la, linzug ka o po n peꞌes o noziꞌelugin la. 18 Ka yelbama ayi nwa bane pu tunꞌe tiakeda, ka ban yela ka Winaꞌam ku maꞌ baa biꞌela. Dinzug ka tinam bane zo keŋ o saꞌan ye o faaenn ti la na mor sukpiꞌeuŋ ye ti mor tiꞌir ne line digi ti tuon la. 19 Ti tiꞌir kaŋa nwa wenne aaruŋ kpaꞌare baꞌ kuꞌomin kaŋ kaŋ siꞌem la. Ka one yela ka ti mor tiꞌir la ane Yesu. One paae Winaꞌam zinꞌigin la. 20 Ka Yesu lieb maalmaan kpeenm saŋa kane kaꞌ ben la n ledig Melkizedek zinꞌigin la. Ka ti tiꞌir be o ni, ka o ziꞌe ti noba zug n gaadi ti tuon n kpenꞌed Winaꞌam zinꞌigin la.