1 Arazak dima, kelisimi! Kaasimi ka fabil bozugo susaꞌaŋ kenne ya saꞌan na. 2 Ya arazaꞌas punꞌeya. Yoya muꞌa ya fuud. 3 Teŋzeꞌem kpenꞌe ya salima ne ya anzurifa. Teŋzeꞌem la na lieb ya kaset, ka na di ya niŋgbina wuu bugum ne. Ya laꞌas arazaꞌas n guri saria kadib daar la. 4 Ya maꞌadi tumtumnib bane tumi ya poodin, ka moŋi ba yood ka ba kaasid n ziꞌini ya. Ka ya bunib la kaasig paae Zugsob one soꞌe nidib wusa la toba ni. 5 Ya be ne beilim suŋ dunia nwa ni. Ya maani ya yaꞌamin n nobi guri kuub daar. 6 Ya koos sida daan ye o tum tuumbeꞌed ka o sini o noor, hale ka ya ku o.

7 Dinzugo m baꞌabiise, modigimi ka Zugsob la nyaan ti kena. Gosimi kpaad n modigid siꞌem guri o poog ka sigsaa ne nyaꞌaŋ saa ti ni, ka li nyaan ti duꞌa biil suma la. 8 Yanam me modigimi ka gbanꞌe ya sunya ka Zugsob la kenna liꞌeliya.

9 M baꞌabiise, da nyon ne ya taaba, ka li yaꞌa a ala, Winaꞌam na kadi ya saria. Gosimi saria kat la ziꞌe zaꞌanoorin.

10 Zaŋimi Zugsob nodiꞌesidib bane da pianꞌ o yela la, namisug ne modigir ka li a bigisigo n tisi ya. 11 Ti buoni ba sumalisim dim bane modig ne Winaꞌam la. Ya wum Job n da modig siꞌem ka nye Winaꞌam da maal o siꞌem narin la. Neꞌeŋa paꞌalne Winaꞌam nyoog ne nimbaanlzoor.

12 M baꞌabiise, line gaas li wusa wusa ane, da po baa biꞌelaa. Da po mak ne teŋ, bee saazug, bee siꞌel siꞌela. Kel ka ya eenn a eenn ka ya ayei a ayei, ka Winaꞌam da kadi ya saria.

13 Soꞌ yaꞌa be ya saꞌan n be yela ni, on sosim Winaꞌam. On me suunr maꞌee on yuum yuum soma n naꞌas Winaꞌam. 14 Soꞌ yaꞌa be ya saꞌan benꞌed on buolim Winaꞌam nidib kpeenmnam, ka ba sos Winaꞌam tis o ka kpaꞌe kpaam niŋ o zugin ne Zugsob la yuꞌur. 15 Ka puꞌusug kan ka ba puꞌus ne yadda niŋir la na tilig banꞌad la. Zugsob la na due o. Ka o yaꞌa tumne tuumbeꞌed o na yiisi li bas. 16 Peligimi ya poos n tuꞌasi ya tuumbeꞌed n tis taaba, ka sos Winaꞌam tis taaba, ka ya na nye laafe. Sidasob sosug mor paŋ li tuuma ni.

17 Elija da ane nid wuu tinam ne, ka sos Winaꞌam hale ye saa da nii, ka yuma atanꞌ ne nwadis ayuobu, ka saa pu nii. 18 Ka o lem sos yaꞌas ka saa ni ka zuud la maal.

19 M baꞌabiise, ya yinni yaꞌa kpadigi yi sida la ni, ka soꞌ mor o lebis na, 20 o daana baŋim ye on mekama fendig tuumbeꞌed daan o tuumbeꞌed sueya ni, na tilig tuumbeꞌed sob siig kumin, ka ke ka Winaꞌam yiis o tuumbeꞌed bedego n bas.