1 Ka Yesu paꞌali o nyaꞌandolib la ne siiliŋ ye, “Mane a veen tiig la ameŋa. Ka m Baꞌ gur tiig la. 2 Wilkan be m ni ka pu wan na, m Baꞌ nwaadi li n basid. Ka wilkan wusa n wan la, o pesidi li ne n maali li suꞌuŋa ka li maligim wan bedego. 3 Pianꞌakan ka m pianꞌ tisi ya la zug, ya ane nyain. 4 Kpelim be man ni ka man me na be ya ni. Tiig wil ku tunꞌe wale, asee o kpelim be tiigin la. Ala men ka ya ku tunꞌe niŋ siꞌela asee ya kpelim be man ni.

5 “Mane a tiig la, ka yanam a wila la. One kpelim be man ni ka man me be o ni la, on sob na wal bedego, bozugo ya ku tunꞌe niŋ siꞌela asee ya kpelim be man ni. 6 On kane pu kpelim be man ni wenne wilkan ka ba nwaꞌe n bas, ka li kudug la. Ba na laꞌas wilban n lob bugumin, ka bugum dii ba. 7 Ya yaꞌa kpelim be man ni, ka m pianꞌad be ya ni, ya na sos yaname bood siꞌel wusa ka li na niŋ ala n tisi ya. 8 Ya tuumsuma bedego duꞌosid m Baꞌ Winaꞌam yuꞌur. Ka ala men ka li na paꞌal ye ya ane m nyaꞌandolib.

9 “M Baꞌ noŋi m siꞌem la, ala men ka man noŋi ya. Kpelimi be ne m noŋir la poogin. 10 Ya yaꞌa siak m noor ziꞌelug la, yanan kpelimi m noŋirin la, wuu man siak m Baꞌ noor ziꞌelug la, ka kpelim o noŋirin siꞌem la.

11 “M yeli ya yelbama ye ya diꞌe m sumalisim. Ka ya sunya na peꞌel ne sumalisim. 12 M noor ziꞌelug nwa ka m yeti ya ye, noŋimi taaba, wuu man noŋi ya siꞌem la. 13 Noŋir lem kaeꞌ gaad nidi naan kpi o zuanam zugo. 14 Ya yaꞌa siak m noor ziꞌelug la, ya ane m zuanam. 15 M yiti buoni ya ne ye, m tumtumnib. Amaa m ku lem buoli ya ala yaꞌase, bozugo tumtum ziꞌ o zugsob n niŋid siꞌela. Amaa m buoni ya ne ye, m zuanam, bozugo m yeli ya, m Baꞌ yeli m siꞌem wusa la. 16 Kaꞌ yaname gaŋi ma. Amaa mane gaŋi ya ye ya tum tuumsuma wuu tisuŋi n wan welsuma siꞌem la. Ka ya tuumsuma na kpelim. Ka ya yaꞌa sos m Baꞌ Winaꞌam siꞌel man yuꞌur zug o na tisi ya. 17 M noor ziꞌelug ane ye, ya noŋimi taaba.

18 “Dunia dim yaꞌa kisi ya, yanam baŋimi ye ba deŋi n kisigne man yiiga. 19 Ya yaꞌa been dunia dim soꞌolimin la, dunia dim naan noŋini ba meŋ nidib. Amaa ya kaꞌ dunia dim soꞌolim nii. M gaŋi ya ne n weligi ya dunia dim soꞌolim ni. Dinzug ka dunia dim kisi ya la. 20 Tienmi yelkan ka m yeli ya la ye, ‘Tumtum pu gaad o zugsoba.’ Ba yaꞌa namis man, ba na namisi ya men. Ka ba yaꞌa daa siak man paꞌalug, ba me na siak ya paꞌalug men. 21 Ba na niŋi ya neꞌenam wusa man zug, bozugo ba ziꞌ one tumi m la naa 22 Man yaꞌa pu keen na tuꞌasini ba, ba naan ku moren taale. Amaa lin a siꞌem la line na ligil ba taal la kaeꞌ. 23 One kis man la, o kisi m Baꞌ la men. 24 M yaꞌa pu tumin tuum kan ka soꞌ nan ziꞌ tumi ba saꞌan la, ba naan ku moren taale ba tuumbeꞌed zugo. Amaa lin a siꞌem la, ba nyeya ka kis man ne m Baꞌ la wusa. 25 Lin na niŋ siꞌem la, ane ye ban da deŋi sob siꞌel Winaꞌam gbauŋin la lieb ameŋa ye, ‘Ba kis man ne zaalim.’

26 “Suŋid la na kena on ka m na tum o ya ni, one a yelmeŋir Siig la, one yi m Baꞌ Winaꞌam saꞌan na la. O na dii m kaset. 27 Ka yanam me na dii man kaset, bozugo pinꞌilugin sa ka ya be m saꞌan.”