“M Baꞌa, saŋa la paae ya. Zunꞌomi fu Biig la yuꞌur, ka o me na zunꞌe fu yuꞌur; 2 ka fu tis o paŋ ka o soꞌe saalib wusa ye o na zaŋ nyovur line kaꞌ naare n tis ban wusa ka fu tis o la. 3 Ka nyovur line kaꞌ naar la ane ye ba baŋ fun one sid a Winaꞌam yinni maꞌaa la, ne man Yesu Kiristo one ka fu tum na la. 4 M tum tuum lin ka fu tisi m la naae ka zunꞌe fu yuꞌur dunia ni. 5 Ka m Baꞌa, fu me zuꞌomi m yuꞌur fu meŋ tuon nannanna ne zunꞌor kan ka m more fu ni ka dunia nam kaeꞌ la.

6 “M paꞌali fu yuꞌur n tis nimbane ka fu gaŋ dunia nwa ni n tisi m la. Ba da ane fu din ka fu zaŋi ba n tisi m ka ba siaki fu noor, 7 ka baŋ ye fun tis man siꞌel wusa la, yi ne fu saꞌan na, 8 bozugo pianꞌaban ka fu tisi m la, m me tisi ba ka ba diꞌe, ka sid baŋ ye m yine fu saꞌan na, ka lem siak ye fune tumi m na. 9 M sosid uf ba yela. Amaa m pu sosid uf ne dunia dim yelaa, amaa ban ka fu tisi m la yela, ban aa fu din la zug. 10 Man din wusa ane fu din, ka fu din me a m din, ka ba ni ka m yuꞌur nyet zunꞌor. 11 Ka nannanna m kenne fu saꞌan na ka pu lem be dunia nii, ka ban lee na kpelim be li ni. M Baꞌasuŋo, guri ba ne fu paŋ kan ka fu tisi m la ka ba a yinni wuu tiname a yinni siꞌem la. 12 Man daa be ne ba la m guri ba ne paŋ kan ka fu tisi m la. M gosi ba ka ba soꞌ pu bodige asee one ka li yeli ziꞌel ye o saꞌam la, ye Winaꞌam gbauŋ sob siꞌem la niŋ ameŋa.

13 “Ka m yuꞌun kenne fu saꞌan na ka pianꞌ pianꞌabama dunia ni ye sumalisim wusa na be ba sunya ni. 14 M tisi ba fu pianꞌad ka dunia dim kisi ba, ban kaꞌ dunia din la zug, wuu mam me kaꞌ dunia din siꞌem la. 15 M pu sos uf ye fu yiisi ba dunia nwa ni, amaa m sos ye fu da ke ba kpenꞌ yelbeꞌed nii. 16 Ka man kaꞌa dunia din siꞌem la, ala ka ba me kaꞌa dunia din ne. 17 Kel ka yelsida la maali ba ka ba liebi fu meŋ nidib n a nyain, bozugo fu pianꞌad la a sida. 18 Fun tumi m dunia ni na siꞌem la, ala men ka m me tumi ba dunia ni. 19 Ka ban yela ka m pesig m meŋi tis uf, ye fu yelsida la ke ka ba me pesigi ba meŋ n tis uf.

20 “Li kaꞌane bama yela maꞌaa, ka m sosidi fo, amaa laꞌam ne bane na ti niŋ man yadda, ba labasuŋ moolug la zug. 21 M Baꞌ ye ba wusa a yinni wuu fu, m Baꞌ, a yinni ne mam siꞌem la, ka m me a ne uf la, ala men ka ba me a yinni ne ti. Ka dunia dim na siak ye fune tum m na. 22 Ka zunꞌor kan ka fu tisi m la, m zaŋi li tisi ba ye ba a yinni wuu tiname a yinni siꞌem la. 23 M na be ne ba sunya ni ka fu be m ni, ye ba sid a yinni, ka dunia na baŋ ye fune tum man na ka noŋi ba wuu fun noŋ man siꞌem la.

24 “M Baꞌa, m bood ye ban ka fu tisi m la be ne m ka nyee m zunꞌor line ka fu da tisi m fu noŋir zug, saŋkan ka dunia da nam kaeꞌ la.

25 “M Baꞌ one a popielim soba, dunia nan pu baŋi fo, ka man lee baŋ uf, ka nimbama baŋ ye fune tum man na.

26 “Man ke ka ba baŋi fu yuꞌur ka na kpelim niŋidi ala, ye noŋir kan ka fu more m yela la, na bee ba ni, ka mam me be ne ba.”