18
Babilon teŋ saꞌuŋ la yela
1 Neꞌeŋa nyaꞌaŋ ka m lem nye malek soꞌ ka o yi arazana ni n sigid na. O daa mor paŋ titaꞌar, ka o paŋ ke ka dunia wusa nie nyain peꞌes. 2 Ka o tans n yel ne kukotitaꞌar ye,
“Babilon teŋtitaꞌar la saꞌameya.
Li sid saꞌameya,
ka yuꞌun kilim zinꞌi kan ka sibeꞌednam ne kikiris ne niis bane a bunbeꞌednam ka ba neꞌesid ba la peꞌel anina.
3 O daa ke ka buudi wusa mor yaꞌamleog ne poꞌagoondir la.
Ka poꞌagoondir la ne dunia naꞌanam digin saꞌam taaba.
Ka o poꞌagoondir kpanꞌam la ka o more dit yoog yoog la,
ke ka dunia kpikpinnib nye kpanꞌam o ni.
Linzug ka o saꞌam la.”
4 Ka m wum Winaꞌam kukor ka li yi arazana ni na ye,
“M nidiba, yimi ne o saꞌan na,
ka ya da laꞌas ne o tum tuumbeꞌed,
ka me namis ne oo.
5 Bozugo o tuumbeꞌed la laꞌasne du n zem wuu zuer n bood saazug paar.
Ka Winaꞌam tenri o tuumbeꞌed la wusa.
6 Niŋim o wuu on yiti niŋid siꞌem la,
ka yo o, o tuuma yood abuyi.
Peꞌelim o butiŋ ne daam kane kpiꞌemi noor ayi n gaad on yiti kuanꞌad siꞌem la.
7 Tisimi o namisug ne susaꞌaŋ n zem wuu on daa yiti tisid o meŋ naꞌasi ne bunsuma siꞌem la.
Ka o yeti o meŋ ye,
‘Man poꞌanaꞌab nwa, m kaꞌ pokoonre,
m ku baŋ namisug ne susaꞌaŋa.’
8 Ka on yet siꞌel la zug namisug na sigi o zugin daar yinni na,
ka wiim ne susaꞌaŋ ne koꞌom na gbanꞌ o,
ka bugum na di o.
On Zugsob Winaꞌam one kat o saria la mor paŋ titaꞌar.”
9 Dunia naꞌanam bane digin ne o ka dit malisim ne o bunsuma la, yaꞌa ti nye o bugum diib nyoꞌos, ba na kaas o yela, 10 ka zoo o namisug la dabiem n ziꞌe lalli n yel ye,
“Oi, oi, Babilon,
Babilon teŋ titaꞌar kaŋa taꞌam nyet namisug nannanna yimoo!”
11 Ka dunia kpikpinnib me kaas ka fabul o zug, soꞌ kaeꞌ na len daꞌa ba laꞌad la zug. 12 Soꞌ pu len daꞌadi ba salima ne anzurifa ne kugvenla, ne fusuma ne fuzenꞌes ne fubane nyeen kil kil, ne daad bane buudi wusa nyuugo malis la, ne laꞌabane ka ba zaŋ wabug nyina bee daad bane ligidi zuꞌe bee anzurifa bee kunt bee salima kuga n maal la, 13 ne kakaduru ne siꞌel ka li me wenne kakaduru ne tudaare ne mir ne frankinsense, ne daam ne kpaam ne zom ne ki ne niigi ne peꞌis ne widi ne widi terokonam ne yamis ne ninsaalib nyovuya men.
14 Ka kpikpinnib la yet o ye,
“Laꞌabane ka fu bood ye fu moren la,
ne fu kpanꞌam ne fu laꞌavenla gaadeya,
ka fu ku len nyee ba yaꞌasa.”
15 Ka kpikpinnib bane kuosid laꞌabama ka nyet kpanꞌam o saꞌan la na zo o namisug la dabiem n ziꞌeni lalli ka kaas ka fabul ka ye,
16 “Oi, oi, teŋtitaꞌar,
line wenne poꞌa one ye fusuma ne fuzenꞌes
ne salima ne kugvenla laꞌad bedego.
17 Kpanꞌam kaŋa nwa taꞌam saꞌamne nannanna yimmo.”
Ka aaruma dim ne nimbane kpenꞌed aaruma n ken, ne nimbane tum aaruma tuuma ne bane ken ne aaruma n kpimisid la 18 ziꞌe teŋin ka nye o bugum diib nyoꞌos ka ziꞌe lalli n kaas ye, ba nam ziꞌ nye teŋtitaꞌar ka li a wuu neꞌe. 19 Ka gbinꞌe titan bugi ba zut ne uusug ka kaas ka fabul ka ye,
“Oi, oi, teŋtitaꞌar kane ka bane mor aaruma ateukun kpimisidi nyeti ba kpanꞌam yiti o arazak ni la,
taꞌam saꞌamne nannanna yimmo.”
20 Ka kukor yi arazana ni n yel ye,
“Arazana dim ne Winaꞌam nidib ne o Tumtumnib ne o nodiꞌesidib la,
maalim sumalisim.
Bozugo Winaꞌam kad teŋ la saria ka saans o,
on daa niŋi ba siꞌem la zug.”
21 Ka malektitaꞌar teŋe kugir dine zem wuu neertitaꞌar ne n lob ateukun la ka yel ye,
“Ba na ti uk Babilon teŋtitaꞌar la n lob anwa n saꞌam.
Ka soꞌ kudin ku len nyee li yaꞌasa,
22 ka me kudin ku wum ka soꞌ nweꞌ kon ne
bee yuꞌum yuuma bee piebid wiig bee naꞌatan
teŋ la nii.
Ka nidib me ku len tum tuumsiꞌa aninaa,
ka me ku len wum neer la vuude.
23 Ka fitla bugum ku len nie aninaa,
ka dau me ku len di poꞌa yaꞌasa.
Teŋ la kpikpinnib bane daa a kpiꞌemnam dunia ni,
ka teŋ la zaŋi li baꞌad bugub la n maꞌ buudi wusa.”
24 Ka Winaꞌam nodiꞌesidib ne o nidib ne bane ka ba daa kuu ba dunia ni wusa la da kpi Babilon teŋ nuꞌusin. Dinzug ka Winaꞌam saꞌami li la.