1 Dinzugo, Winaꞌam ke ka ti a popielim dim o tuon, ka li yi ne ti yadda niŋir la zug. Ka linzug ka ti naalim ne Winaꞌam. Ka li ane ti Zugsob Yesu Kiristo maꞌasim la zug. 2 Kiristo ke ka ti nye Winaꞌam popielim piini ka more li kiŋ kiŋ, ka me mor tiꞌir ye ti na laꞌam diꞌe naꞌasi ne Winaꞌam. Ka li tisi ti sumalisim. 3 Ka ti me mor sumalisim ti namisug la zug, n miꞌ ye namisug ke ka ti nyaŋe modig. 4 Ka ti yaꞌa modig, li me paꞌal ye ti nye kpansug ka a suꞌum. Ka lin ke ka ti mor tiꞌir ye ti na ti be ne Winaꞌam. 5 Ka Winaꞌam pesigi o noŋire ti sunya ni, ka li yine o Siig Suŋ ni na, on ka Winaꞌam tisi ti la. Ka linzug ka tiꞌir kaŋa kaꞌ ziri tiꞌire.

6 Winaꞌam n gaŋ saŋsiꞌa la, tinam daa nan a tuumbeꞌed dim ka kaꞌ suŋir la, ka Kiristo kpi tisi ti. 7 Li toe ka soꞌ diꞌe popiel nid kuꞌum n kpi. Amaa daasiꞌere soꞌ na siaki kpi ninsuŋ yela. 8 Ka Winaꞌam paꞌali ti o noŋir a bedego siꞌem, tinam daa nan a tuumbeꞌed dim ka Kiristo kpi tisi ti la.

9 Ka o ziim la ke ka Winaꞌam ke ka ti a popielim dim o tuon, linzug biꞌesug len kaeꞌ ye Kiristo na faann tiꞌ ka ti ku nye Winaꞌam supeene. 10 Ti da ane dataas ne Winaꞌam. Ka o Biig la kum ke ka o naal ne ti. Ka tinam naal ne Winaꞌam la, ka biꞌesug len kaeꞌ ye Kiristo nyovur na faann ti. 11 Ka line len paas ane ye ti maal sumalisim ne Winaꞌam n niŋ siꞌel la. Ka li ane ti Zugsob Yesu Kiristo la zug, on kane yuꞌun naali ti ne Winaꞌam la.

12 Dau yinni da tum tuumbeꞌed, ka nan ke ka tuumbeꞌed sig dunia ni na. Ka o tuumbeꞌed la zug, ka kuꞌum kena. Ka linzug ka kuꞌum loꞌomis ninsaalib wusa, ban tum tuumbeꞌed la zug. 13 Saŋkan ka Winaꞌam da nam pu tis Moses o wada la, tuumbeꞌed da be. Ka wada yaꞌa kaeꞌ, Winaꞌam pu geligid tuumbeꞌede. 14 Ka Adam saŋa ti paae Moses saŋa, kuꞌum pun paae nidib wusa, hale ne bane tum tuumbeꞌed ka li pu a wuu Adam da zanꞌas Winaꞌam noyelug siꞌem laa.

Adam ne Yesu Kiristo one kenn o nyaꞌaŋ na la wenne taaba, 15 ka lee kaꞌ bun yinni. Ka Winaꞌam piini pu wenne Adam tuumbeꞌede. Dau yinni tuumbeꞌed la ke ka nidib bedego kpiid. Ka Winaꞌam popielim gaad ala bedego. Ka o piini line yit dau yinni one a Yesu Kiristo la popielim ni, zuꞌeya n tis nidib bedego. 16 Dine dol Winaꞌam piini pu wenne line dol dau yinni la tuumbeꞌede. Saria kadib line dol tuumbeꞌed yinni la ane koosbeꞌed. Ka Winaꞌam piini line dol tuumbeꞌed bedego ane ye Winaꞌam ke ka ti a popielim dim o tuon. 17 Dau yinni tuumbeꞌed la zug, ka kum paae nidib wusa, ka li yi dau kaŋa ni. Ka line dol Yesu Kiristo tuuma la gaad ala. Nidib bane wusa diꞌed Winaꞌam popielim line zuꞌe ne o piini dine a popielim la, na nye naꞌam ne nyovur. Ka li yi ne dau yinni one a Yesu Kiristo la ni.

18 Aa to. Tuumbeꞌed yinni la ke ka nidib wusa nye saria kadib beꞌed Winaꞌam saꞌan. Ala men Yesu Kiristo popielim tuum yinni ke ka Winaꞌam ke ka nidib wusa a popielim dim o tuon, ka tisi ba nyovur. 19 Nid yinni la zanꞌas Winaꞌam noor la ke ka nidib bedego a tuumbeꞌed dim Winaꞌam tuon. Ala men ka nid yinni la siak Winaꞌam noor la ke ka Winaꞌam ke ka nidib bedego a popielim dim o tuon.

20 Wada la da kena ye li ke ka wadasaꞌuŋ nobug. Ka tuumbeꞌed n nobug la Winaꞌam popielim piini nobug bedego gaad ala. 21 Tuumbeꞌed nyaŋed nidib wusa ka ba kpiid. Ala men Winaꞌam ke ka ti a popielim dim o tuon la zug ka o popielim soꞌe ti ka tisi ti nyovur line kaꞌ naare, ka li yine ti Zugsob Yesu Kiristo ni.