Luke
2
Tjiitju Tjitji Yutirringu
Yangka yirna Tjarlu yini Augustuspa nyinama ngurra tjarlungka Rometa. Paluru-tjananya tjarlu nyinama ngurra kutjupa-kutjupaku. Palurulu-tjananya watjarnu yiningku-ya wakalkuwa. Tjarlu Augustustju-tjananya puntu kutjuwarra watjarnu yankuwa-ya ngurra walytjakutu yiningkuya wakalkuwa. Mularrpakili-ya pakarnu yanu yiningku-ya wakalkuwa.
Josephtu ngurra Galileetjanu pakara yanu ngurra Judeakutu. Ngurra Nazarethtjanu pakara yanu Bethlehemkutu. Kurrarlka Josephkurnu tjamu yini Davidpa tjitji yutirringu ngurrangka tjiingka. 5-6 Joseph Mary nyupararra-pula lurrtju yanu. Katji-pula warinykatingu Bethlehemta. Mary tjamunpa tjitji kanyilkuwa nyinama. Kamu tjitjilpi yutirringu, palurukurnu katja kurranyulpi. Marylulpi warntu manu tjitji karrpirnu ngarritjunu pulukikurnungka mangkalta. Tjiingkalta yarnangu-ya laltulpi-ya ngurrangka nyinama.
Kukunytja Ngampurrpayiluya Wangka Palya Kulirnu
Ngurrangka tjiingka kintikili puntu-ya nyinama kukunytja ngampurrtu-tjananya kanyinma. Pinkirrkulu kutju-tjananya yutirringu ngarama. Tili tjarluminyirri Mamakurnu yutirringu-tjananya. Kamu ngurlurringu-ya. 10 Pinkirrkulu wangkangu-tjananya, “Wiya nyurran ngurluriku. Kulila-rniya. Ngayu-rnangkuya warinykatingu wangkakulu palyakulu. Katji-ya ngatja yarnangu kutjuwarralu kulilku ngurrkurriku-ya. 11 Kuwarri Davidkurnu ngurrangka tjitji yutirringu ngalkinpangkuya nyuntunku laltuku. Paluru tjarluminyirri Mamakurnu. 12 Ngayulu-rnantaya watjalku miku nyurran walytjalu nyakuwa. Nyaku nyurran tjitji pulukikurnungka mangkalta ngarrima, yipilu warntungka karrpirnu ngarritjunu.”
13 Tjiingkalpi-ya pinkirrkulu-ya laltu yalkuritjanu yutirringu ngurrkulu-ya Mama yinkarra marninypungama.
14 “Mama palyaminyirri yalkuringka kankarra nyininpa.
Mama ngurrku nyininpa puntu laltuku miku-ya kurrurnpa palya nyinamalpa parnangka”
15 Katji-ya pinkirrkulu marlaku yanu yalkurikutu. Kamu kukunytja ngampurrpayilungkuya watjarnu, “Yanku-la Bethlehemkutu nyakuwa-la Mamalu-lanya watjarnu.”
16 Mularrpakili-ya wala yanu nyakuwa-ya. Katji-ya warinykatingu-ya Bethlehemta parra-ya nyangama. Kamu-ya nyangu-ya Mary kamu-pulanya Josephpa nyinama. Kamu tjitji ngarrima pulukikurnungka mangkalta. 17 Katji-ya kukunytja ngampurrpayilu tjitji paluru nyangu. Yanu-tjananya puntu laltu parra watjanma tjakulpa pinkirrkululu watjarnu. 18 Katji-ya laltulu tjukurrpa tjiitja kulirnu karratarringu-ya. 19 Marylungku wulu kulinma pinkirrkululu wangkanytjatjanu. 20 Kukunytja ngampurrpayi-ya marlaku yanu kukunytjakutu. Katji-ya yanu turlku-ya maa yinkalkatima-ya Mama marninypungama, kulirnu-ya nyangu tjiilanyatuka. Palunpa-ya wangkangu, “Mularrpakili pinkirrkululu-lanya mularrtu watjarnu.”