19
Yan-te nqo꞉go, Mbumbukiam-qa iz gi-eqanem, Bebilon ngi꞉wat zapaya
Taqa zita-te, no yan-te, manqa wag nø-ewág. Andé ezoqa kopoav-qapi-qá akhayam kandakandá. Āv gini-akhaemám nqǽgo,
“Alelúya. Iké꞉ Mbumbukiam-te.
Ezoqam-qa khandi꞉zat matev,
nikeza Mbumbukiam-té qando-fakhaté.
Iz kandambaqape neka bazaføgakh,
teqa ndégo.
19:2 Deut 32:43; Veve 6:10Zapa ndǿgo, teqa manqa ovøyam matev unimanqatín neka ndaføyambá.
Ndugu mambe sævam kandambaqapu, ndugu tuqa mambe matev, manqei-qape gui-ngi꞉tat,
ndego yaq-fia nqosøgeap mbo-etoám.
Ndego yaq-fia mø̀ndøtá, tu-te ndugu,
tegi sasai ezoqam, pakhapakha guzø-khanæmam.”
Yaq nango gi-akhaemem,
“Alelúya. Iké꞉ Mbumbukiam-te.
Taon kandambaqape ndøgo, ndøwageapet,
taqa khøifa oskia ndøqaviág. Miavmiáv.”
Yaq ndigu megetapak tuenti-foa neka ndigu khandi gigiap foa, ekeza kha, manqei me꞉laém, Mbumbukiam vømbō-vizumem, ndego kawa-qa qonam nonqo-te go꞉qotam, vø̄-einim,
“Amén. Nqanek manqat unimanqatín.
Alelúya. Iké꞉ Mbumbukiam-te.”
Sip Nakhasam, sævam ge-okɨ
Yaq Mbumbukiam-qa qonam nonqo-te, manqat ndofakhán. Āv qande-eín nqǽgo,
“Nigi Mbumbukiam-qa iz, zó-eqatát, zo tegi sasai ezoqam ate nqazøte꞉go neka ezoqa ewaqape, kandakanda neka khasøkhasis, zo ndego ndozombo-vizap.”
19:6 Veve 14:2Yaq no manqa wag nø-ewág. Andé ezoqa kopoav-qape-qá náq. Andé ibøkha sololo kandambaqape me me꞉wagám neka andé ndand kandakanda me me꞉møkunimám. Āv qane-eín nqǽgo,
“Alelúya. Iké꞉ Mbumbukiam-te.
Zapa ndǿgo, nigi Evezøza, ndego Mbumbukiam,
ndego bazaføgakh ate ndægo ndømbogo, ndégo teno-kawaevát.
19:7-8 Isa 61:10; Veve 21:2Ni khanakhanakh bini-asøtøvé neka iz bizimbō-eqanem.
Zapa ndǿgo, khøuwa iz mø̀ndøndáp. Sip Nakhasam, sævam ndǿ-okɨ́.
Mbasønakam ndugu, tu-okɨ, mø̀ndø-khakheinám.
Mbumbukiam ndabua papaqa mbo-etoám.
Bæbæs-qapé neka vøiyam-ús, yaq ndugu vø̄-uz.”
(Nqanek ndabua papaqa qanimav-qape ndǿgo, matev mbomømboma, Mbumbukiam-gi ezoqam gimatønumam.)
19:9 Met 22:2-3Yaq ndego enzol ezoqam genø-ein, “Āv qoqoté-peawám: Ezoqam ndigu, Sip Nakhasam-qa nøkenøkem lou loge-te gizø-akha, tizav, khanakhanakh mbá giabitigú.”
Yaq ndego manqat nøme, āv gene-eín nqǽgo, “Nqanek manqat unimanqatín. Mbumbukiam-qá manqát.”
10  19:10 Kel 10:25-26; Veve 22:8-9Yaq no teqa zenda tokhotapak-qa megemege-te, nøkeza kha, manqei nøtelaváo. Neka ambá nombo-vizamɨ́n. Geté ndego āv genømbe-eín nqǽgo, “Nandav ndømatàna᷄m. Até nó-a, no Mbumbukiam-gé sasai ezoqám, av qo nqoqote꞉go neka qogi Klisten qafuap ndi꞉gu, ndigu Yesu-qa manqat ndigeawat. Geté Mbumbukiam qombóvizám. Manqat ndøgo, Mbumbukiam-gi manqa vevezam ezoqam ndimanqate, ndøgo Yesu-qá manqát.”
Ezoqa hos papaqa-te go꞉qotam
11  19:11 Veve 1:5; 6:2; Psa 96:13; Isa 11:4Yaq no āv qateqeív nqǽgo: Yan sège-mboqoé. Yaq nqáe! Hos papaqa no-omét. Ndego go꞉qotam, teqa iz Ndaføyamba-qapé neka Unimanqatin Ezoqám. Ndego ezoqa manqa ovøyam-te ndegevezoat, neka nakhag vø̄goatun, ndego matev eqeieqei mba mbopáev. 12  19:12 Dan 10:6; Veve 1:14; 2:17Teqa bøi andé gøina wageap me me꞉wageapám. Neka kawa-te, kawa ezoqam-qá wawaq ndø-uzupám. Wawaq kopoáv. Neka kawa-pap-te, iz vømbø̄e-peawam. Ta iz ndøgo, ndego ekhapus mbá sege꞉-otév. Ezoqa nøme zøtezateáv. 13  19:13 Isa 63:1-3; Zion 1:1, 14Ndego ndabua sekeqape ndø-uzám. Ndabua ndøgo, kouk-té qanu-qoqotám. Teqa iz Mbumbukiam-qá Manqát. 14 Ngenek, yan-gí nakhag ezoqam mbopaevém. Hos papaqa-papaqa-té gono-qonavát, neka ndabua bæbæ-bæbæs papaqa-papaqa vø̄-uzupat. 15  19:15 Psa 2:9; Veve 1:16; 14:20Teqa manqa-nqa-te, nakhag kaiya khobos-qapi ndofakhatám. Yaq bawabawan ate ndi꞉gu gé꞉pitáz. Ndego bazaføgakh-us zømbó-kawaevtát. Auli khamókh gezømbé-kawaevtát. Neka andé waen tae nanga me mé꞉pesegím. Gétokhonøvém. Mbumbukiam, ndego bazaføgakh ate ndægo ndømbogo, teqa qaqa matev, āv tøzømbé-fakhán. 16  19:16 Veve 17:14Teqa ndabua sekeqape, mbagi-te ndøgo, iz mø̀ndømbo-peawám. Āv qambøe-peawám nqǽgo:
 
Kawakawa-za-gé Kawá
neka evezøza-za-gé Evezøzá.
 
17  19:17 Ezek 39:17-20Yaq no enzol ezoqam no-omét. Khøuwa-té gono꞉yám. Ndego kandambaqapé møndæ-akhá. Pipisi-té genø-akhá, ndigu khaiya ova go꞉løvøvupat. Āv gezømbe-akhá nqǽgo, “Vø̀ndozáv. Mbumbukiam-qá lou loge kandambaqape zombómøváb. 18 Vø̀ndozáv. Kawakawa-za-qá kha zólóg neka nakhag kawa ezoqam-qa kha, neka nakhag ezoqam-qa kha, neka hos-qa kha, neka tiqa kha, hos-te go꞉qonavam, neka gekha ezoqa nøme-qa kha, iz-akhayapak neka yaq-fia mbain sasai ezoqam, neka ezoqa kandakanda neka ezoqa khasøkhasis, tiqa kha vøzø̄log.”
19 Yaq no nøme, āv qateqeív nqǽgo: Søvakha gigiap lozokhak neka manqei-qape-gi kawakawa-za neka tigi nakhag ezoqam, mø̀ndømøváb. Ambá nakhag ndøgonemɨ́n, te namba ndego, hos-te go꞉qotam, neka tegi nakhag ezoqam namba. 20  19:20 Veve 13:12-17; 20:10Geté ndego søvakha gigiap lozokhak, gèmøvøinám. Até khavozam manqa vevezam ezoqám-a, vø̄-møvøinam, ndego teqa iz-te nqova ndaføgim matev gematønumam, ta mokho-te ndøgo, ndego ndigu ezoqam getubam, ndigu søvakha gigiap lozokhak-qa khakhatap gindapem neka teqa tae khøuwiap vømbō-vizupam. Yaq søvakha gigiap lozokhak, khavozam manqa vevezam ezoqam namba, gøinam kewan nandi wagøvap-us-té ginø-nqagivém. Khandín. 21 Tigi nakhag ezoqam, nakhag kaiyá ginizitág, ta nakhag kaiya ndigu, ndego hos-te go꞉qotam, teqa manqa-nqa-te gindu-fakhatam. Neka tiqa kha, pipisi ndølóg. Pipisi ate gi꞉goam, até vøzømbū-ewez.

19:2 19:2 Deut 32:43; Veve 6:10

19:6 19:6 Veve 14:2

19:7 19:7-8 Isa 61:10; Veve 21:2

19:9 19:9 Met 22:2-3

19:10 19:10 Kel 10:25-26; Veve 22:8-9

19:11 19:11 Veve 1:5; 6:2; Psa 96:13; Isa 11:4

19:12 19:12 Dan 10:6; Veve 1:14; 2:17

19:13 19:13 Isa 63:1-3; Zion 1:1, 14

19:15 19:15 Psa 2:9; Veve 1:16; 14:20

19:16 19:16 Veve 17:14

19:17 19:17 Ezek 39:17-20

19:20 19:20 Veve 13:12-17; 20:10