Pablo Kepegin Jesúsgin-kwenamalad-Corintogin-pukmaladga Karta Palmijad
1 Corintios
Imi kepe-saglagin neg-kwebur-Corintogin tule-Pabbal-naigusmalad Pablobal Pab-Jesús-abingasmal (Hechos 18.)
Imi neg-kwebur-Corintodin, Grecia-napkin chii, tenal neg-kwebur-tummad, tulemal immalmal-ukmalad ichejul irmamamimal. Tenal teun Corinto-tolgan-Pab-wichulmalad pela-pela istar nanedimal, ome-pimaladgin yoledimal, chowal-mimmiganga Pab Tummadyob koldimal, tegin pinked-nikchulidgin yosgu nanedimalbal. Imi te-cholbal kwenadgan-tummagan Pabloje kwenadgan-palmismal Pabloga choggal kwenadgan kalagwenzhul nanebukmal.
Al Pablo Pab-Purpa-Nuedbal kwenadgan-Corintogin-pukmaladaga iti-karta nermas kwenadgan melle pis-pis aga nanemalo (capitulo 1-3,) tegin melle tummarba-itogedgin nanemalbalo (capitulo 4,) tegin kwenadgan melle ome-pidgin yolemalo (capitulo 5,) tegin kwenadgan melle tulega-igal-itogedzhe aga chedmalo aga igal nudamalgal (capitulo 6.) Tenal kwenadgan-tummagan wisgubimaladbal Pablo chogzhabal machi-ome-nikued-igal igi mai (capitulo 7,) tegin chowal-mimmiganga-chan-ukchad-igal igi maibal (capitulo 8.) Tegin Pablo chogzhabal tule-Pab-igalgin-chunmananimalad igal-nika akwilegal (capitulo 9.) Tenal Pablo chogzhabal tule-Pabbal-naigusmalad igal kwen nikchulmal kalagwenzhul nanegal (capitulo 10.) Tenal Pablo igal-mezhisbal omegan iglesiagin nuekwa nanemalo (capitulo 11:1-16.) Tenal Pablo igal-mezhisbal kwenadgan Pab-purkwijad-mas-kunnedgin igi naneenabmal (capitulo 11:17-34.) Tegin Pablo kurkin-purpaledgin chunmadi-kusbal (capitulo 12,) tegin tule-pilaledgin chunmadibal (capitulo 13.) Tegin Pablo igal-mezhisbal kwenadgan pulakwa Pabzhe-koledgin inniki nanegal (capitulo 14.) Tegin Pablo chogzhabal Jesús chunchunnad kannan tulles (capitulo 15.) Tegin Pablo kwenadgan-oturdasbal Pab Tummadga mani-ukegal (capitulo 16.) Pitomalgu.
1
Imi antin Pablo, Pab-Tummad-chogedbal Cristo-Jesús-nuggin-palmilegalidga nugzhalenoni. Tenal antin kwenad-Sóstenesbak pemal-kwenadgan-Corintogin-pukmaladga karta wis palmijii.
Imi pemal Cristo-Jesúsgadga kunonimal-choggu, al pemal chwilidik naneed-wilubmal. Tenal pemal-Pab-Jesúsbal-nanimalad napa-naid-ugakche Pab-Jesucristoje-kolbukmalad, e-pakamaladmo. Tenal Jesucristo we tulemal-e-Tummadga mai, tegin anmal-Tummadga maimo.
Imi Pab-Tummad-anmal-pab tegin Pab-Jesucristo pemalga immal-nuegan imakelen, nabirin, tegin pemalga ulubgin akalzhul-itogal pemal-imakelen, nabirbalin.
Pablo kwenadgan-Corintogin-pukmaladga Pabga tog-nuedi chogzhad
Imi antin pemalga pane-pane Pabga tog-nuedi chogalda. Tegin pemalga pinzheed-nuegan ukleged-wilubzhulinadbal, Pab Tummad Cristo-Jesúsbal pemalga yabli pinzheed-nuegan ukcha. Al pemal pela-pela Jesucristobal nugunonimal. Tegin pemal pirkin Jesús-igalgin-wiis chunmanonimal, tegin pemal pela-pela Jesús-igal wisgunonimalbal.
Tenal anmal pemalga Jesúsgin chunmajadbal, pemal-abalgin pela-pela oyolenoni, Jesús-igal ib-chunchunnad. Al pemal Jesús-wijiidbal pel-kwapa kurkin-purpaled nika-nemal. Tenal pemal pela-pela anmal-Pab-Jesucristo-tanikoed abintajimalbal.
Tenal Pab-Jesúsdin purkwedzhe pe-pentadi-kuo, melle iskuedgin arkwangal. Tenal Pab-Jesús pe-pentakoedbal, Pab-Jesucristo tulega-igal-itogoed-ibegin pe tule-immal-kwen-akaloszhulidyob taklenoniko. Tenal Pab Tummad pemal-chus, pulakwá e-machi-Pab-Jesucristobak mecha kudigugal. Tenal Pabdin keg-chulgu e-kaka-ukchad-pallí Pab-Jesucristobak mecha nanegal pemal-imako.
Kwenamalad iglesiagin pinzheed-choggwénnagwadgin kwen nanaszhulmalad
10 Kwenamalad, imi an Pab-Jesucristo-nuggin pemalgin wilemal, pe melle pis-pis tulemal-imamalo, aga pe yopí pinzhemalo. Tegin an pemalgin wilemalbal pemal pulakwa pinzheed-choggwénnagwadgin nanemalo, tegin pemal pulakwá chogmalbalo, wedin ib-nued o chul.
11 ¿Ibiga an teob chog? Nabir. An-kwenadgan, imi Cloé-neg-yaginmalad anka chognonido, pemalde aga emal-emal istar taknanimal. 12 Tenal Cloé-negginmalad chogmal, pemalde chogmal: “Antin Pablogad.” Kwéntin chogmal: “Antin Apolosgad.” Kwéntin chogmal: “Antin Pedrogad.” Kwéntin chogmalbal: “Antin, Cristogad.”
13 ¿Imi pemal ebinzhemal, Cristo-igalde, chogbake mai? Chulá. ¿Tegin pemal ebinzhemalbal, antin-Pablo pe-anal nakrusgin purkwis? Chulá. ¿Tegin pemal ebinzhemalbal, pemalde Pablo-nuggin tigin oglesmalbal? Chulá.
14 Imi antin tigin-pemal-kwen-okchajulidbal an yer itosdo. Tenal antin tigin Crispo-tegin-Gayobi-wis-okcha. 15 Al tule keg ankin chogmal, antin an-nuggin tigin pemal-okcha. 16 ¡Aaá! An wisdo, an Estéfanas-neg-yaginmaladbi an tigin okchabal. Egmaldin an wichí, toamal an tigin okcha.
17 ¿Ade Cristode anka chogzhají, an tigin tulemal-ogo? Chulá. Imi Cristo unnila anka chogzhado, antin Pab-kaka-nuegan-chunmakedgin alamako. Tenal antin tule-immal-wijiid-pinzheed-nikadyob kwen chunmadijul. Tenal an Pab-kannalegedbal chunmadi-kus, Cristo-nakrusgin-purkwijad melle ib-pinchegadga kunonigal.
Pab Tummad immal-wijiid tegin e-kannaleged Jesucristobal oyolenonikid
18 Imi tule-cho-chagla-oturdalegedzhe-natapmaladga, Cristo-nakrusgin-purkwijad kakapurwa-pinchegad, ibga keg pel ku. Tenal anmal-abonolenonimaladgadin, Cristo-nakrusgin-purkwijad kakapurwa-nued. Tenal Cristo-nakrusgin-purkwijad-kakapurwabal Pab Tummad e-kannalegedgin sapejul tule-oturdaleged-akar anmal-abonomai.
19 Imi Pab-Tummad-kartagin chogdo:
Imi Pab Tummad chog:
“Antin tule-pinzheed-nikmalad
tule-pinzheed-nikchulmaladyob imanoniko.
Tegin antin tule-nono-nikamalad
tule-nono-nikchulmaladyob imanonibalo.”
Is. 29:14
20 ¿Tegil pia nadzhun, tule-pinzheed-nikmaladdé? ¿Tegil pia nadzhun, tule-pirkin-turdasmaladdé? ¿Tegil pia nadzhun, tule-iti-nap-igalgin-pinzhemaladdé? Tenal Pab Tummad tule-iti-napkin-pinzheed-nued-nikmalad immal-kwen-wichulidyob imanoni.
21 Tenal Pab Tummad pirkin pinzheed-nikadbal tule-iti-napkin-pukmalad mag itononijulmal Pabdin ibi-tule. Al Jesús-nakrusgin-purkwijad-igalgin-chunmakedbal Pab Tummad yer itosdo, ibga-keg-pel-kued-igalgin tule-Jesúsgin-ibzhenonimalad-abonogal.
22 Tenal Judiomal immal-taktijulmalad takpimal, mag takegal emalga immal-choglejad ib-chunchunnad o chul. Tenal Griegomaldin, pirkin-immalgin-pinzheedbal Pab-amibimal.
23 Tenal anmal-Pabgin-ibzhemaladdin Judiomal tegin Griegomalyob kwen nanejulmal. Tenal anmaldin Cristo-nakrusgin-purkwijad-igalgin chunmananimal. Al anmal-chunmaked istar Judiomal-opinzhemal, tegin anmal-chunmaked Griegomalga ibga keg pel kubal. 24 Tenal anmal Cristo-nakrusgin-purkwijadgin-chunmaked Pab-Tummad-Judiomalzhe-kochamaladga tegin Pab-Griegomalzhe-kochamaladga, ib-nuedga kunonimalmo.
Tenal Pab-tuleje-kochamaladga Jesús-purkwijad-igalbal oyolenoni, Pab Tummad kannaleged nika tegin pirkin pinzheed-nikabal.
25 Tenal Pab-Tummad-pinzheed-ibga-keg-pel-kued pul ib-nueddo, tule-pul-pirkin-pinzheed-nika-chogdimaladga. Teginbal, Pab-kannaleged pul lolo taklegendo, tenal Pab-kannaleged pul lolojul, tule-kannaleged-nika-chogdimaladga.
26 Kwenadgan, imi pe takto, Pab pe-chujadgin pemal-abalgin tule-iti-napkin-immal-wismalad wal-walkwénna wis nika, tegin tule-tummagan wal-walkwénna wis nikamalbal. Tenal tule-tummagan-nuskan ampa wal-walkwénna wis nikamalbal. Tenal tule-polganabi pemal-abalgin kudimal.
27 Tenal Pabdin iti-napkin immal-polgana chus, tule-pirkin-immal-wismalad-opinkezhegal. Tegin Pabdin iti-napkin immalmal-keg-kued chusbal, tule-pirkin-kannaleged-nikmalad-opinkezhegalbal. 28 Tenal Pabdin iti-napkin tule-polgana-chus, tegin tule-istar-takledimalad-chusbal, tegin Pab immal-ibga-keg-kumalad-chusbal, kusgu-tule-igal-mamikid opelogal.
29 Tenal Pab Tummad tule-tummagan-kwen-chuszhul, tulemal Pab-Tummad-wagin melle tummarba-itogedgin chunmanonigal.
30 Tenal Pab Tummad chunnad Cristo-Jesúsbal pulakwa-nanegal anmal-imas, tegin Pab Tummad Jesucristobal pinzheed-nikugal anmal-imasbal. Tegin anmal Cristogin tule-immal-akaloszhulmaladyob kunonimal, tegin tule-chwilimakaledyob taklenonimalbal. Tegin anmal tule-kannan-Jesucristobal-paklenonimaladga kunonimalbal. 31 Al Pab-kartagin nermakal-maidyob, an pega chogzhundo:
Imi tule tummarba itobimalal,
Pabginbi tummarba itogenabmal.
Jr. 9:24