Mateo Jesucristogin-kaka-nuegan Palchogzhad
Mateo
Imi akpene Pab Tummad Israel-tulemalga pato kaka-ukcha ede kujal tule-tummad-palminoniko. Tenal we tule-tummad Hebreo-kakagin-pimal Pab-akpene-chogzhad-palmidagoed-tule tegin Griego-kakagindin pimalmo Cristo, tegin wag-kakagindin pimalmo Mesías. Wedin Pab-Tummad-Machi-Jesús. Tenal Jesús iti-napkin tigusgu, Judiomal-pel-kwapa kwen ibzhaszhulmal Jesúsde Pab-akpene-chogzhad-palmidagoed-tule. Imi Israel-tulemaldin nugbal Judiomal. Tenal e-kakadin pimal Hebreo-kaka.
Al Mateo Pab-Purpa-Nuedbal iti-karta nermas Judio-tulemalga choggal Pab-kaka-palchogmalad akpene-chognonikid Jesúsbal ib-chunchunnadga kunoni. Al imisgwadzhe anmalga choglenaimo Pab-Jesús-igalde ib-chunchunnad.
Tenal Jesús-Pab-neg-takmaidgin-chunmajadbal Mateo anmalga chognoni Pab-Tummad-neg-takmaid-igaldin igi mai. Tegin Mateo anmalga chognonibal Jesúsdin nakrusgin purkwis tulega iskued penukegal tegin ibapágin Jesús kannan tullenonibal.
Imi Mateodin Judio-tule, tenal Mateo kepegin tule-iskana, Romano-tummadga e-tulemalgin-mani-egwaned-tulen, tenal tulemalgin mani aturzhajad-tulebal. Tenal Mateo pimalbal Leví. Tenal Mateodin Jesús-e-chapingan-walambe-kakabogwad-walgwenmo. Tenal Mateo imial-immal-takchadbal tegin ual-immal-itojadbal Jesúsgin-immal-kujad nermas.
Tenal Mateo iti-kartagin aga tukin kwen chogzhajul ede iti-karta nermas. Tenal Juan-e-chapingan-walgwen-Papias-nugad tegin kwenadgan-tummagan-pimalad chogzhamaldo Mateo iti-karta nermas. Pitomalgu.
1
Jesucristo-e-tadgan ukin-ukin ampagusmalad
(Lucas 3:23-38)
1 Imi Jesucristo David-akar tani, tegin David Abraham-akar tanimo. Tenal antin Mateo, Jesucristo-e-tadgan-ampagusmalad akpene-akar nermakal-maidgin chunmanejun.
2 Imi Abraham-machidin nug Isaac.
Tegin Isaac-machidin nug Jacob.
Tegin Jacob-machidin nug Judá, tegin Judá-urpamal-nikusmo.
3 Tegin Judá-machidin nug Fares,
tegin e-machi-piddin nugmo Zara.
Tenal we machi-walbogid-e-nandin nug Tamar.
Tegin Fares-machidin nug Esrom.
Tegin Esrom-machidin nug Aram.
4 Tegin Aram-machidin nug Aminadab.
Tegin Aminadab-machidin nug Naasón.
Tegin Naasón-machidin nug Salmón.
5 Tegin Salmón-machidin nug Booz, tenal Booz-e-nandin Rahab.
Tegin Booz-machidin nug Obed, tenal Obed-e-nandin Rut.
Tegin Obed-machidin nug Isaí.
6 Tegin Isaí-machidin nug David tenal Daviddin erreyga megwis.
Tenal Errey-David-machidin nug Salomón.
Tenal Salomón-e-nandin David-Uríasgin-ome-idirijad.
7 Tegin Salomón-machidin nug Roboam.
Tegin Roboam-machidin nug Abías.
Tegin Abías-machidin nug Asa.
8 Tegin Asa-machidin nug Josafat.
Tegin Josafat-machidin nug Joram.
Tegin Joram-machidin nug Uzías.
9 Tegin Uzías-machidin nug Jotam.
Tegin Jotam-machidin nug Acaz.
Tegin Acaz-machidin nug Ezequías.
10 Tegin Ezequías-machidin nug Manasés.
Tegin Manasés-machidin nug Amón.
Tegin Amón-machidin nug Josías.
11 Tegin Josías-machidin nug Jeconías.
Tenal Josías machimal-pimalad-nikusbal.
Imi teun takalgu, Babilonia-tulemal aga e-neg-kweburzhe
Israel-tulemal-chesmal e-mosmalga imagal.
12 Tegin Babilonia-tolgan
Israel-tulemal-chesmalad-cholbal Jeconías machi-nikusbal,
Tenal we machidin nug Salatiel.
Tegin Salatiel-machidin nug Zorobabel.
13 Tegin Zorobabel-machidin nug Abiud.
Tegin Abiud-machidin nug Eliaquim.
Tegin Eliaquim-machidin nug Azor.
14 Tegin Azor-machidin nug Sadoc.
Tegin Sadoc-machidin nug Aquim.
Tegin Aquim-machidin nug Eliud.
15 Tegin Eliud-machidin nug Eleazar.
Tegin Eleazar-machidin nug Matán.
Tegin Matán-machidin nug Jacob.
16 Tegin Jacob-machidin nug José.
Tenal Josédin María-e-machered.
Tenal Maríadin Jesús-e-nan.
Tenal we Jesús imis pimal Cristo, Pab-akpene-chogzhad-palmidagoed-tule.
17 Imi Abraham-akar Davidzhe tadgan-walambe-kakabake kumal. Tenal David-akar, Israel-tulemal Babilonia-tulemalzhe-kalejadzhe tadgan-walambe-kakabake kumalmo. Tenal Babilonia-tulemal Israel-tulemal-kajad-akar, Cristo-nonikidzhe tadgan-walambe-kakabake kumalbal.
Jesucristo mimmilejad
(Lucas 2:1-7)
18 Imi Jesucristo-mimmilejad weob kusdo. Imi teun takalgu, Jesús-e-nan-María tule-José-nugadbak aga kaka-ukchamal aga nikumalgal. Tenal José ampayo María-nikueddu, María taklegal Pab Purpa Nuedga pato ponigwal-kwichi. 19 Tenal José-María-macheredga-kuoed tule-nued-choggu, al José tulemal-wagin yapa María-opinkechegus. Al José otukal nabiridgin María-ebebi-kual.
20 Tenal José ampa María-ponigwal-kwichidgin-pinzhediidgin, Pab-angel Joséga kabdakedgin chunmanoni, Joséga chogal: “José-David-e-wagwa, imi pe akalzhul María-nikuo pe-omega kugal. Imi María-we-nuchu-nikuneed Pab Purpa Nuedga nikudanikid. 21 Tenal María nuchu-nikunonikil, machi-nikuo. Tenal pe we machi-nugzhao Jesús, ade iskued-akar e-tulemal-abonogo.”
22 Imi Maríaga tegin Joséga pel-kwapa weob immal kujaddin, Pab Tummad akpene e-kaka-palchogedbal iktualeba chogzhagujad-yopí kunoni. 23 Tenal Pab-kartagin chogzhado:
Imi puna-yae-walgwen-machered-kwen-wichulid
ponigwal-kwisgunoniko,
tenal we puna machi-toto-nikunoniko.
Tenal we machi nugzhalenoniko Emanuel.
(Wedin choglege: “Pab anmalbak kudii.”)
Is. 7:14
24 Tegin José kabmaid-akar atasgu, angel-ega-chogzhad-yopí imas. Al José Maríabak aga nikunonimalzhun. 25 Tenal José María-nikusgu, apka omega María-kwen-imaszhul. Tenal José María-machi-nikujad-cholbal kep omega María-imas. Tenal José we machi-nugzhaszhun, Jesús.