1 Tegin an takchabaldo, angel-pid Pab-neg-akar aktenoni. Tenal angel Nia-Kalu-Puled-e-llave kani-noni, tegin ezha-tub-tummad chunkalgin nai-nonibal.

2 Tegin angel nakpe-sagla-kasgu, tar-kugmas, pirka-miligwen oturdalegal. Imi nakpe-sagla-kalejad ampa nakpe-akpenegwad, tegin pimalbal, Nia-Sagla-Satanás. 3 Tegin angel nakpe-sagla-kugmasgu, Nia-Kalu-Puled-yabal tar-odos, tegin kalu-wanagak chaktis, tegin wanagak enirisbal nia-sagla melle iti-napkin tule-akal-akal-chunmamalad-yardagal, pirka-miligwen pél pelogedzhe.

Tenal pirka-miligwen-cholbal nia-sagla kalesmaid-akar keg-chulgu ichejal wis ololgunonibalo.

4 Tegin an takchabal, tulemal tummagan-kangin ampagunonimal. Tenal we tulemal igal-nika-ne, tulemalga igal-itogal. Tegin an tule-purpa-takchabal. Tenal we purpamal Pab-Jesúsbal-naigusmaladbal, tegin Pab-Jesús-kakagin-chunmadi-kujadbal, e-tukal-idiral-purkwismalad-tulemal.

Tenal tule-purpamal-an-takchaddin Pab Tummadyob pinas-kinnid tegin eyob-immal-chobaled-kwen-takchajulmalad, tegin pebegin, o chunkalgin pinas-e-wilub kwen abingaszhulmalad. Tenal we tule-purpamal-an-takchaddin kannan sanal tullenonimal. Tenal we tulemal-sanal-tullenonimaladdin Jesucristobak mes pirka-miligwen neg-takchamo.

5 Tenal we tulemal-sanal-tullenonimaladdin, kepe-tullesmalad-tule. (Tenal tule-pimalad-Pab-kwen-abingaszhul-purkwismaladdin, pal kwen tullegojul-kumalo, pirka-miligwen pelguedzhe.) 6 Tenal tulemal-kepe-tullemaloeddin, tule-chwilidikmalad. Tenal tule-chwilidikmaladga ib-nuedga kunoniko. Tenal we tulemal purkwed-pid pal kwen itogojulmal. Tenal we tulemal, tule-irwal Pab Tummadzhe, tegin Jesucristoje kolmalad-tule. Tenal tule-kepegin-kannan-tullesmalad Jesucristobak mes pirka-miligwen neg-takmalmogo.

7 Tegin pirka-miligwen pelgunonikil, nia-Satanás kep oturdalemaid-akar nomogo. 8 Tegin Satanás kep iti-nap-naid-ugakche tulemal-akal-akal-chunmaked-yardanoniko. Tenal Satanás Gog-tegin-Magog-tulemalzhe kolo ormagal, kep pila-imagalzhun. Tenal tule-pila-imanemalad íchejul nonimalo, termal-kakagin ukub-takedyob.

9 Tegin tule-pila-imanemalad madar nonimal, tegin tule-Pabbal-nanimalad mol-neg pukwadgin, tegin Pab-neg-kwebur-pilaled ebirismal. Tenal Pab-neg-akar cho apatnoni, tegin tule-pila-imanonimalad-Satanászhikmalad pél purkwismal. 10 Tegin nia-sagla-tulemal-yardajaddin azufre-kamaid-matagin metemal. Tenal we matagin akpene pinas-kinnid tegin Pab-kaka-palchoged-pinchegad melledmo. Tenal we walpágwad mutik-ibgin ilagwen-nadgu peyedzhe nunmakedgin wilego.

11 Tegin an takchabaldo, Pab errey-kan-tummad-chibugin chii, tulemalga igal-itogal. Tegin iti-nap tegin neg-nikpad, Pab-chiid-assapingusgu, ilgwen oweles-nadmal, pal kwen takchajulmal.

12 Tegin an takchabal, tulemal-pel-kwapa-purkwismalad, tummagan, tegin tule-polgana-ugakche, Pab-ol-kan-chibugin-chiid-abir kwigwismalmo.

Tegin angel kartamal egas, tule-iti-napkin-immalmal-imajad nermalejad. Tegin angel karta-pid egasbal. Tenal we kartadin tule-Pab-neggin-ilagwen-nadgu-megmaloed, e-nug nermakal-maid. Tegin Pab tule-purkwismaladga igal-itononigu, tule-e-nanajadbal pél nermalejadbal kin chogles, piaje sapejul oturdalego.

13 Tegin tule-termalgin-purkwismalad tegin tule-uangin-mamimalad, tegin tule-purkwal-maid-ulu-Hadesginmalad nonimalmo. Tegin Pab tule-ilbal, pel-kwapaga igal-itononi, tenal tule e-immal-imajadbal sapejul oturdalenonijun.

14 Tegin tule-purkwed-igal tegin tule-Hadesgin-mamikid-igaldin tar-metemal. Imi we cho-chagla-matadin tule-purkwed-ilbogid. 15 Tenal tule Pab-neggin-ilgwen-megmaloed-kartagin e-nug-nermakal-kwen-maichulmaladbal, tegin e-nug-onolejulidbal cho-chagla-mataje melledmalmogo.