2 Tesalonaeka
Nga Ruana Girigiringa ala Pol Fana Siosi Lo'oo 'i Tesalonaeka
Ngaia 'ame aburu mola 'i burina na'a la Pol 'e giria ebeeba eteeta fana Kristin lo'oo 'i Tesalonaeka, ma ngaia ka giria la'u mola ai lo'oo. Na alata no'ona, tani ta'a gila kwaifa'ananau na'a la Kraes 'e ori mai 'e sui no'o. Ngai na'a la Pol 'e fata folaa ai ngaia 'ame to'o. Ngaia 'e iiria 'i na'ona la Kraes te'e ori mai, ni 'ola 'e ria 'e aula te'e nigi, ma ta'a 'e aula tagila abulo 'ame le'a. Ngaia 'e iiria la'u mola nga Marimae ala Jisas Kraes te'e nigi mai. La Pol 'e fa'alataa wane lo'oo 'ania ‘Wane ne'e Mousia Tagi.’
La Pol 'e iiria fana Kristin lo'oo, 'agila ula tegela no'o 'ania fito'onga aaga, na alata irito'onga 'e nigi mai fana malangadalaga. Ma 'agila leka na taunga'inga, fana 'agila daria fangalaa faga 'i talaga, 'ilaka'u la Pol fe'enia rua wane ni kwaimaanga aana lo'oo gila agea. Ma 'agila leka fana agelana ni 'ola 'e le'a.
Ni 'ola taringa'i 'ubulana buka lo'oo:
Kwaifa'ananaunga suria nga orilana mai la Kraes (1:1—2:17)
Kwaifa'ananaunga suria taunga'inga fana Kristin fana agelai (3:1-18)
1
1 Meeru la Saelas fe'enia la Timoti mai 'inau la Pol, meeru giri kau famooru ta'a mooru tagoto'o lo'oo 'i Tesalonaeka, nga ta'a na God Mama'a adauru ma Alafa la Jisas Kraes.
2 'Ameeru meru fo'a fana God nga Mama'a adauru ma nga Alafa la Jisas Kraes 'ani kwatea kwailaeta'afiinga ma aloalonga famooru.
God te'e sufaa ta'a na alata la Jisas Kraes te'e ori mai
3 Ta'a ni futanga agu, ngaia 'e to'omia 'ameru baole'a fana God furifuri famooru. Ngaia 'e to'omia tofuna nga tagoto'onga 'amooru ne'e bila'o maka ba'ita, ma nga kwaimaanga 'amooru famooru kwairiu 'e bila'o maka ba'ita la'u mola. 4 Ma tofuna nga falafala 'amooru 'e 'ino'ona, 'imeeru meru alafuu le'a suri 'amooru fana ta'a gila tagoto'o na God lo'oo. Meru alafuu le'a suria nga akiaki'anga ma nga tagoto'onga 'amooru, gwa'a mooru moru ka daria nga 'ato'atolanga 'e aula, ma ta'a gila malate'ote'o 'amooru suria nga tagoto'onga amooru.
5 Alata moru ula tegela na tagoto'onga amooru, gwa'a moru daria nga 'ato'atolanga 'e aula, ngaia 'e faate'enia na'a kwaisufaingaa na God fana ta'a te'efou 'e odo. Ngaia te'e kwatea 'amoru to'omia no'o fana to'orunga 'ubulana foufounga aana, na'a gila malate'ote'o 'amooru tofuna. 6 Ma kwaisufaingaa na God 'e odo, suria ngaia te'e kwatea nga nonifiinga fana ta'a na'a gila fa'anonifii 'amooru tala'ina lo'oo. 7 Ma ngaia te'e lafua no'o nonifiinga fa'asi 'amooru mai 'ameeru la'u mola. Ngaia te'e agea 'ilo'oo na alata na nga Alafa la Jisas te'e ori mai fa'asia 'i Langi fe'enia nga enselo aana. 8 Ngaia te'e leka mai fe'enia eele ba'ita ma ka kwatea kwa'ikwa'inga fana ni dai na gila ma'asini te'enia God ma gila 'ame lo'o suria nga Kwairiinga Le'a lo'oo suria nga Alafa adauru la Jisas. 9 Nga kwa'ikwa'inga aana faga na ngaia te'e malangadaga furifuri. Ma gila ka nana'i lalau fa'asia nga Alafa fe'enia nga kwangakwanganga ma nga tegelangaa ba'ita aana. 10 Ma nga 'ola lo'oori te'e lau na fe'e gani na'a nga Alafa te'e ori la'u mai. Ngaia te'e ori la'u mai fana nga ta'a aana, 'agila fa'aba'itaa, ma 'agila iiri ba'ita ana. Ma tamoru nana'i fe'eniga la'u mola na gani no'ona, tofuna mooru moru tagoto'o na nga kwairiinga lo'oo na'a meru kwairii 'ania famooru.
11 Ngaia lo'oo, 'imeeru meru fo'a famooru furifuri. Meru fo'a fana God 'ani launge'enia abulongaa amooru 'ani to'omia nga mooringa na'a ngaia 'e firi 'amooru fai. Ma 'imeeru meru fo'a la'u mola fana nga tegelangaa aana 'ani booni 'amoru fana 'amoru su'asuria agelana 'ola 'e le'a na'a mooru moru siria agelai. Mooru moru siria agelana 'ola 'e le'a lo'oori tofuna moru tagoto'o ala Jisas. 12 Meeru fo'a 'ilo'oo fana 'amoru taafea nga Alafa adauru la Jisas, ma ngaia te'e tafe 'amooru la'u mola. Ma ni 'ola lo'oo te'e lau suria nga kwailaeta'afiinga na God ma nga Alafa la Jisas Kraes.