1 Kwiztane Jesúsne Galilea Pi kwakara ɨrɨt. Sun pine Tiberiaskas mun. 2 Kwisha akkwan awane ussa kanpaara, iztasparɨt kal kirɨt aizpa izara akwa. Akkwan ishturuza kakulninnara. 3 Suasne Jesúsne ɨzara nut kit sua uzta paiña kammuruzkasa. 4 Pascua pishta, Judío awaruzpa pishta, kasha pamtu. 5 Akkwan awa ussa kanpararuza iznarawane, Jesúsne Felipera kaiz kit mɨmara:

—¿Mɨntama kumira paina ɨanapai, wan awa kuanapa?

6 Usne kaizta, sun Felipe chi kizkwarakas mɨna. Jesúsmin us kishimtu aizpa wat pian. 7 Suasne Capernaum pɨpulura ɨamtuasmin, Felipene ussa sɨnkara:

—Mɨnpazha paas cien payu kal kitne, kumira paisachi, wanta pitchin nailnana.

8 Andrésne sua tuazi. Uskasa mamaz kammumika azi. Usne Simón Pedrowa aimpihsh. Suasne usne kaizta:

9 —Akkine maza ampu pashpa panai. Usne cinco chara pippa pankas paas pishkaru iltakas mɨji. Sun nailtane, wan awa kuasachi.

10 Suasne Jesúsne ussa kaizta:

—Wan awaruza uztain kiznari.

Suain akkwan pɨt sau pura. Cinco mil ampuruzpain sua uzara. Ashamparuzkas pashparuzkas uspakasa uzara. 11 Suasne Jesúsne pan sap kit Diosta aishtaish kizta. Sun kiztawane, kammuruza kwinnara. Paiña kammuruzne wan uztuza nailnara. Kawarain pishkarukas nailnara, kwashimtu aizpa kuanapa. 12 Wan tukkarakane, Jesúsne paiña kammuruza kaiznara:

—Chiwazha pitti pak tizka chaktain, chinkas kamanpa.

13 Cinco chara pippa sarɨt pantas tizat akwa, uspane pitti pitti sakkat kit doce tɨmta winñara. 14 Suasne Jesús iztasparɨt kal kirɨt aizpa izarawane, awane kaizara:

—Watcha. Usne Dios pit kainammmika i. Diosne ussa kin nam kit au sukin ɨninta.

15 Suasne Jesúsne awa minñamtu aizpa nɨjkulta. Uspane ussa paiña mikwa namninashimtu. Usne mamasa kwash ɨzara usparuztas paimpa ɨrɨt, mazain tuan.

16 Amta parɨka, Jesúspa kammuruzne aiz pira kihshat kit 17 maza kanuara waat kit aiz pi kwakkamɨzta, Capernaum pɨpulura piannana. Tɨlkwil parɨt me. Jesúsne mama uspa tukin kailtachi. 18 Suasne tɨnta inkwa pamɨzta. Aiz pikas tɨnta kialmɨzta. 19 Cinco o seis kilómetros ɨarawane, uspane Jesústa kasha amtu izara. Usne pi ɨsalpara chara. Uspane ishkuara, ira izpulta izara mintɨt akwa. Jesús kwinta kinarawane, uspane ussa piankamara. 20 Jesúsne kaiznara:

—Na ish. Ishkuman.

21 Suasne uspane ussa kanuara wat sappara. Sun urain sun pilta ɨamtura pianaara.

22 Tɨlawara pãn puzmukin pimamin puraruzne kammuruz maza kanuawara ɨara pian. Suane maza kanua wa chi. Uspane Jesús uspakasa ɨtchira pian. 23 Sun urain mamaz kanuaruz Tiberias pɨpulu suras pianaara. Sun sukin Jesúsne Diosta aishtaish kiz kit pan nailnara, awa pan kuanapa. 24 Jesúskas paiña kammuruzkas purachira piankamtawane, awane sun kanuaruza waat kit Capernaum pɨpulura ussa saina ɨara.

25 Kwakara pianaakane, uspane Jesústa wanmalat kit mɨmaara:

—Kamtam, ¿Miza ura apa pianarau?

26 Jesúsne sɨnkanat kit kaiznara:

—Watcha kaiznamtus. Une nawa sayamtu, u tuknakima kuat akwa. Nawa sayamtuchi, na iztasparɨt kal kirɨt aizpa piankamta akwa. 27 Chiwazha pailtɨmtu aizpa saikain. Chiwazha pailmuchi aizpa sairain, uruza pailta payu uzninanapa. Nawa chiyuras Ampura sairain, u we mɨj aizpa sappanapa, pailta payukima uzanapa. Ap Taitta Diosne nawa narɨt kit paiña kal kinpa kiwainta.

28 Suasne ussa mɨmaara:

—¿Aune chima kianapai, Dios pashimtu aizpa kin?

29 Jesúsne sɨnkanat kit kaiznara:

—Dios pashimtu aizpa kiarawa. Une nawa, Dios ɨnintamikasha, nɨjkularawa.

30 Suasne sɨnkaara:

—¿Chiwazha iztasparɨt kal izninchain, nua nɨjkulanapa? ¿Chi kalma au akwa kinash? 31 Au an ñamin kwalne pul sukin maná kumira kuara. Sunkana Dios pɨnkɨhta parɨt: “Diosne usparuza chiyuras kumira kwinnara.”✡Sal 78.24 ¡Au iztakin sunkana iztasparɨt kal kiri!

32 Jesúsne sɨnkanara:

—Watcha kaiznamtus. Moisésne uruza chiyuras kumira kwinnarachi. Ap Taittain sun watcha chiyuras kumira uruza kwinnara. Sun pankana, nane awaruza chiyura uzninnashina. 33 Dios maná kumira kwinarakas, usne chiyuras kihshtamikasha ɨninta, awaruza uzninnanapa.

34 Suasne uspane paikuara:

—Anpat. Aumɨza an kumira kwinchain, pailta payukima uznapa.

35 Jesúsne kaiznara:

—Nane Diostas kumirakanain ish. Nane uruza pailta payu uzninnashinas. Nawa amtumikane mizurainkas we nɨjkulanazi, Diosta piankamtu akwa. Nawa nɨjkultumikane pailta payukima Diospa kamshina, Diosta an piankamshimtu akwa. 36 Ñamin sunpa uruza kaiznara. Nawa izarakas, une nawa nɨjkulamtuchi. 37 Wan ap Taitta nawa mɨlamturuzne nawa aamtu. Nane nawa attuza sapnanash, usparuza ap izmuruz namanapa. 38 Nane chiyuras kihshtau. Na kishimtu aizpa kimtuchish. Ap Taitta nawa ɨninta akwa, nane us pashimtu aizpa kishimtus. 39 Ap Taitta nawa ɨninta aizpa kinash, us nawa mɨlattuza kamanpa. Nane minpa payura usparuza irɨttas kuhsninnanash. 40 Ap Taittane, nawa ɨnintamikane, sun kishimtu, wan awa Dios painkulta izat kit nɨjkulanapa, pailta payukima uzanapa. Suasne minpa payura usparuza irɨttas kuhsninnanash.

41 Suasne Judío awa ɨninturuzne Jesúspa kwail kizamɨzta, “Nane chiyuras taizta kumira ish” kizta akwa. 42 Usparuzpain kaizara:

—An ampune Jesús i. Joséwa painkul i. Aune paiña papihshtakas akkuhshtakas pianmakpas. ¿Mizama ka kiztui, “Usne chiyuras kihshta?”

43 Suasne Jesúsne sɨnkanat kit kaiznara:

—Uruzpain nawa kain kwail kizman. 44 Ap Taittane, nawa ɨnintamika i. Dios awaruza nawa karamtukine, mɨnminkas nawa asachi. Nane nawa atmikasha minpa payura kuhsninnash. 45 Dios kainammmikane pɨnkɨhta ka parɨt: “Diosne wanta kamtananazi.”✡Is 54.13 Sunkana Taittara mɨamturuzkas us kamtara aizpa piankamturuzkas nawa aanazi.

46 Mɨnminkas mizurainkas Taittara iztachi. Mazain, Diostas atmikain, Taittara izta. 47 Watcha kaiznamtus. Nawa nɨjkulamtumikane pailta payukima uznazi. 48 Nane kumirakanain ish, awaruza uzninana. 49 U ñancha kwal pul sukin maná kumira kuarakas, wanne iarɨt. 50 Nane chiyuras kumirawa paranamtus. Mɨnpazha ussa saptane, mizurainkas imanazi. 51 Nane an kumira chiyuras taizta aizpa ish. Nawa saptumikane pailta payukima uznazi. Na kumira kwintu aizpa ap ña i. Nane ap ña kwinnanash, wan awa uznanapa.

52 Katmizna Judío awa ɨninturuzne Jesúspa tɨnta kwinta kiat kit usparuzpain kaizara:

—An ampune ¿Mizama paiña ña kwinshina, au kuwiznapa?

53 Jesúsne kaiznara:

—Watcha kaiznamtus. Na u akwa irɨkane, ap aimpi puznazi. Nawa chiyuras ampura saptukine, une watcha uzamanazi. 54 Nawa saptumikane pailta payukima uznazi, na us akwa irɨt akwa, ap aimpi us akwa puztɨt akwa. Nane minpa payura ussa kuhsninnash. 55 Ap ñane watcha kumirakanain i. Ap aimpikas watcha kwazikanain i. 56 Na u akwa irɨt akwa, nawa saptumikane nakasa wanmaktu. Nakas uskasa wanmalnash. 57 Ap Taittane, nawa ɨnintamikane, uztu. Nakas us akwa uztus. Sunkanain nawa sapturuzne na akwa uzanazi. 58 Nane chiyuras amtumikawa paramtus. Nane pankanain namtɨt ish. U ñancha kwal sun kumirakana kuarachi. Sun maná pan kuarakas, kwiztane iara. An chiyuras amtumikasha sapturuzne pailta payukima uzanazi.

59 Jesúsne Capernaum pɨpulura Judío kamtam yalkin sun kamtanara.

60 Sun kamtam mɨarawane, akwan Jesústa kanpamtuzne ka kaizara:

—An kamtam pit kwisha sam i sapna. ¿Mɨnma sun pit mɨshinai?

61 Jesúsne paiña kanpamtuz kain kaizamtu aizpa piankam kit mɨmanara:

—¿Ap kamtam mɨasachimakkiwas? ¿Nawa chɨhkashimtumakkiwas? 62 Nane chiyuras ampune an ñamin ap uzmukin uztau. U mamasa nawa chiyura numtu izarane, ¿Chima minñamtuas? 63 Diospa Izpulmin awaruza uzninnamtu. Awain sun kisachi. Ap pit uruza kaiznamtu: “Diospa Izpulne awaruza uzninnashina.” 64 Mama mɨnpazha ukis nawa nɨjkulamtuchi.

An ñamin Jesúsne nɨjkultuchiruzakas ussa chɨhkamtumikashakas piankam 65 kit kaizta:

—Sun akwa nane uruza ka kaiznarau: “Ap Taitta mazara karamtuchine, mɨnminkas nakin asachi.”

66 Sun urain akkwan paiña kanpamtuzne Jesústa kwaiyat kit uskasa cɨhkaarazi. 67 Suasne Jesúsne paiña doce kammuruza mɨmanara:

—¿Ukas ɨshimuskiwas?

68 Simón Pedrone sɨnkara:

—Anpat. ¿Mɨnama kanpana ɨpai? Up pitne aumɨza uznintu. 69 Aune nua nɨjkultamakpas me. Aune nua piankamtamakpas. Nune Cristo i. Nune Diospa sɨnammika i.

70 Jesúsne sɨnkanara:

—Nane u doceruza nanaraish. Mazane ukis nawa alizmika i.

71 Sun kizka, Jesúsne Judas Iscariotewa, Simónpa painkulpa, paranara. Judasne doce kammuruztas azi. Jesústa kanpamtukas, ussa chɨhkashina.