5
Pɨnkɨh parɨt aizpakas pɨrikukas
1 Suasne Diosta us uzmukin uztu iztau. Usne paiña numal chihtɨ pamans parɨt iptɨt pɨnkɨh mut kit uzara. Sun iptɨt pɨnkɨh sietekima pustɨt. 2 Maza tɨnta ángeltakas iztau. Usne tɨnta ka mɨmara: “¿Mɨnma wat awa an iptɨt pɨnkɨh nakpiz kit izshinasa?” kizta. 3 Mɨnminkas chiyuraskas, mɨnminkas pilmal uztuzkas, mɨnminkas pil ayuktaskas iptɨt pɨnkɨh nakpizmanamtɨt. Mɨnminkas pɨnkɨhta parɨt aizpa izmanamtɨt. 4 Mɨnminkas pɨnkɨhta nakpizna saimanamtɨt. Mɨnminkas sun pɨnkɨhta iztuchi akwa, nane tayal kit tɨnta aztu arau. 5 Mazane ɨlaparuztas nawa sunkana kaizta: “Anneme azmun. Izti. Cristone, ishu muntɨtmikane, at kit paiña aliztuza anuppanara. Judáwa kwalkas ɨninmika Davidwa kwal i. Sun iptɨt pɨnkɨhne sietekima pusta. Usmin nakpiz kit izshinai,” kizta.
6 Nane sun pɨriku tɨrɨtkana Dios ɨninmu uzkin iztau. Usne ampara uztuz uzkinkas, ɨlaparuz uzkinkas kunta. Usne siete pulkas siete kasukas waj. Paiña kasu Dios sɨnam Izpulkanain iztɨt i. Paiña kasune wan sura iznamtu. 7 An Pɨrikune Dios uzkin ɨt kit paiña numal chihtɨkis sun iptɨt pɨnkɨh sapta. 8 Iptɨt pɨnkɨh saptawane, ampara uztuzkas veinticuatro ɨlaparuzkas Pɨriku kunkin wakpuj wainñara. Uspa wantuzne guitarrakanain mumazi. Uru wazkas, tɨ puzpi inciensokana impaktamtu mumazi. Nɨjkulturuz Diosta paikukane, uspa paikumtu aizpa tɨ puzpi inciensokana iztɨt. 9 Uspane masas kanta kaiz kiara:
“Nune sun iptɨt pɨnkɨh sap kit
sun pɨnkɨh sietekima pustɨt nakpiz kit izshinai.
Nu au akwa piantarɨt akwa,
up aimpi puzta akwa, Diosne wan awaruza mamaz pit paramtuza, kwailtas painara,
awa kwail kiarɨt aizpa sɨnam sananapa, Dioskasa uzanapa.
10 Nune usparuza akwanara, pariya namanapa, Diospa kal kianapa.
Nune usparuza uspa kal chɨhkanazi,
an sukin ɨninanapa.”
11 An kwiztane nane akkwan ángeltuza mɨnat kit iznarau. Sun ángeltuzkas, sun ampara uztuzkas, sun ɨlaparuzkas katsa mikwa ɨninmukin salpɨnwal kunarɨt. Akkwan ángel pura akwa, nane mizurainkas wiansachish. 12 Uspane ka tɨnta paranara:
“An Pɨrɨkune au kwail akwa irɨt akwa, aune sunkana kaizarawamakpas:
‘Usne wantuza ɨninnashinai.
Wan chiwal pian i. Wan chiwal mɨj. Tɨnta mika i.
Awa us kaizta aizpa mɨarawa. Usne wari’ kizarawa.”
13 Nane wan chiyura uztuzakas, an pilkin uztuzakas, pil ayukta uztuzakas, wan pira uztuzakas mɨrau. Sunkana kanta kaizara:
“Katsa ɨninmukin uztumikashakas Pɨrikurakas ‘uspa paas kwisha wari’ kiztawamakpas.
Uspa kaizamta aizpa mɨarawamakpas. Uspa paas tɨnta wai i.
Pailta payukima ‘kwisha wari’ kizarawamakpas.”
14 Ampara uztuzkas ka kizara: “Uspa kaizara aizpa watcha i,” kizara. Sun veinticuatro ɨlaparuzkas Dios uzkin wakpuj wainñara.