କରନ୍ତି ମଣ୍ତଳୀ ନିମନ୍ତେ ପାଉଲଙ୍କ ଲିଖିତ ପ୍ରଥମ ପତ୍ର
କରନ୍ତି କୁଲମିତାକି ପା଼ୱୁଲ ରା଼ଚାମାନି ର଼ ଲମ୍ବର ଆ଼କୁ
ମୂଲୁ ହା଼ଡା
କରନ୍ତି କୁଲମିତି ର଼ ଲମ୍ବର ଆ଼କୁ ପାଣ୍ତ୍ୱିଆ଼ହାମାନି ପା଼ୱୁଲ ତା଼ଣାଟି ଜୀସୁ କ୍ରୀସ୍ତତି ଜାର୍ନାତି ୫୫ ବାର୍ସା ଜେ଼ଚ ରା଼ସ୍କି ଆ଼ହାମାଚେ ୧:୧ । ପା଼ୱୁଲ ତା଼ଣାଟି ରା଼ସ୍କି ଆ଼ହାମାନି ଜ଼ଡ଼େକା ଆ଼କା ବିତ୍ରାଟି ଈଦି ଆ଼ହିମାନେ ର଼ ଲମ୍ବର ଆ଼କୁ । ଏ଼ୱାସି ଏପିସିୟତା ମାଚିବେ଼ଲାତା ଈ ଆ଼କୁ ରା଼ଚା ମାଣ୍ମ୍ବିତେସି ୧୬:୫-୯ । ମାକିଦନିୟାଟି କରନ୍ତିତା ହାଜାଲି ମ଼ନ କିନି ନ଼କେଏ ଈ ଆ଼କୁ ରା଼ଚାମାଚେସି ।
ପା଼ୱୁଲ ଈ ଆ଼କୁତା କୁଲମି ଗଚି ଗଚି ଆ଼ନାୟି ଲାଗେଏତି କାମାତି ଜୂପ୍କା ତଲେ ହା଼ରେକା ପା଼ପୁ କାମା ଆ଼ହିମାନାଣି କୁଲମିତି ଲ଼କୁ ତା଼ଣାଟି ୱେଞ୍ଜାନା ୱେଣ୍ତେ ୱେସାଲି ମ଼ନ ହୀହିମାନେସି । କରନ୍ତି ଗା଼ଡ଼ା ଲାଗେଏ ପ଼ଲେଏ ପା଼ପୁ କାମାୟାଁ କିହିମାନାୟି ୱେ଼ଙ୍ଗାମାଚେ । ଇଞ୍ଜାଁ ଗା଼ଡ଼ାତା ମାଚି କୁଲମି ହା଼ରେକା କାଙ୍ଗାଲା ଆ଼ହିମାଚେରି । ଏ଼ଦାଆଁ ଅଣ୍ପାନା ଏ଼ୱାରାକି ତିନା ଉନାଣି, ବୀହା ଆ଼ନାଣି ଅ଼ଡ଼େ କିନାଣି, ହା଼କି ଅ଼ଡ଼େ ୱେଣ୍ତେ ନିଙ୍ଗିନାଣି, ସାତା ଜୀୱୁନ଼ନାୟି ଏ଼ନାୟି ଈ ବାରେ କାତା ଆ଼କୁତା ରା଼ଚାନା ତ଼ସାମାନେସି ୧୩ ।
ପତିତା ମାନାୟି
୧. ଜହରା କିହାନା ପୁଣ୍ମ୍ବିକିନାୟି । ୧:୧-୯
୨. କୁଲମିକା ଗଚି ଆ଼ନି କାତା ଜା଼ପ୍ନାୟି । ୧:୧୦–୪:୨୧
୩. ଲାଗେଏତି ପା଼ପୁ କାମା ଅ଼ଡ଼େ ଦାୱାକିନି କାତା । ୫:୧–୬:୨୦
୪. ବୀହା, ପେ଼ଣ୍କା ବମାୟାଁତି ବ଼ଗୁ, ଜାଟୁ ଆ଼ହାନା ପ୍ରା଼ତାନା, ସୁଦୁଜୀୱୁତି ଦା଼ନା, ଇଞ୍ଜାଁ ୱେଣ୍ତେ ନିଙ୍ଗିନି କାତା । ୭:୧–୧୫:୫୮
୫. ଲେ଼ମ୍ବିନି କାତା, ଜାହାରା ଅଣ୍ପୁ ଇଞ୍ଜାଁ ରା଼ପ୍ନାୟି । ୧୬
୧
୧ ନା଼ନୁ ପା଼ୱୁଲ, ମାହାପୂରୁତି ମ଼ନତଲେ କ୍ରୀସ୍ତ ଜୀସୁ ତା଼ଣାଟି ଆ଼ଚାନା ପାଣ୍ତ୍ୱି ଆ଼଼ହାମାନାତେଏଁ, ଅ଼ଡ଼େ ମା଼ ତାୟି ସସ୍ତିନା ତଲେ, ୨ ✡କାମା ୧୮:୧କରନ୍ତି ଗା଼ଡ଼ାତା ମାନି ମାହାପୂରୁ କୁଲମିତାକି ଈ ଆ଼କୁ ରା଼ଚିମାନେରି; ଆମିନି ବାରେଜା଼ଣା ଏ଼ୱାରିତା଼ଣା, ପ୍ରବୁ ଜୀସୁ କ୍ରୀସ୍ତ ଦ଼ରୁତଲେ ପ୍ରା଼ତାନା କିହିମାନେରି, ଏ଼ୱାରିତଲେ କ୍ରୀସ୍ତ ଜୀସୁ ତା଼ଣା ସୁଦୁ ଆ଼ହାନା ହା଼ଟ୍କି ଆ଼ହାମାନି ମାହାପୂରୁ ଲ଼କୁତେରି ମୀରୁ ।
୩ ମିଙ୍ଗେତାକି ମା଼ ଆ଼ବା ମାହାପୂରୁ ଅ଼ଡ଼େ ପ୍ରବୁ ଜୀସୁ କ୍ରୀସ୍ତ ତା଼ଣାଟି କାର୍ମାମେହ୍ନାୟି ଅ଼ଡ଼େ ହିତ୍ଡ଼ି ଆ଼ପେ ।
କ୍ରୀସ୍ତ ତା଼ଣାଟି ବ଼ର
୪ କ୍ରୀସ୍ତ ଜୀସୁ ତା଼ଣାଟି ମିଙ୍ଗେ ହୀହାମାଞ୍ଜାନି ମାହାପୂରୁତି ଆମିନି କାର୍ମାମେହ୍ନାୟି, ଏ଼ଦାଆଁତାକି ନା଼ନୁ କା଼ଲେଏ ମିଙ୍ଗେତାକି ମାହାପୂରୁଇଁ ଜହରା କିହିମାଇଁ, ୫ ଏ଼ନାଆଁତାକି ଇଚିହିଁ ଏ଼ୱାଣି ତା଼ଣା ବାରେ କାତାତା, ହା଼ରେକା କିହାଁ ବାରେଲେହେଁତି ଜା଼ପ୍ନି ତା଼ଣା ଅ଼ଡ଼େ ବାରେଲେହେଁତି ବୁଦିତା ମୀରୁ ଗାଡି ବାତ୍କା ମାଞ୍ଜେରି; ୬ ଇଲେଆ଼ହିଁ କ୍ରୀସ୍ତତି ସା଼କି ମୀ ତା଼ଣା ତୀରି ଆ଼ହାମାନେ । ୭ ଈଦାଆଁତାକି ମୀରୁ ମା଼ ପ୍ରବୁ ଜୀସୁ କ୍ରୀସ୍ତତି ତ଼ଞ୍ଜା ଆ଼ହାଲିତାକି କା଼ପୁ କା଼ଚାନା ଏ଼ନି କାର୍ମାତି ଦା଼ନାତା ଊଣା ଆ଼ହାହିଲଅତେରି; ୮ ମା଼ ପ୍ରବୁ ଜୀସୁ କ୍ରୀସ୍ତତି ଦିନାତା ଏ଼ନିକିଁ ମୀରୁ ଦ଼ହ ହିଲାଆଗାଟାତେରି ଆ଼ଦେରି, ଈଦାଆଁତାକି ଏ଼ୱାସି ମିଙ୍ଗେ ରା଼ନି ଦିନା ପାତେକା ତୀରିକିହା ଇଟାନେସି । ୯ ମାହାପୂରୁ ନାମୁଗାଟାସି, ଆମ୍ବାଆରି ତା଼ଣାଟି ମୀରୁ ତାନି ମୀର୍ଏସି ଜୀସୁ କ୍ରୀସ୍ତ, ମା଼ ପ୍ରବୁ ତା଼ଣା ଆଣ୍ତିନାଣାକି ହା଼ଟ୍କି ଆ଼ହାମାଞ୍ଜେରି ।
ନାମିତି କୁଲମି ବିତ୍ରା ଗଚି ଆ଼ନାୟି
୧୦ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ମା଼ ପ୍ରବୁ ଜୀସୁ କ୍ରୀସ୍ତ ଦ଼ରୁତଲେ ନା଼ନୁ ମିଙ୍ଗେ ବାତିମା଼ଲିମାଞ୍ଜାଇଁ, ଏ଼ନିକିଁ ମୀରୁ ବାରେଜା଼ଣା ତେରି ରଣ୍ତିଏ କାତା ଜ଼ଲିଦେରି, ଅ଼ଡ଼େ ମୀ ବିତ୍ରା ଗଚି ଆ଼ଅତେରି, ସାମା ମୀରୁ ରଣ୍ତିଏ ମ଼ନ ରଣ୍ତିଏ ଅଣ୍ପୁ ତଲେ କା଼ଲ୍ୱି ଆ଼ଦୁ । ୧୧ ଇଚିହିଁ, ଏ଼ ନା଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, କ୍ଳୟିତି କୁଟମିଟି ମୀ କାତା ନା଼ ତା଼ଣା ଈଦି ତ଼ଞ୍ଜା ଆ଼ହାମାନେ, ମୀ ବିତ୍ରା ଗଡ଼୍ହା ମାନେ । ୧୨ ✡କାମା ୧୮:୨୪ନା଼ନୁ ୱେସ୍ତାନି କାତା ଈଦି, ମୀ ବିତ୍ରାଟି ଆମ୍ବା ଆମ୍ବାଆରି ଏଲେଇନେରି, ନା଼ନୁ ପା଼ୱୁଲ ୱାକି ତାତେଏଁ, ଇଞ୍ଜାଁ ଆମ୍ବାଆରି ନା଼ନୁ ଆପଲ ୱାକି ତାତେଏଁ, ନା଼ନୁ କେ଼ପା ୱାକି ତାତେଏଁ ଅ଼ଡ଼େ ଏଚରଜା଼ଣା ନା଼ନୁ କ୍ରୀସ୍ତ ୱାକି ତାତେଏଁ ଇଞ୍ଜିଁ ମାନେରି । ୧୩ କ୍ରୀସ୍ତ ବା଼ଗା ଆ଼ହାମାନେସି କି ? ମିଙ୍ଗେତାକି ପା଼ୱୁଲ କି ପା଼ସି ମୁଣ୍ତାତା ହା଼ହାମାନେସି ? ଆ଼ଆତିଁ ମୀରୁ କି ପା଼ୱୁଲ ଦ଼ରୁତଲେ ବାପ୍ତିସ୍ମ*ମୁଞ୍ଜିନାୟି ଅ଼ହାମାଞ୍ଜେରି ?
୧୪ ✡କାମା ୧୮:୮; କାମା ୧୯:୨୯; ରମି ୧୬:୨୩ଈଦାଆଁତାକି କ୍ରିସ୍ପ ଅ଼ଡ଼େ ଗାୟ ପିସ୍ପେ ମୀ ବିତ୍ରା ଆମ୍ବାଆରାଇଁ ଜିକେଏ ବାପ୍ତିସ୍ମ†ମୁଞ୍ଜିନାୟି ହୀହାହିଲଅଁ ଇଞ୍ଜିଁ ନା଼ନୁ ମାହାପୂରୁଇଁ ଜହରା କିହିମାଇଁ, ୧୫ ଏଚେ଼ତା ମୀରୁ ନୀ ଦ଼ରୁତଲେ ବାପ୍ତିସ୍ମ‡ମୁଞ୍ଜିନାୟି ଅ଼ହାମାଇଁ ଇଞ୍ଜିଁ ଆମ୍ବାଆରି ଏଲେଇଞ୍ଜଅରି । ୧୬ ✡୧କର ୧୬:୧୫ଅ଼ଡ଼େ ସ୍ତିପାନତି କୁଟମିଇଁ ଜିକେଏ ବାପ୍ତିସ୍ମ§ମୁଞ୍ଜିନାୟି ହୀହାମାଇଁ; ଈୱାରି ପିସ୍ପେ ନା଼ନୁ ଅ଼ଡ଼େ ଆମ୍ବାଆରାଇଁ ବାପ୍ତିସ୍ମ*ମୁଞ୍ଜିନାୟି ହୀହାମାଇଁ ଇଞ୍ଜିଁ ନା଼ ଅଣ୍ପୁତା ହିଲେଏ । ୧୭ ଇଚିହିଁ କ୍ରୀସ୍ତ ନାଙ୍ଗେ ବାପ୍ତିସ୍ମ†ମୁଞ୍ଜିନାୟି ହୀହାଲିତାକି ପାଣ୍ତାମାଞ୍ଜଅସି, ସାମା ନେହିଁ କାବ୍ରୁ ୱେସାଲି ପାଣ୍ତାମାଞ୍ଜାନେସି; ଏ଼ଦି ଜିକେଏ ବ଼ଲୁତି ରା଼ହାଁ କିନି ତା଼ଣା ଆ଼ଏ, ଏଚେ଼ତା ପାଟେ କ୍ରୀସ୍ତତି ପା଼ସିମୁଣ୍ତା ଉଜେଏ ଆ଼ନେ ।
କ୍ରୀସ୍ତ ମାହାପୂରୁତି ବା଼ଡ଼୍ୟୁ ଅ଼ଡ଼େ ବୁଦି
୧୮ ଇଚିହିଁ ନା଼ସା ଆ଼ହିମାନି ଲ଼କୁତାକି ପା଼ସି ମୁଣ୍ତାତି କାତା ଉଜେଏତାୟି, ସାମା ଗେଲ୍ପି ଆ଼ହିମାନି ମା଼ ବାରେଜା଼ଣା ତାକି ଏ଼ଦି ମାହାପୂରୁତି ବା଼ଡ଼୍ୟୁ । ୧୯ ଈଦାଆଁତାକି ରା଼ସ୍କି ଆ଼ହାମାନେ,
“ନା଼ନୁ ବୁଦିଗାଟାରି ବୁଦି ନାସୱି କିଇଁ,
ଅ଼ଡ଼େ ବୁଦିଗାଟାରି ବୁଦି ଅ଼ପଅଁ ।”
୨୦ ବୁଦିଗାଟାରି ଆମ୍ବିୟା ? ମେ଼ରା ଜା଼ପ୍ନାରି ଆମ୍ବିୟା ? ଈ ଜୁଗୁତି କାତା କାଟୱିକିହାଁ ୱେହ୍ନାରି ଆମ୍ବିୟା ? ମାହାପୂରୁ କି ଦାର୍ତିତି ବୁଦିଇଁ ଉଜେଏତାୟି ଇଞ୍ଜିଁ ୱେସାହିଲଅସି ?
୨୧ ଇଚିହିଁ ମାହାପୂରୁତି ବୁଦି ତ଼ଞ୍ଜାଆ଼ହାମାଚି ଜିକେଏ ଦାର୍ତି ଜାହାରା ବୁଦିତଲେ ମାହାପୂରୁଇଁ ପୁନାଆତାକି ମା଼ମ୍ବୁ ୱେ଼କ୍ହାମାନି କାତା ଉଜେଏତାୟି, ଆ଼ତିଜିକେଏ ନାମୁ ଗାଟାରାଇଁ ଗେଲ୍ପାଲିତାକି ମାହାପୂରୁ ଅଣ୍ପିତେସି । ୨୨ ଇଚିହିଁ ଜୀହୁଦିଙ୍ଗା ସିନା ପାରିନେରି, ସାମା ଗ୍ରିକ୍ ଲ଼କୁ ବୁଦିତି ପାରିନେରି । ୨୩ ସାମା ମା଼ମ୍ବୁ ପା଼ସି ମୁଣ୍ତାତା ହା଼ତି କ୍ରୀସ୍ତତି କାତା ୱେ଼କ୍ହି ମାନମି, ଏ଼ୱାସି ଜୀହୁଦି ଲ଼କୁତାକି ସାତ୍ରୁ ଲେହେଁତାସି ଅ଼ଡ଼େ ଜୀହୁଦିଆ଼ଆତି ଲ଼କୁତାକି ବୁଦି ହିଲାଆଲେହେଁ । ୨୪ ସାମା ଜୀହୁଦି ଆ଼ପାରି କି ଜୀହୁଦିଆ଼ଆତାରି ଆ଼ପାରି, ଆମ୍ବାଆରି ହା଼ଟ୍କି ଆ଼ତାରି, ଏ଼ୱାରାକି କ୍ରୀସ୍ତ ମାହାପୂରୁତି ବା଼ଡ଼୍ୟୁ ଅ଼ଡ଼େ ମାହାପୂରୁତି ବୁଦି ଲେହେଁ । ୨୫ ଇଚିହିଁ ମାହାପୂରୁତି ବୁଦି ହିଲାଆଗାଟାୟି ମାଣ୍ସିୟାଁତି ବୁଦି କିହାଁ ହା଼ରେକା ବୁଦି, ଅ଼ଡ଼େ ମାହାପୂରୁତି ଆ଼ଡାଆ ଗାଟାୟି ମାଣ୍ସିୟାଁତି ବା଼ଡ଼୍ୟୁ କିହାଁ ହା଼ରେକା ବା଼ଡ଼୍ୟୁ ଗାଟାୟି ।
୨୬ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କା ମିଙ୍ଗେ ହା଼ଟାମାନି କାତା ଅଣ୍ପାଦୁ, ଦାର୍ତିତି ଲ଼କୁତି ଅଣ୍ପୁ ଲେହେଁ ହା଼ରେକା ବୁଦିଗାଟାରି, ହା଼ରେକା ବା଼ଡ଼୍ୟୁ ଗାଟାରି, କି କାଜା କୂଡ଼ା ଗାଟାରି ହା଼ଟ୍କି ଆ଼ହାହିଲଅରି; ୨୭ ଏ଼ଦାଆଁତାକି ମାହାପୂରୁ ବୁଦି ଗାଟାରାଇଁ ଲାଜା କିହାଲିତାକି ଦାର୍ତିତି ବୁଦି ହିଲାଆଗାଟାଣି ଆ଼ଚିତେସି, ଅ଼ଡ଼େ ବା଼ଡ଼୍ୟୁ ଗାଟାଣି ଲାଜା କିହାଲିତାକି ମାହାପୂରୁ ଦାର୍ତିତି ବା଼ଡ଼୍ୟୁ ହିଲାଆଗାଟାରାଇଁ ଆ଼ଚିତେସି । ୨୮ ଅ଼ଡ଼େ ଏ଼ନାୟି ଦାର୍ତି ନ଼କିତା ମା଼ନି ଗାଟାୟି, ଏ଼ ବାରେ ଉଜେଏ କିହାଲି, ମାହାପୂରୁ ଦାର୍ତିତି ହୀଣି, ଇଞ୍ଜାଁ ଅ଼ପାଆଗାଟାଣି, ହାଅ, ମା଼ନି ହିଲାଆଗାଟାଣି ଆ଼ଚିତେସି । ୨୯ ଅ଼ଡ଼େ ଏ଼ନାୟି ଦାର୍ତି ନ଼କିତା ମା଼ନି ଗାଟାୟି, ଏ଼ ବାରେତି ଉଜେଏ କିହାଲିତାକି ମାହାପୂରୁ ଦାର୍ତିତି ଊଣା ଅ଼ଡ଼େ ଅ଼ପାଆଗାଟାଣି ହାଅ ଉଜେଏତାଣି ଆ଼ଚିତେସି । ୩୦ ସାମା ଏ଼ୱାଣି ତାକି ମୀରୁ କ୍ରୀସ୍ତ ଜୀସୁ ତା଼ଣା ମାଞ୍ଜେରି, ଏ଼ୱାସି ମାହାପୂରୁ ତା଼ଣାଟି ମାଙ୍ଗେତାକି ବୁଦି, ଇଚିହିଁ ଦାର୍ମୁଗାଟାସି, ସୁଦୁଗାଟାସି ଅ଼ଡ଼େ ଗେଲ୍ପିନି ଲେହେଁ ଆ଼ହାମାନେସି । ୩୧ ଈଦାଆଁତାକି, ଦାର୍ମୁପତିତା ରା଼ସ୍କି ଆ଼ହାମାନେ, “ଆମ୍ବାଆସି ବଡପଣ ଆ଼ନେସି, ଏ଼ୱାସି ମାହାପୂରୁ ତା଼ଣା ବଡପଣ ଆ଼ପାସି ।”