ଯୋହନଙ୍କ ପ୍ରଥମ ପତ୍ର
ଜହନ ରା଼ଚାମାନି ର଼ ଲମ୍ବର ଆ଼କୁ
ମୂଲୁ ହା଼ଡା
ଜହନ ରା଼ଚିତି ର଼ ଲମ୍ବର ଆ଼କୁତି ଜୀସୁ କ୍ରୀସ୍ତ ଜାର୍ନାଆ଼ତି ୫୦ ଟିଏ ୧୦୦ ବାର୍ସା ଡା଼ୟୁ ପାଣ୍ତ୍ୱିଆ଼ହାମାନି ଜହନ ରା଼ଚାମାନେସି । ଜହନ ଜାହାରାଇଁ ଈ ଆ଼କୁତି ରା଼ଚାମାଇଁ ଇଞ୍ଜିଁ ୱେସି ହିଲଅସି, ସାମା ଜହନ ତଲିତି ଆ଼କୁତା ଏ଼ୱାସି ଜୀସୁ କ୍ରୀସ୍ତତି ନୀଡାମାଚାଣି ଅ଼ଡ଼େ ହା଼ହାନା ୱେଣ୍ତେ ନିଙ୍ଗିତାଣି କାନୁ ତଲେ ମେସାମାନମି ଇଞ୍ଜିଁ ସା଼କି ହୀହିମାନେସି ୧:୧-୩ । ଜହନତି ର଼ ଲମ୍ବର ପତି ଅ଼ଡ଼େ ଜହନ ରା଼ଚିତି ନେହିଁ କାବ୍ରୁତି କାତା ରଣ୍ତିଏ ସମାନା ଲେହେଁ ଆ଼ହିମାନେ । ଏଚିବେ଼ଲାତା ଏ଼ୱାସି ଏପିସିୟ ଗା଼ଡ଼ାତା ମାଚେସି ଏମ୍ବାଆଁ ଏ଼ୱାସି ଜହନ ରା଼ଚିତି ନେହିଁ କାବ୍ରୁ ଅ଼ଡ଼େ ଜହନ ର଼ ଲମ୍ବର ଆ଼କୁ, ଜହନ ରୀ ଲମ୍ବର ଆ଼କୁ, ତୀନି ଲମ୍ବର ଆ଼କୁ ରା଼ଚାମାଚେସି ଇଞ୍ଜିଁ ନାମିମାନେରି ।
ବୁଦିଗାଟାତମି ଇଞ୍ଜାକଡିମାନି ର଼ ଗଚିତି ଲ଼କୁ ତା଼ଣାଟି କୁଲମି କସ୍ତ ବେଟାଆ଼ହି ମାଚାଟି ଜହନ କ୍ରୀସ୍ତାନା ଲ଼କୁକି ଈ ଆ଼କୁ ରା଼ଚିମାଚେସି । ଏ଼ୱାରି ନାମୁ ଜୀସୁ ସାତେଏ ମାହାପୂରୁ ମାଚେସି ସାମା ଦାର୍ତିତା ମାଚିବେ଼ଲାତା ଏ଼ୱାସି ଊଙ୍ଗା ଅ଼ଡ଼େ ନେତେରିତି ମାଣ୍ସି ହିଲାଆତେସି । ଜହନ ଜୀସୁ କ୍ରୀସ୍ତଇଁ କାନୁ ତଲେ ମେସାମାନି ସା଼କି ଅ଼ଡ଼େ ତାନି କେୟୁ ଏ଼ୱାଣାଇଁ ଡୀଗାମାନାକି ଏ଼ୱାସି ଈଦାଆଁ ରା଼ଚାମାନେସି, ୧:୧-୩ । ଜହନ ଈ ଆ଼କୁତି ରା଼ଚିନି କାତା ଆ଼ହିମାନେ ତାନି ରା଼ହାଁତି ହା଼ରେପୂରେ କିନାୟି ୧ଜହ ୧:୪ ଅ଼ଡ଼େ ନାମୁ ଗାଟାରାଇଁ ପା଼ପୁ ପିସାଲି ତାକି ୧ଜହ ୨:୧ ଅ଼ଡ଼େ ମିଚି ଜା଼ପ୍ନାରି ତା଼ଣାଟି ନାମୁ ଗାଟାରାଇଁ ଗେଲ୍ପାଲି ୧ଜହ ୨:୨୬ ନାମୁ ଗାଟାରାଇଁ ଗେଲ୍ପି ଆ଼ହାମାଞ୍ଜେରି ଇଞ୍ଜାଲି ୫:୧୩ ।
ପତିତା ମାନାୟି
୧. ଆ଼କୁତି ପୁଣ୍ମ୍ବିକିନାୟି ଅ଼ଡ଼େ ରା଼ଚିମାନି କାତା ୱେହ୍ନାୟି । ୧:୧-୪
୨. ମାହାପୂରୁ ଏ଼ନିକିଁ ଉଜେଡ଼ି ଅ଼ଡ଼େ ଜୀସୁ ଲେହେଁ ନୀଡାଲି ୱେସାମାନେସି । ୧:୫–୩:୧୦
୩. ରଅସି ରଅଣାଇଁ ଜୀୱୁ ନ଼ନାଣି ୱେଣ୍ତେ ଅଣ୍ପି କିନାୟି । ୩:୧୧–୫:୧୨
୪. ଆ଼କୁତି ରା଼ପ୍ନାୟି । ୫:୧୩-୨୧
୧
ଜୀୱୁତି ବ଼ଲୁ
୧ ✡ଜହ ୧:୧ମୂଲୁଏ ଆମ୍ବାଆସି ମାଚେସି, ମା଼ମ୍ବୁ ଏ଼ୱାଣି ବ଼ଲୁ ୱେଞ୍ଜାମାନମି, ଆମ୍ବାଆରାଇଁ ମା଼ କାନୁ ତଲେ ମେସାମାନମି, ଆମ୍ବାଆରାଇଁ ନେହିକିଁ ସିନିକିହା ମାନମି ଅ଼ଡ଼େ ମା଼ କେସ୍କାତଲେ ଡୀଗାମାନମି, ଏ଼ ଜୀୱୁଲେହେଁତି ବ଼ଲୁତି କାତା ୱେସିମାଞ୍ଜାନମି । ୨ ✡ଜହ ୧:୧୪ଏ଼ ଜୀୱୁ ତ଼ଞ୍ଜାଆ଼ତେ, ଇଞ୍ଜାଁ ମା଼ମ୍ବୁ ମେସ୍ତମି ଅ଼ଡ଼େ ସା଼କି ହୀହିମାଞ୍ଜାନମି; ଆମିନି କା଼ଲାକା଼ଲାତି ସୁଦୁଜୀୱୁ ଆ଼ବା ତଲେ ମାଚେ, ଅ଼ଡ଼େ ମା଼ ତା଼ଣା ତ଼ଞ୍ଜାଆ଼ତେସି ଏ଼ୱାଣି କାତା ମିଙ୍ଗେ ୱେସିମାଞ୍ଜାନମି । ୩ ମା଼ମ୍ବୁ ଏ଼ନାଆଁ ମେସାମାନମି ଅ଼ଡ଼େ ୱେଞ୍ଜାମାନମି, ଏ଼ଦାଆଁ ମିଙ୍ଗେ ଜିକେଏ ୱେସିମାଞ୍ଜାନମି, ଏ଼ନିକିଁ ମୀରୁ ଜିକେଏ ମା଼ ତଲେ ଆଣ୍ତାଲି ଆ଼ଡାଦେରି; ଅ଼ଡ଼େ ମା଼ ଆଣ୍ତାମାନାୟି ଆ଼ବା ଅ଼ଡ଼େ ତାନି ମୀର୍ଏଣା ଜୀସୁ କ୍ରୀସ୍ତ ତଲେ ମାନେ । ୪ ମା଼ ରା଼ହାଁ ଏ଼ନିକିଁ ହା଼ରେ ପୁରେ ଆ଼ନେ ଈଦାଣିତାକି ଈ ବାରେ ମା଼ମ୍ବୁ ରା଼ଚିମାଞ୍ଜାନମି ।
ମାହାପୂରୁ ଉଜେଡ଼ି
୫ ମା଼ମ୍ବୁ ଏ଼ୱାଣି ତା଼ଣାଟି ଆମିନି କାବ୍ରୁ ୱେଞ୍ଜାମାନମି, ଅ଼ଡ଼େ ୱେସିମାଞ୍ଜାନମି, ଏ଼ କାବ୍ରୁ ଈଦି, ମାହାପୂରୁ ଉଜେଡ଼ି, ତାନି ତା଼ଣା ଆନ୍ଦେରି ହିଲ୍ୱୁଏ ହିଲେଏ । ୬ ମା଼ମ୍ବୁ ଆନ୍ଦେରିତା ମାଞ୍ଜାନା ମାହାପୂରୁ ତଲେ ଆଣ୍ତ୍ୱିଆ଼ହା ମାନାୟି ଇଞ୍ଜିଁ ୱେସ୍ତିହିଁ, ମା଼ର ମିଚି ୱେହ୍ନାତାୟି, ଅ଼ଡ଼େ ମା଼ର ସାତା ତଲେ ତା଼କିହିଲାଆୟି । ୭ ସାମା ଏ଼ୱାସି ଏ଼ନିକିଁ ଉଜେଡ଼ିତା ବାସା ଆ଼ହାମାନେସି, ମା଼ର ଜିକେଏ ଏଲେକିହିଁଏ ଉଜେଡ଼ିତା ତା଼କିନାୟି, ଆତିହିଁ ମା଼ର ରଅସି ରଅଣି ତଲେ ଆଣ୍ତ୍ୱିଆ଼ନାୟି ମାନେ, ଅ଼ଡ଼େ ତାନି ମୀର୍ଏଣା ଜୀସୁ ନେତେରି ମା଼ ବାରେ ପା଼ପୁତି ନର୍ହାନେ ।
୮ ମା଼ ତା଼ଣା ପା଼ପୁ ହିଲେଏ ଇଞ୍ଜିଁ ୱେହ୍ନାୟି, ଆତିହିଁ ମା଼ର ମାଙ୍ଗେଏ ନା଼ଡ଼ି କିହାକଡିମାନାୟି, ଅ଼ଡ଼େ ମା଼ ତା଼ଣା ସାତା ହିଲେଏ । ୯ ସାମା ମା଼ମ୍ବୁ ପା଼ପୁ କିହାମାନମି ଇଞ୍ଜିଁ ମାହାପୂରୁ ନ଼କିତା ୱେହ୍ନାୟି, ଆତିହିଁ ଏ଼ୱାସି ମା଼ ପା଼ପୁ ବାରେ ମ୍ଣେକ୍ହାଲି ଅ଼ଡ଼େ ବାରେ ଲାଗେଏ ପ଼ଲେଏ ତା଼ଣାଟି ଅଟ୍ହାଲି ନାମୁ ଅ଼ଡ଼େ ତୀରିଗାଟାସି । ୧୦ ମା଼ର ପା଼ପୁ କିହା ହିଲାଆୟି ଇଞ୍ଜିଁ ଇନାୟି, ଆତିହିଁ ମା଼ର ମାହାପୂରୁଇଁ ମିଚି ଗାଟାସି କିହିମାନାୟି, ଅ଼ଡ଼େ ତାନି ବ଼ଲୁ ମା଼ ତା଼ଣା ହିଲେଏ ।