କରନ୍ତି ମଣ୍ତଳୀ ନିମନ୍ତେ ପାଉଲଙ୍କ ଲିଖିତ ଦ୍ୱୀତିୟ ପତ୍ର
କରନ୍ତି କୁଲମିତାକି ପା଼ୱୁଲ ରା଼ଚାମାନି ରୀ ଲମ୍ବର ଆ଼କୁ
ମୂଲୁ ହା଼ଡା
କରନ୍ତି କୁଲମିତି ରୀ ଲମ୍ବର ଆ଼କୁ ପାଣ୍ତ୍ୱିଆ଼ହାମାନି ପା଼ୱୁଲ ତା଼ଣାଟି ଜୀସୁ କ୍ରୀସ୍ତ ଜାର୍ନାତି ୫୫-୫୬ ବାର୍ସା ଡା଼ୟୁ ରା଼ସ୍କି ଆ଼ହାମାଚେ ୧:୧ । ମା଼ ତା଼ଣା ମାନି କରନ୍ତି କୁଲମିକି ରା଼ଚାମାନି ଆ଼କୁ ବିତ୍ରାଟି ଈଦି ଆ଼ହିମାନେ ପା଼ୱୁଲତି ରୀ ଲମ୍ବର ଆ଼କୁ । ମେ଼ରାପୁନାରି ନାମିମାନେରି ଈଦାଆଁ ନ଼କେଏ ପା଼ୱୁଲ କରନ୍ତି କୁଲମିତି ଦାକା ହୀହାନା ରା଼ଚାମାଚେସି ୨:୩-୪ ପଦୁତା ଏ଼ୱାସି ୱେସିମାନେସି ।
ପା଼ୱୁଲ ମାକିଦନିୟାତା ମାନି ବେ଼ଲାତା କରନ୍ତିତି ରୀ ଲମ୍ବର ଆ଼କୁ ରା଼ଚାମାନେସି ୨:୧୩ । କରନ୍ତିତା ମାନି କୁଲମିତି କାତା ତିତସ ତା଼ଣାଟି ନେହିଁ କାବ୍ରୁ ବେଟାଆ଼ହାନା ରା଼ହାଁ ଆ଼ହିମାନେସି । ଈ ଆ଼କୁତା ପୁଃନି ମେ଼ରା ଅଣ୍ପୁଟି ଦା଼ନା ହୀନି କାତା ଜା଼ପିନାୟି । ଈ ଆ଼କୁତା ଜିରୁସାଲମତା ମାନି କ୍ରୀସ୍ତଇଁ ନାମାମାନି ଲ଼କୁଇଁ ସା଼ୟେମି କିହାଲି ଟାକାୟାଁ କୂଡ଼ିକିହାଲି ୱେସିମାନେସି ୮–୯ । ଅ଼ଡ଼େ ଜିକେଏ କୁଲମି ପାଙ୍ଗାଟି କଚେକା ମିଚି ପାଣ୍ତ୍ୱି ଆ଼ହାମାନାରି ଜାହାରାଇଁ କାଜାରି କିହାକଡାଲି ପା଼ୱୁଲ କ଼ପାଟି କୁଲମିତି ଏଚରଜା଼ଣା କାଜାରାଇଁ ନିନ୍ଦା କାତା ୱେସିମାନେରି । ଏ଼ୱାରି ପା଼ୱୁଲତି ଅଦିକାରାତି ଆନାମାନା ଆ଼ହିମାନେରି । ଏମିନିଗାଟାଣି ରୀ ଲମ୍ବର କରନ୍ତି ଆ଼କୁତି ରା଼ନିୱାକି ଏ଼ୱାସି ର଼ କ୍ରୀସ୍ତତି ଅଦିକାରା ତଲେ ପାଣ୍ତ୍ୱି ଆ଼ତାସି ଇଞ୍ଜିଁ ଜାଣ୍ତେତଲେ ୱେସିମାନେସି ।
ପତିତା ମାନାୟି
୧. ପା଼ୱୁଲ ଜହରା କିହାନା ଆ଼କୁ ରା଼ଚିନାୟି । ୧:୧-୭
୨. ପା଼ୱୁଲ ତାନି ହାନି ଜିରୁତି ବାଦ୍ଲି କିନାୟି ଇଞ୍ଜାଁ ଏ଼ୱାରି ତା଼ଣାଟି ବେଟାଆ଼ହାମାନି କାତାତାକି ୱେଣ୍ତେ ୱେହ୍ନାୟି । ୧:୮–୭:୧୬
୩. ଜିରୁସାଲମତି ନାମୁଗାଟି ତାୟିୟାଁକି ଦା଼ନା କୂଡ଼ିକିହାଲି ୱେହ୍ନାୟି । ୮:୧–୯:୧୫
୪. ପା଼ୱୁଲ ତାନି ପାଣ୍ତ୍ୱିଆ଼ହାମାନି ପା଼ଣାତି ଜାଣ୍ତେ ୱେହ୍ନାୟି । ୧୦:୧–୧୩:୧୦
୫. ଆ଼କୁତି ରା଼ପ୍ନି କାତା । ୧୩:୧୧-୧୪
୧
୧ ପା଼ୱୁଲ ମାହାପୂରୁତି ଅଣ୍ପୁ ତଲେ କ୍ରୀସ୍ତ ଜୀସୁ ତା଼ଣାଟି ପାଣ୍ତ୍ୱି ଆ଼଼ହାମାନାତେଏଁ ଇଞ୍ଜାଁ ମା଼ ତାୟି ତିମତି କରନ୍ତି ଗା଼ଡ଼ାତା ମାନି ମାହାପୂରୁତି କୁଲମି ଅ଼ଡ଼େ ଆକାୟା ଦେ଼ସାତା ମାନି ବାରେ ମାହାପୂରୁ ଲ଼କୁତାକି ଆ଼କୁ ରା଼ଚିମାନମି ।
୨ ମା଼ ଆ଼ବା ମାହାପୂରୁ ଅ଼ଡ଼େ ପ୍ରବୁ ଜୀସୁ କ୍ରୀସ୍ତ ତା଼ଣାଟି କାର୍ମାମେହ୍ନାୟି ଇଞ୍ଜାଁ ହିତ୍ଡ଼ି ମିଙ୍ଗେତାକି ଆୟାପେ ।
ପା଼ୱୁଲ ମାହାପୂରୁଇଁ ଜହରା କିନାୟି
୩ ମା଼ ପ୍ରବୁ ଜୀସୁ କ୍ରୀସ୍ତତି ଆ଼ବା ମାହାପୂରୁକି ଜହରା, ଏ଼ୱାସି କାର୍ମାମେହ୍ନି ଆ଼ବା ଅ଼ଡ଼େ ଦୁକୁ ଡ଼ୁକ୍ନି ମାହାପୂରୁ । ୪ ମାହାପୂରୁ ତା଼ଣାଟି ଆମିନି ଦୁକୁ ଡୂକ୍ନି ତା଼ଣା ମା଼ର ଦୁକୁ ଡୂପ୍କି ଆ଼ହିମାନାୟି, ଏ଼ ଦୁକୁ ଡୂକ୍ନାଣି ତଲେ ଏ଼ନିକିହିଁ ବାରେ ଲେହେଁତି ଦୁକୁ ବେଟାଆ଼ହିମାନି ଲ଼କୁଣି ଦୁକୁ ଡୂକ୍ହାଲି ଆ଼ଡିନାୟି, ଈଦାଆଁତାକି ଏ଼ୱାସି ବାରେ ଦୁକୁତା ମାଙ୍ଗେ ଦୁକୁ ଡୂକ୍ନାଣି ହୀହାମାଞ୍ଜାନେସି ୫ ଇଚିହିଁ କ୍ରୀସ୍ତତି ତାକି ମା଼ର ଏ଼ନିକିଁ ହା଼ରେକା ଦୁକୁ କସ୍ତ ହା଼ରେକା ବେଟାଆ଼ନାୟି, ଏଲେକିହିଁଏ କ୍ରୀସ୍ତ ତା଼ଣାଟି ମାହାପୂରୁତି ଦୁକୁ ଡୂକ୍ନାୟି ହା଼ରେକା । ୬ ସାମା ମା଼ମ୍ବୁ ଦୁକୁ କସ୍ତ ବେଟାଆ଼ତିସାରେ ଏ଼ଦି ମୀ ତାକି ଦୁକୁ ଡୂକ୍ନାୟି, ଅ଼ଡ଼େ ଗେଲ୍ପି ଆ଼ହାଲିତାକି; ଇଞ୍ଜାଁ ମା଼ମ୍ବୁ ଦୁକୁ ଡୂପ୍କି ଆତିହିଁ, ଏ଼ଦି ମୀ ଦୁକୁ ଡୂକ୍ହାଲି ତାକି; ମା଼ମ୍ବୁ ଏ଼ନିଲେହେଁତି ଦୁକୁ କସ୍ତ ବେଟାଆ଼ନମି ମୀରୁ ଏ଼ନିକିହିଁ ସା଼ସା ଅ଼ଡ଼େ କସ୍ତତଲେ ଦୁକୁ ବେଟାଆ଼ହି ମାଞ୍ଜେରି ମା଼ମ୍ବୁ ଜିକେଏ ଏଲେକିହିଁଏ ଦୁକୁ ଡୂକ୍ନି କାମା କିହିମାନମି । ୭ ଅ଼ଡ଼େ ମୀ ତା଼ଣା ମା଼ ବା଼ର୍ସୁ ହା଼ରେକା ମାନେ । ମୀରୁ ମା଼ ଦୁକୁ କସ୍ତ ପା଼ଣ୍ନିତା଼ଣା ଏ଼ନିକିଁ ଆଣ୍ତାମାଞ୍ଜେରି, ଏଲେକିହିଁଏ ମା଼ମ୍ବୁ ଦୁକୁ ଡୂକ୍ନି ତା଼ଣା ଆଣ୍ତିଦେରି, ଇଞ୍ଜିଁ ମା଼ମ୍ବୁ ପୁଞ୍ଜାମାନମି ।
୮ ✡୧କର ୧୫:୩୨ଇଚିହିଁ ଏ଼ ତାୟିୟାଁ ଅ଼ଡ଼େ ତାଙ୍ଗିସ୍କାତେରି, ଆସିୟା ରା଼ଜିତା ମାଙ୍ଗେତାକି ଆ଼ହାମାନି ସା଼ସ୍ତି ମୀରୁ ପୁନାଆନା ମାଞ୍ଜୁ ଇଞ୍ଜିହିଁ ମା଼ମ୍ବୁ ଅଣ୍ପି ହିଲଅମି; ମା଼ମ୍ବୁ ମା଼ ବା଼ଡ଼୍ୟୁଟି ବେଟାଆ଼ହାମାନି ସା଼ସ୍ତି ସହୱି ଆ଼ହାଲି ଆ଼ଡାଆରେଟୁ ଆ଼ହାମାଚମି, ଇଞ୍ଜାଁ ମା଼ମ୍ବୁ ନୀଡାମାଞ୍ଜାଲି ଜିକେଏ ଆ଼ସା ପିସାମାଚମି; ୯ ହାଅ, ମାଙ୍ଗେ ପା଼ୟାଲି ହୁକୁମି ହୀପ୍କି ଆ଼ହାମାନେ ଇଞ୍ଜିଁ ଅଣ୍ପିମାଚମି, ଏ଼ନିକିଁ ମା଼ମ୍ବୁ ମା଼ ମୁହେଁ ବା଼ର୍ସୁ କିହାକଡାଆନା ଏମିନି ମାହାପୂରୁ ହା଼କିଟି ନିକ୍ନେସି ଏ଼ୱାଣି ତା଼ଣା ବା଼ର୍ସୁ କିନମି; ୧୦ ଏ଼ୱାସି ଆଜିହ଼ପେତି ହା଼କିଟି ମାଙ୍ଗେ ଗେଲ୍ପାତେସି ଅ଼ଡ଼େ ଗେଲ୍ପାନେସି, ଅ଼ଡ଼େ ଡା଼ୟୁ ଜିକେଏ ଗେଲ୍ପାନେସି ଇଞ୍ଜିଁ ତାନିତା଼ଣା ମା଼ ଆ଼ସା ମାନେ; ୧୧ ମୀରୁ ଜିକେଏ ମା଼ ତାକି ପ୍ରା଼ତାନା କିହାଁ ମାଙ୍ଗେ ସା଼ୟେମି କିହାମାଞ୍ଜାଦେରି, ଏ଼ନିକିଁ ମାଙ୍ଗେ ଏମିନି କାର୍ମାତି ଦା଼ନା ହୀପ୍କି ଆ଼ହାମାଞ୍ଜାନେ, ଏ଼ଦାଆଁତାକି ହା଼ରେକା ଲ଼କୁତି ଗୂତିଟି ମା଼ ତାକି ହା଼ରେକା ଜହରା କିୱିଆ଼ହିମାନେ ।
ପା଼ୱୁଲ ତାନି ଅଣ୍ପୁ ବାଦ୍ଲି କିନାୟି
୧୨ ବାରେକିହାଁ ଦାର୍ତିତା ମୀ ତାକି ମା଼ମ୍ବୁ ମାଣ୍ସିତି ବୁଦିତଲେ ତା଼କାଆନା ମାହାପୂରୁତି କାର୍ମାଟି ତାନି ସୁଦୁ ଅ଼ଡ଼େ ନାମୁତଲେ ତା଼କିମାଚମି ଇଞ୍ଜିଁ ମା଼ ଅଣ୍ପୁ ସା଼କି ହୀହିମାଞ୍ଜାନେ, ଈଦି ମା଼ ବଡପଣତି କାତା । ୧୩ ୱାର୍ଇ ମୀରୁ ଏ଼ନାଆଁ ପ଼ଡ଼ୱି ଆ଼ହାନା ତେଲ୍ହିଦେରି, ଏ଼ ବାରେ ପିସ୍ପେ ମା଼ମ୍ବୁ ମିଙ୍ଗେ ଅ଼ଡ଼େ ଏ଼ନାଆଁ ରା଼ଚିମାଞ୍ଜଅମି, ୧୪ ଅ଼ଡ଼େ ମା଼ ପ୍ରବୁ ଜୀସୁ କ୍ରୀସ୍ତତି ଦିନାତା ମା଼ମ୍ବୁ ମୀ ତାକି ବଡପଣ ତ଼ସାଲି ଆ଼ଡିନମି, ଅ଼ଡ଼େ ମୀରୁ ଜିକେଏ ମା଼ ତାକି ବଡପଣ ତ଼ସାଲି ଆ଼ଡିଦେରି, ମୀରୁ ନୀଏଁ ଇଚେକା ପୁଞ୍ଜାନା ବାରେ ପୁନାଆତି ଜିକେଏ ର଼ ଦିନା ମୀରୁ ବାରେ ଡା଼ୟୁ ପାତେକା ପୁଞ୍ଜେରି ଇଞ୍ଜିଁ ନା଼ ଆ଼ସା ।
୧୫ ଈ କାତା ନେହିଁକିଁ ପୁଞ୍ଜାମାନାକି ମୂଲୁଏ ମୀ ତା଼ଣା ୱା଼ହାଲି ତାକି ନାଙ୍ଗେ ଅଣ୍ପୁ ମାଚେ, ଆତିହିଁ ମୀରୁ ରୀ ଦେବା ରା଼ହାଁ ବେଟାଆ଼ତେରିମା ୧୬ ✡କାମା ୧୯:୨୧ମୀ ତା଼ଣାଟି ମାକିଦନିୟାତା ହାଜାନା ଅ଼ଡ଼େ ୱେଣ୍ତେ ମାକିଦନିୟାଟି ମୀ ତା଼ଣା ୱା଼ହାନା ମୀ ସା଼ୟେମି ତଲେ ଜୀହୁଦା ଦେ଼ସାତା ହାଜାଲି ଆ଼ଡିଇଁ, ଏ଼ଦାଆଁତାକି ଏ଼ ନାମୁଟି ତଲିଏ ମୀ ତା଼ଣା ହାଜାଲି ମ଼ନ କିହାମାଚେଏଁ । ୧୭ ଆତିହିଁ ଇଲେତି ଅଣ୍ପୁ ଅଣ୍ପିନାୟି ନା଼ନୁ ଏ଼ନାଆଁ ଆନାମାନା ଆ଼ହାନା କିହାମାଚେଏଁ ? ଇଞ୍ଜାଁ ନା଼ନୁ ଏ଼ନାଆଁ ତୀରିକିହା ଡ଼ୟିଇଁ, ଏ଼ଦି ଏ଼ନାଆଁ ଏ଼ଦାଆଁ ଦାର୍ତିତି ଅଣ୍ପୁ ତଲେ କିହିମାଇଁ, ଇଞ୍ଜାଁ ନା଼ କାତା “ହାଅ କି ଆ଼ଏ” ଈ ରୀ କାତା ରଣ୍ତିଏ ଦେବା ହ଼ପ୍ଇଁ କି ? ୧୮ ମାହାପୂରୁ ଟିକାଣାତାସି, ଏ଼ଦାଆଁତାକି ନା଼ କାତା ମିଙ୍ଗେତାକି “ହାଅ କି ଆ଼ଏ” ଇନି ରୀ କାତା ଆ଼ଏ । ୧୯ ✡କାମା ୧୮:୫ଇଚିହିଁ କ୍ରୀସ୍ତ ଜୀସୁ ମାହାପୂରୁ ମୀର୍ଏସି, ଆମ୍ବାଆସି ମା଼ ତା଼ଣାଟି ଇଚିହିଁ ସିଲା, ତିମତି ଅ଼ଡ଼େ ନା଼ନୁ ମୀ ତା଼ଣା ୱେ଼କ୍ହା ମାଚମି, ଏ଼ୱାସି “ହାଅ” ଅ଼ଡ଼େ “ଆ଼ଏ” ଇନାସି ଆ଼ହାହିଲଅସି, ଇଚିହିଁ ଏ଼ୱାଣି ତା଼ଣା ହାଅ ଆ଼ହାମାନେ । ୨୦ ଏ଼ନାଆଁତାକି ଇଚିହିଁ ମାହାପୂରୁତି ବାରେ ଆ଼ଞ୍ଜାମାନାୟି ଏ଼ୱାଣି ତା଼ଣା “ହାଅ” ମାନେ; ଈଦାଆଁତାକି ଜୀସୁ କ୍ରୀସ୍ତ ତା଼ଣାଟି ମାହାପୂରୁଇଁ ଗାୱୁରମି କିହାଲି ମା଼ର “ ‘ଆ଼ମେନ୍,’ ଏଲେଆ଼ହିଁ ଆ଼ପେ” ଇନାୟି । ୨୧ ତା଼ନୁଏ ମାଙ୍ଗେ ଅ଼ଡ଼େ ମିଙ୍ଗେ କ୍ରୀସ୍ତ ତା଼ଣା ତୀରି କିହାମାଞ୍ଜାନେସି, ଇଞ୍ଜାଁ ମାଙ୍ଗେ ବ଼ର ହୀହାମାଞ୍ଜାନେସି, ଏ଼ୱାସି ମାହାପୂରୁ; ୨୨ ଏ଼ୱାସି ତାନି ବୁଟୁ ମୁଦ୍ରା ମାଙ୍ଗେ ୱେ଼ଚା ମାଞ୍ଜାନେସି, ଇଞ୍ଜାଁ ଏ଼ୱାସି ମା଼ ହିୟାଁ ବିତ୍ରା ସୁଦୁଜୀୱୁ ସିନାଲେହେଁ ହୀହାମାଞ୍ଜାନେସି ।
୨୩ ସାମା ନା଼ନୁ ମାହାପୂରୁଇଁ ସା଼କି କିହାନା ନା଼ ଜୀୱୁତି ମା଼ନି କିହିମାଇଁ, ନା଼ନୁ ମିଙ୍ଗେ କାର୍ମା ଆ଼ହାନା କରନ୍ତିତା ୱେଣ୍ତେ ହାଜାହିଲଅଁ । ୨୪ ମୀ ନାମୁତି ମୁହେଁ ମା଼ ଅଦିକାରା ମାନେ, ଏଲେକିଁ ଆ଼ଏ, ସାମା ମୀ ରା଼ହାଁତାକି ମୀ ସା଼ୟେମି କିନାତମି ଆ଼ହାମାନମି, ଏ଼ଦାଆଁତାକି ନାମୁତା ତୀରିଆ଼ହାନା ମାଞ୍ଜୁ ।