ପିତର ଲିଖିତ ଦ୍ୱୀତିୟ ପତ୍ର
ପିତର ରା଼ଚାମାନି ରୀ ଲମ୍ବର ଆ଼କୁ
ମୂଲୁ ହା଼ଡା
ପିତର ରୀ ଲମ୍ବର ଆ଼କୁତି ପାଣ୍ତ୍ୱିଆ଼ତି ପିତର ରା଼ଚାମାଚେସି, ସାମା ହା଼ରେକା ବୁଦିଗାଟାରି ନୀଏଁ ୱିଏ ଈଦି ସାତା ଇଞ୍ଜିଁ ନାମିହିଲଅରି । ଈଦାଆଁ ପିତର ତା଼ଣାଟି ଆମ୍ବାଆସି ଆ଼ପେ ରା଼ଚାମାଣ୍ମ୍ବିନେସି । ରା଼ଚାମାନାସି ଏଲେଇଞ୍ଜି ମାନେସି, ଏ଼ୱାସି ଜୀସୁ ଈ ଦାର୍ତିତା ନୀଡାମାଚାଣି ଅ଼ଡ଼େ ମୂମ୍ବୁ ବାଦ୍ଲି ଆ଼ହାମାଚାଣି ତା଼ନୁଏ ମେସାମାଚେସି ୧:୧୭-୧୮ । ଈ ଆ଼କୁତି ପିତର ରା଼ଚାମାଚିସାରେ ଏ଼ୱାସି ର଼ମ୍ତା ମାଞ୍ଜାନା ତା଼ନୁ ହା଼ତି ନ଼କେଏ ଜୀସୁ କ୍ରୀସ୍ତ ଜାର୍ନାଆ଼ତି ୬୫-୬୯ ବାର୍ସା ଡା଼ୟୁ ରା଼ଚାମାଚେସି । ପିତର ରୀ ଲମ୍ବର ଆ଼କୁତି ଡା଼ୟୁ ପିତର ରା଼ଚିତି କା଼ଲମି ୱେସାନା ଏଲେଇଚେସି ଈଦି ରୀ ପା଼ଲିତି ଆ଼କୁ ୩:୧। ଏ଼ୱାସି ଈ ଆ଼କୁତା ବାରେ କ୍ରୀସ୍ତାନା ଲ଼କୁତି ଦ଼ରୁ ୱେ଼କ୍ହେସି ।
କ୍ରୀସ୍ତଇଁ ନାମିତି ଲ଼କୁ ନେହିଁକିଁ ନୀଡାବାତ୍କାଲି ସା଼ସା ହୀହାଲି ଅ଼ଡ଼େ ମିଚିତାଣି ଜା଼ପ୍ନାରି ତା଼ଣାଟି ଜାଗ୍ରାତା କିହାଲି ଈ ଆ଼କୁ ପିତର ରା଼ଚାମାନେସି ୨ ପାର୍ବୁ । ପିତର ଏ଼ୱାରାଇଁ ଜୀସୁ ତବେ ୱା଼ହାହିଲଅସି ଇଞ୍ଜିମାନି ଲ଼କୁ କାତା ଆହ୍ଆଦୁ ଇଞ୍ଜିଁ ସା଼ସା ହୀତେସି । ଏ଼ୱାସି ତ଼ସାନା ୱେସ୍ତେସି ମାହାପୂରୁ ନିସ୍ତା ଆ଼ହିଁ କାମାକିନାସି ଆ଼ଏ ସାମା ଏ଼ୱାସି ବାରେଜା଼ଣାତି ଗେଲ୍ପି ଆ଼ହାଲି ଅଣ୍ପିମାନେସି ୨ପିତ ୩:୮-୯ । ଏ଼ଦାଆଁତାକି ନେହିଁ ମାଣ୍କିତି ଜୀୱୁତଲେ ନୀଡିନାୟି ମାନେ ୩:୧୪ ।
ପତିତା ମାନାୟି
୧. ପିତର ତାଙ୍ଗେ ୱେ଼କ୍ହା କଡିନାୟି ଅ଼ଡ଼େ ତାନି ଆ଼କୁତି ପ଼ଡ଼ୱି ଆ଼ନାରାଇଁ ୱେହ୍ନାୟି । ୧:୧-୨
୨. ଏ଼ୱାସି ଏ଼ୱାରାଇଁ ନେହିଁକିଁ ନୀଡାବାତ୍କାଲି ଅଣ୍ପି କିହିମାନେସି ଏ଼ନାଆଁତାକି ଇଚିହିଁ ମାହାପୂରୁ ମାଙ୍ଗେ ବା଼ଡ଼୍ୟୁ ହୀହାମାଞ୍ଜାନେସି । ୧:୩-୨୧
୩. ଏ଼ୱାସି ମିଚି ଜା଼ପ୍ନାରି ତା଼ଣାଟି ଜାଗ୍ରାତା ଆ଼ହାଲି ୱେସାମାନେସି ଅ଼ଡ଼େ ଜୁଗୁ ରା଼ନି ଦିନାତା ଏ଼ୱାରାକି ଏ଼ନାଆଁ ଆ଼ନେ ଇଞ୍ଜିଁ ୱେସାମାନେସି । ୨:୧-୨୨
୪. କ୍ରୀସ୍ତଇଁ ନାମିତି ଲ଼କୁଣି ଜୀସୁ ୱେଣ୍ଡେ ୱା଼ନି ଦିନା ପାତେକା ନେହିଁ ଜୀୱୁତଲେ ତିୟାରା ଆ଼ହା ମାଞ୍ଜାଲି ସା଼ସା ହୀହାନା, ପିତର ତାନି ଆ଼କୁ ରା଼ପ୍ନାୟି । ୩:୧-୧୭
୧
୧ ସିମନ ପିତର, ର଼ ହ଼ଲେଏସି ଅ଼ଡ଼େ ପାଣ୍ତ୍ୱି ଆ଼ହାମାନାସି, ମା଼ ମାହାପୂରୁ ଅ଼ଡ଼େ ଗେଲ୍ପାନି ଜୀସୁ କ୍ରୀସ୍ତତି ଦାର୍ମୁତାକି ଆମିନି ଗାଟାରି ମା଼ ଲେହେଁ ହା଼ରେକା ଦାରାଗାଟି ନାମୁ ବେଟା ଆ଼ହାମାନେରି, ଏ଼ୱାରିତା଼ଣା ଆ଼କୁ ରା଼ଚିମାଇଁ । ୨ ମାହାପୂରୁ ଅ଼ଡ଼େ ମା଼ ପ୍ରବୁ ଜୀସୁତି ବୁଦିତଲେ ମିଙ୍ଗେତାକି କାର୍ମାମେହ୍ନାୟି ଅ଼ଡ଼େ ହିତ୍ଡ଼ି ଜୀୱୁ ହା଼ରେକା ଗାଡି ଆୟାପେ ।
ମାହାପୂରୁ ହା଼ଟିନାୟି ଅ଼ଡ଼େ ଆ଼ଚିନାୟି
୩ ଆମ୍ବାଆସି ତାନି ଗାୱୁରମି ଅ଼ଡ଼େ ନେହିଁ ଗୂଣୁତଲେ ମାଙ୍ଗେ ହା଼ଟାମାଞ୍ଜାନେସି, ମାହାପୂରୁ ତାନି ବୁଦିତଲେ ଲାକପୂରୁତି ବା଼ଡ଼୍ୟୁଟି ମାଙ୍ଗେ ଜୀୱୁ ଅ଼ଡ଼େ ଦାର୍ମୁତି ଜିରୁ ତାକି ବାରେ ଲ଼ଡ଼ାମାନାଣି ହୀହାମାଞ୍ଜାନେସି । ୪ ଏ଼ଦାଆଁ ତଲେ ଏ଼ୱାସି ମାଙ୍ଗେ ଗାଡି ଦାରା ଅ଼ଡ଼େ ହା଼ରେକା ଲ଼ଡ଼ାଗାଟି ଆ଼ଞ୍ଜାମାନି ଦା଼ନା ହୀହାମାଞ୍ଜାନେସି, ଏ଼ନିକିଁ ଏ଼ ବାରେ ତଲେ ମୀରୁ ଲାଗେଏତି ଅଣ୍ପୁତା ଆ଼ହିମାନି ଆମିନି ନା଼ସା ଆ଼ନି ଦାର୍ତିତା ମାଞ୍ଜେରି, ଏମ୍ବାଟି ଗେଲ୍ପି ଆ଼ହାନା ଲାକପୂରୁତି ଗୂଣୁତଲେ ଆଣ୍ତାଦୁ । ୫ ଈଦାଆଁତାକି ମୀରୁ ହା଼ରେକା ଜାତ୍ନୁତି ନାମୁତଲେ ନେହିଁ ଗୂଣୁ, ଅ଼ଡ଼େ ସାତା ଗୂଣୁତଲେ ବୁଦି, ୬ ବୁଦିତଲେ ଆଙ୍ଗାତି ଲକ୍ନାୟି, ଆଙ୍ଗାତି ଲକ୍ନାଣି ତଲେ ସା଼ସା, ସା଼ସାତଲେ ଦାର୍ମୁତି କାମା କିନାୟି, ୭ ଦାର୍ମୁତି କାମାକିନାଣି ତଲେ ତାୟିୟାଁଇଁ ଜୀୱୁନ଼ନାୟି, ତାୟିୟାଁଇଁ ଜୀୱୁ ନ଼ନାଣି ତଲେ ବାରେ ଲ଼କୁଇଁ ଜୀୱୁ ନ଼ନାଣି ଆଟ୍ଦୁ । ୮ ଈ ନେହିଁ ଗୂଣୁୟାଁ ମିଙ୍ଗେ ଲ଼ଡ଼ାମାନେ; ଈ ବାରେ ମୀରୁ ବେଟାଆ଼ହାମାନି ପ୍ରବୁ ଜୀସୁ କ୍ରୀସ୍ତତି ବୁଦି ମିଙ୍ଗେ ପାର୍ସାଡ଼ା ଅ଼ଡ଼େ ବାରେ ମେଡ଼ି କିହାମାଞ୍ଜାନେ । ୯ ସାମା ଈ ବାରେ ଗୂଣୁ ଆମ୍ବାଆରି ତା଼ଣା ହିଲେଏ, ଏ଼ୱାସି ହେକ ମେସାଲି ଆ଼ଡାଆ କା଼ଣା ଆ଼ହାମାନେସି, ଅ଼ଡ଼େ ତାନି ନ଼କେଏ କିତି ବାରେ ପା଼ପୁଟି ନର୍ୱି ଆ଼ତାଣି ଏ଼ୱାସି ବାଣ୍ମ୍ବି ଆ଼ହାମାନେସି ।
୧୦ ଈଦାଆଁତାକି, ଏ଼ ତାୟି ତାଙ୍ଗିସ୍କା, ମାହାପୂରୁ ମିଙ୍ଗେ ଆ଼ଚାନା ହା଼ଟାମାଞ୍ଜାନାଣି ଅ଼ଡ଼େ ମ଼ନତି ଅଣ୍ପୁ ତୀରି କିହାଲି ହା଼ରେକା ଜାତ୍ନୁ ଗାଟାତେରି ଆ଼ଦୁ; ଇଲେ କିତିସାରେ ମୀରୁ ଏଚେଲା ଜିକେଏ ମୀ ନାମୁତା ଊଣା ଆ଼ଅତେରି । ୧୧ ଇଞ୍ଜାଁ ଇଲେକିହିଁଏ ମା଼ ପ୍ରବୁ ଅ଼ଡ଼େ ଗେଲ୍ପାନି ଜୀସୁ କ୍ରୀସ୍ତତି କା଼ଲାକା଼ଲାତି ରା଼ଜିତା ରା଼ହାଁତଲେ ହାଜାଲି ମିଙ୍ଗେ ହୀପ୍କି ଆୟାନେ ।
୧୨ ଈଦାଆଁତାକି ମୀରୁ ଈ ବାରେ କାତା ପୁଞ୍ଜାମାଞ୍ଜେରି ଅ଼ଡ଼େ ମୀରୁ ବେଟାଆ଼ହାମାନି ସାତାତା ନେହିଁକିଁ ତୀରି ଆ଼ହାମାଞ୍ଜେରି, ଆ଼ତିଜିକେଏ ନା଼ନୁ ଈ ବାରେ କାତା କା଼ଲେଏ ମିଙ୍ଗେ ଅଣ୍ପି କିୱିକିହାଲି ଜାଗ୍ରାତା ଡ଼ୟିଇଁ । ୧୩ ନା଼ନୁ ନୀଡାମାନି ପାତେକା ଈ ବାରେ କାତା ତାକି ମିଙ୍ଗେ ସେତ୍ନା କିହାଲି ନା଼ନୁ କିନାୟି ମାନେ ଇଞ୍ଜିଁ ଅଣ୍ପିମାଇଁ । ୧୪ ମା଼ ପ୍ରବୁ ଜୀସୁ କ୍ରୀସ୍ତ ନାଙ୍ଗେ ଏ଼ନିକିଁ ୱେସାମାଞ୍ଜାନେସି, ଏଲେକିହିଁ ନାଙ୍ଗେ ଦାପେ ଈ ନା଼ ଆଙ୍ଗା ଲେହେଁତି ତୂମୁ ପିସାଲି ଆ଼ନେ, ୧୫ ଅ଼ଡ଼େ ନା଼ ହା଼ତି ଡା଼ୟୁ ଜିକେଏ ମୀରୁ ଏ଼ନିକିଁ ଈ ବାରେ କାତା କା଼ଲେଏ ଅଣ୍ପୁତା ଇଟିଦେରି, ଈଦାଆଁତାକି ନା଼ନୁ ଅଣ୍ପିମାଇଁ ।
କ୍ରୀସ୍ତତି ଗାୱୁରମି ମେସ୍ତାରି ସା଼କି
୧୬ ଇଚିହିଁ ମା଼ମ୍ବୁ ଏଚିବେ଼ଲା ମା଼ ପ୍ରବୁ ଜୀସୁ କ୍ରୀସ୍ତତି ବା଼ଡ଼୍ୟୁ ଅ଼ଡ଼େ ୱା଼ହିମାନି କାତା ମିଙ୍ଗେ ପୁଣ୍ମ୍ବି କିୟାତମି, ଏଚିବେ଼ଲା ଏ଼ନି ସୁତ୍ରମି ତଲେ କେ଼ପିତି ପୁସ୍ପନିକା ଆସା ହିଲାଆତମି, ସାମା ତାନି ଗାୱୁରମିତି କାଣ୍କା ତଲେ ମେସ୍ତି ସା଼କିୟାଁ ଆ଼ହାମାଚମି । ୧୭ ✡ମାତି ୧୭:୧-୫; ମାର୍କ ୯:୨-୭; ଲୂକ ୯:୨୮-୩୫ଏଚିବେ଼ଲା କାଜା ଗାୱୁରମିଟି ଏ଼ୱାଣାକି ଈ ହା଼ଡା ୱା଼ତେ, ଏଚିବେ଼ଲା ମା଼ମ୍ବୁ ଏମ୍ବାଆଁ ମାଚମି, “ଈୱାସି ନା଼ ଜୀୱୁତି ମୀର୍ଏସି ଈୱାଣି ତା଼ଣେଏ ନା଼ ହା଼ରେକା ରା଼ହାଁ ମାନେ !” ଏଚିବେ଼ଲା ଏ଼ୱାସି ଆ଼ବା ମାହାପୂରୁ ତା଼ଣାଟି ସାମ୍ବ୍ରମି ଅ଼ଡ଼େ ଗାୱୁରମି ବେଟାଆ଼ତେସି; ୧୮ ମା଼ମ୍ବୁ ତାନିତଲେ ଏ଼ ସୁଦୁ ହ଼ରୁ ଲାକ ମାଚିବେ଼ଲାତା ମା଼ମ୍ବୁଏ ହା଼ଗୁ ଲାକଟି ୱେ଼ଙ୍ଗିତି ଈ ହା଼ଡା ୱେଞ୍ଜାମାନମି ।
୧୯ ଏମ୍ବାଆଁ ମାହାପୂରୁ ଅଣ୍ପୁତି ବ଼ଲୁ ୱେ଼କ୍ନାରି ୱେ଼କ୍ହାମାଚି ମାହାପୂରୁ ଅଣ୍ପୁତି ବ଼ଲୁ ମାଙ୍ଗେତାକି ହା଼ରେକା ଆ଼ଟ୍ୱା ଆ଼ତେ; ମୀରୁ ଏ଼ଦାଆଁ ଆନ୍ଦେରିତା ଡ଼ୀଞ୍ଜାମାନି ଦୀୱଁ ଲେହେଁ ଅଣ୍ପାନା ଲା଼ଆଁ ୱେ଼ୟାଆ ପାତେକା ମୀ ହିୟାଁତା ୱେ଼ୟାଜାରା ହୁକା ହ଼ଆ ପାତେକା ଏ଼ଦାଣି ମ଼ନ ହୀତିହିଁ ନେହେଁ ଆ଼ନେ । ୨୦ ମୀରୁ ବାରେତି କିହାଁ ତଲିଏ ଈଦାଆଁ ପୁଞ୍ଜୁ, ଦାର୍ମୁ ପତିତା ରା଼ସ୍କି ଆ଼ହାମାନି ମାହାପୂରୁ ବ଼ଲୁତି ଜାହାରା ବୁଦିତଲେ ତେଲ୍ହାଲି ଆ଼ଡାଆୟି । ୨୧ ଇଚିହିଁ ଆମିନି ମାହାପୂରୁ ଅଣ୍ପୁତି ବ଼ଲୁ ୱେହ୍ନାରି ୱାର୍ଇ ତା଼ମ୍ବୁ ମାଣ୍ସି ଅଣ୍ପୁଟି ଆମ୍ବାଆସି ଜିକେଏ ୱେ଼କ୍ହା ହିଲଅରି, ସାମା ମାହାପୂରୁ ପାଣ୍ତିତି ମାଣ୍ସିୟାଁ ସୁଦୁଜୀୱୁଟି ସା଼ଲୱି ଆ଼ହାନା ଏ଼ୱାରି ଅଣ୍ପୁତି ବ଼ଲୁ ୱେସାମାଚେରି ।
✡୧:୧୭ ମାତି ୧୭:୧-୫; ମାର୍କ ୯:୨-୭; ଲୂକ ୯:୨୮-୩୫