ଯୋହନଙ୍କ ତୃତୀୟ ପତ୍ର
ଜହନ ରା଼ଚାମାନି ତୀନି ଲମ୍ବର ଆ଼କୁ
ମୂଲୁ ହା଼ଡା
ଜହନତି ତୀନି ଲମ୍ବର ଆ଼କୁ ଜୀସୁ କ୍ରୀସ୍ତ ଜାର୍ନାଆ଼ତି ୫୦ ଟିଏ ୧୦୦ ବାର୍ସା ଡା଼ୟୁ ପାଣ୍ତ୍ୱିଆ଼ହାମାନି ଜହନ ତା଼ଣାଟି ରା଼ସ୍କି ଆ଼ହାମାନେ । ଜହନ ଜାହାରାଇଁ ଆ଼କୁ ରା଼ଚିତାସି ଇଞ୍ଜିଁ ୱେହ୍ଆନା କୁଲମିତି ପ୍ରାଚିନାତେଏଁ ଇଞ୍ଜିଁ ୱେସିମାନେସି ୧:୧; ୨ଜହ ୧:୧ । ଇମ୍ବାଆଁ ପୁଞ୍ଜାଲି ଆ଼ହିମାନେ ଏ଼ୱାସି ଏପିସିୟ ଗା଼ଡ଼ାତା ମାଚିବେ଼ଲାତା ଜହନ ରା଼ଚିତି ନେହିଁ କାବ୍ରୁତଲେ ତୀନିଗଟା ଆ଼କୁ ଜିକେଏ ରା଼ଚାମାଚେସି ଈ ନାମୁ, ଇଚିହିଁ ଜହନତି ତଲିତି ଆ଼କୁ, ରୀ ଲମ୍ବର ଜହନ, ଅ଼ଡ଼େ ତୀନି ଲମ୍ବର ଜହନ । ଜହନ ଗାୟସ ଦ଼ରୁ ଇନି ର଼ ନାମୁଗାଟି ତାୟିକି ଈ ଆ଼କୁ ରା଼ଚାମାନେସି ।
ଏ଼ୱାସି ଗାୟସଇଁ ର଼ ତ଼ଣେଏସି ଇଞ୍ଜାନା ଏ଼ ରା଼ଜିତା ରେ଼ଜିମାନି କ୍ରୀସ୍ତାନା ତାୟିୟାଁଇଁ ଜୀୱୁ ନ଼ହାଲି ହୁକୁମି ହୀହିମାନେସି ।
ପତିତା ମାନାୟି
୧. ଜହନ ଜାହାରାଇଁ ୱେସାକଡିନାୟି । ୧:୧
୨. ଗାୟସଇଁ ସା଼ସା ହୀହାନା ରେ଼ଜିମାନି କ୍ରୀସ୍ତାନା ତାୟିୟାଁଇଁ ଆବାନା ଜୀୱୁ ନ଼ହାଲି ୱେହ୍ନାୟି । ୧:୨-୮
୩. ଡାୟଟ୍ରେପିସ୍ ଅ଼ଡ଼େ ଡିମିଟ୍ରିଅସ୍ କାତା ୱେହ୍ନାୟି । ୧:୯-୧୨
୪. ଆ଼କୁତି ରା଼ପ୍ନାୟି । ୧:୧୩-୧୪
୧
୧ ✡କାମା ୧୯:୨୯; ରମି ୧୬:୨୩; ୧କର ୧:୧୪ନା଼ନୁ, କୁଲମିତି ପ୍ରାଚିନା ଜହନତେଏଁ, ନା଼ନୁ ସାତା ତଲେ ଜୀୱୁ ନ଼ହିଁମାନି ନା଼ ଜୀୱୁତି ଗାୟସଇଁ ଜହରା ପାଣ୍ତାନା ଈ ଆ଼କୁ ରା଼ଚିମାଇଁ ।
୨ ଏ଼ ନା଼ ଜୀୱୁତି ତ଼ଣେ ନୀନୁ ଜୀୱୁତା ଏ଼ନିକିଁ ନେହିଁ ଆ଼ହିଁମାଞ୍ଜି ଏଲେକିହିଁ ନୀନୁ ବାରେ ୱାକିଟି ନୀ ନେହେଁ ଆ଼ପେ ଅ଼ଡ଼େ ନୀ ଆଙ୍ଗା ଜିକେଏ ନେହିଁ ମାଣ୍ମ୍ବେ ଇଞ୍ଜିଁ ନା଼ନୁ ପ୍ରା଼ତାନା କିହିମାଇଁ । ୩ ନୀନୁ ବାରେଦିନା ସାତା ତଲେ ଡ଼ୟିମାଞ୍ଜି, ଏଲେକିହିଁଏ ଏଚରଜା଼ଣା ନାମିତି ତାୟିୟାଁ ୱା଼ହାନା, ନୀନୁ ତୀରିତଲେ ସାତାତା ନୀଡାମାନାଣି ସା଼କି ହିୟାଲିଏ ନା଼ନୁ ହା଼ରେକା ରା଼ହାଁ ଆ଼ତେଏଁ । ୪ ନା଼ ମୀର୍କା ମା଼ସ୍କା ସାତା ଅ଼ଡ଼େ ସାତା ତଲେ ନୀଡାମାନାଣି ୱେଞ୍ଜାନା, ଏଚେକା ରା଼ହାଁ ଆ଼ହିମାଇଁ, ଏ଼ଦାଣିକିହାଁ ଆଗାଡ଼ା ନାଙ୍ଗେ ଅ଼ଡ଼େ ଏ଼ନି ରା଼ହାଁ ହିଲେଏ ।
ଗାୟସ କିତି କାମାତାକି ଜହରା
୫ ଏ଼ ନା଼ ଜୀୱୁତି ତ଼ଣେ ନୀନୁ କ୍ରୀସ୍ତାନା ତାୟିୟାଁ ତାକି ଅ଼ଡ଼େ ଏଟ୍କା ଦେ଼ସାତି କ୍ରୀସ୍ତାନା ତାୟିୟାଁ ତାକି ନାମୁ ଅ଼ଡ଼େ ଟିକାଣା ତଲେ ସେ଼ବା କାମା କିହିମାଞ୍ଜି । ୬ ଏ଼ୱାରି ଇମ୍ବାଆଁ ମା଼ କୁଲମିତା ନୀ ଜୀୱୁ ନ଼ତି କାତା ୱେସିମାନେରି; ନୀନୁ ଏ଼ୱାରାଇଁ ମାହାପୂରୁତି ରା଼ହାଁ ଆ଼ନିଲେହେଁ ତାମି ଜିରୁ ତାକି ଲ଼ଡ଼ାମାନାଣି ହୀହାନା ସା଼ୟେମି କିମୁ । ୭ ଏ଼ନାଆଁତାକି ଇଚିହିଁ ଏ଼ୱାରି ନାମାଆଗାଟାରି ତା଼ଣାଟି ଏ଼ନାଆଁ ରୀହ୍ଆନା କ୍ରୀସ୍ତତି ସେ଼ବା କାମାତାକି ହ଼ଚାମାନେରି । ୮ ଏ଼ଦାଆଁତାକି ମା଼ର ଏ଼ନିକିଁ ଏ଼ୱାରାଇଁ ସା଼ୟେମି କିହାନା ସାତାତି ତ଼ସାଲି ଏ଼ୱାରି ସେ଼ବା କାମାତା ଆଣ୍ତିନାୟି ମା଼ କାମା ।
ଦିୟତ୍ରପା ଅ଼ଡ଼େ ଦିମତ୍ରିୟ
୯ ନା଼ନୁ କୁଲମିତାକି ର଼ ଇଚାଣି ଆ଼କୁ ରା଼ଚିତେଏଁ, ସାମା ଦିୟତ୍ରପା କୁଲମିତି କାଜାସି ଆ଼ହାଲି ଅଣ୍ପାନା, ନା଼ କାତା ୱେଞ୍ଜାହିଲଅସି । ୧୦ ନା଼ନୁ ୱା଼ତିସାରେ ଏ଼ୱାସି କିହାମାନି ବାରେ ଲାଗେଏତି କାମା ୱେହ୍ଇଁ, ଏ଼ୱାସି ଏ଼ନିକିଁ ମା଼ କ଼ପାଟି ଲାଗେଏତି କାତା ୱେସାନା ମାଙ୍ଗେ ନିନ୍ଦାକିହିଁ ମିଚି କାତା ୱେସିମାନେସି, ୱାର୍ଇ ଏଚେକେଏ ଆ଼ଏ, ସାମା କ୍ରୀସ୍ତାନା ତାୟିୟାଁ ୱା଼ତିହିଁ ଅ଼ପିହିଲଅସି କି ଆମ୍ବାଆରାଇଁ ଅ଼ପାଲି ହୀହି ହିଲଅସି, ଅ଼ଡ଼େ ଆମ୍ବାଆରି ଆବିନାରି ଏ଼ୱାରାଇଁ କୁଲମିଟି ହ଼ପ୍ହାଲି ଅଣ୍ପିମାନେସି ।
୧୧ ଏ଼ ନା଼ ଜୀୱୁତି ତ଼ଣେତି, ନୀନୁ ଲାଗେଏ ପ଼ଲେଏତାଣି ଆହ୍ଆନା, ସାମା ନେହିଁ କାମାତି ଆହ୍ମୁ, ଆମ୍ବାଆସି ନେହିଁ କାମା କିନେସି ଏ଼ୱାସି ମାହାପୂରୁ ତା଼ଣାଟି ଜାର୍ନା ଆ଼ହାମାନେସି; ଆମ୍ବାଆସି ଲାଗେଏ ପ଼ଲେଏ କାମା କିନେସି ଏ଼ୱାସି ମାହାପୂରୁଇଁ ପୁଞ୍ଜାହିଲଅସି ।
୧୨ ବାରେଜା଼ଣା ଦିମିତ୍ରିୟଇଁ ନେହାଁସି ଇନେରି, ଏ଼ୱାସି କିହାମାନି ସାତା ନେହିଁ କାମା ଜିକେଏ ଏ଼ଦାଆଁ ତ଼ସିମାନେ, ମା଼ମ୍ବୁ ଜିକେଏ ଏ଼ଦାଆଁ ସା଼କି ହୀହିମାନମି, ଇଞ୍ଜାଁ ମା଼ମ୍ବୁ ୱେହ୍ନି କାତା ସାତା ଇଞ୍ଜିଁ ନୀନୁ ପୁଞ୍ଜାମାଞ୍ଜି ।
ଜହରା ତଲେ ଆ଼କୁ ରା଼ପ୍ନାୟି
୧୩ ନା଼ନୁ ନିଙ୍ଗେ ହା଼ରେକା କାତା ୱେସ୍ତାନାୟିମାନେ ସାମା ଏ଼ଦାଆଁ ଆ଼କୁତା ସୀରା କା଼ଡିତଲେ ରା଼ଚାଲି ଅଣ୍ପି ହିଲଅଁ । ୧୪ ମା଼ର ମୂମ୍ବୁ ମେସ୍ପି ଆ଼ହାନା ଜ଼ଲ୍କି ଆୟାଲି ଆ଼ଡିନାୟି ଇଞ୍ଜିଁ ଆ଼ସା କିହିମାଇଁ ।
୧୫ ମିଙ୍ଗେତାକି ହିତ୍ଡ଼ି ଆୟାପେ, ତ଼ଣେସିଙ୍ଗା ମିଙ୍ଗେତାକି ଜହରା ପାଣ୍ତିମାଞ୍ଜାନେରି, ବାରେଜା଼ଣାତି ଦ଼ରୁ ଆସାନା ଜହରା ୱେହ୍ମୁ ।
✡୧:୧ କାମା ୧୯:୨୯; ରମି ୧୬:୨୩; ୧କର ୧:୧୪