୧ ଜ଼ମିନି ଦିନା ରାୟାଲିଏ ମଗ୍‌ଦଲିନି ମରିୟମ, ଜାକୁବ ତାମି ଇୟା ମରିୟମ, ଇଞ୍ଜାଁ ସାଲମି ଗାନ୍ଦାଗାଟି ନିୟୁଁ କଡିତୁ, ଏ଼ନିକିଁ ଏ଼ୱି ହାଜାନା ଜୀସୁ ଆଙ୍ଗାତା ରୁବାଲି ଆ଼ଡିନୁ । ୨ ଏ଼ୱି ୱା଼ରାତି ମୂଲୁ ଦିନା ଲା଼ଇ ୱେ଼ଡ଼ା ହ଼ନି ବେ଼ଲାତା ମାହ୍‌ଣି ମାଣ୍ତାତା ହାଚୁ । ୩ ଏ଼ୱି ତା଼ମ୍ବୁ ତା଼ମ୍ବୁ ୱେସ୍‌ପି ଆ଼ହିମାଚୁ, “ଆମ୍ବାଆସି ମାଙ୍ଗେତାକି ମାହ୍‌ଣି ମାଣ୍ତା ଦୁୱେରିତି ୱାଲି ଊସିକିହା ହିୟାନେସି ?” ଏ଼ନାଆଁତାକି ଇଚିହିଁ ଏ଼ ୱାଲି ହା଼ରେକା କାଜାୟି ମାଚେ । ୪ ସାମା ଏ଼ୱି ଏମ୍ବାଆଁ ସିନିକିନି ବେ଼ଲାତା, ୱାଲି ଊସିକିୱି ଆ଼ହାମାଚେ । ୫ ଏ଼ୱି ମାହ୍‌ଣି ମାଣ୍ତାତା ହ଼ଡାନା ଦବ୍‌ଲା ହିମ୍ବରି ହୁଚାମାନି ର଼ ଦାଂଗ୍‌ଣେଏଣାଇଁ ଟିଃନିୱାକି କୁଗାମାନାଣି ମେସାନା ହା଼ରେକା କାବାଆ଼ତୁ ।

୬ ଏମ୍ବାଟିଏ ଏ଼ୱାସି ଏ଼ୱାସିକାଣି ଏଲେଇଚେସି, “ଆଜାଆଦୁ; ମୀରୁ ପା଼ସି ମୁଣ୍ତାତା ହା଼ହାମାନି ନା଼ଜରିତ ଜୀସୁଇଁ ପାରିମାଞ୍ଜେରି; ଏ଼ୱାସି ନିଙ୍ଗାମାନେସି, ଏ଼ୱାସି ଇମ୍ବାଆଁ ହିଲଅସି, ସିନିକିଦୁ ଇମ୍ବାଆଁ ଏ଼ୱାଣାଇଁ ଇଟାମାଚେରି । ୭ ✡ମାତି ୨୬:୩୨; ମାର୍କ ୧୪:୨୮ସାମା ମୀରୁ ହାଜାନା ତାମି ସୀସୁୟାଁ ଇଞ୍ଜାଁ ପିତରଇଁ ୱେହ୍‌ଦୁ, ଏ଼ୱାସି ମୀ ନ଼କି ନ଼କିତା ଗାଲିଲିତା ହାଜିମାନେସି; ଏ଼ୱାସି ମିଙ୍ଗେ ଏ଼ନିକିଁ ୱେସାମାଞ୍ଜାତେସି, ଏଲେକିହିଁଏ ମୀରୁ ଏ଼ୱାଣାଇଁ ଏମ୍ବାଆଁ ମେହ୍‌ଦେରି ।”

୮ ଏମ୍ବାଟିଏ ଏ଼ୱି ମାହ୍‌ଣି ମାଣ୍ତାଟି ହଟୁ, ଇଚିହିଁ ଏ଼ୱି କାବା ଆ଼ହାନା ଆଜିତାକି ତୀର୍‌ଗିମାଚୁ, ଇଞ୍ଜାଁ ଆମ୍ବାଆରାଇଁ ଏ଼ନାଆଁ ୱେହ୍‌ଆତୁ*ଏ଼ୱି ପିତର ତଲେ ମାଚି ବାରେ ଲ଼କୁତା଼ଣା ଏ଼ କାତା ୱେସ୍ତୁ । ୧୬:୨୦ ଈଦାଆଁ ଡା଼ୟୁ, ଜୀସୁ ତା଼ନୁଏ ଜିକେଏ ଏ଼ୱାସିକା ତଲେ ସୁଦୁ ଅ଼ଡ଼େ କା଼ଲାକା଼ଲାତି ଗେଲ୍‌ପି ଆ଼ନାଣି ୱେ଼କ୍‌ହାଲି ତାକି ୱେ଼ଡ଼ା ହ଼ପୁ ୱାକିଟି ୱେ଼ଡ଼ା ହାନି ୱାକି ପାଣ୍ତିତେସି । ।

୯ ୱା଼ରାତି ମୂଲୁତି ଦିନା ଲାଇସିଏ ଏ଼ୱାସି ୱେଣ୍ତେ ନିଙ୍ଗାନା, ଆମିନିଗାଟାଣି ସା଼ତାଗଟା ବୂତୁୟାଁ ପିସ୍‌ପି କିହାମାଚେସି, ଏ଼ ମଗ୍‌ଦଲିନି ମରିୟମନି ତଲିଏ ତ଼ଞ୍ଜାଆ଼ତେସି । ୧୦ ଏ଼ଦି ହାଜାନା ଆମିନି ଗାଟାରି ତାମିତଲେ ମାଚେରି, ଏ଼ୱାରାଇଁ ୱେସ୍ତେ; ଇଚିହିଁ ଏ଼ୱାରି ଦୁକୁଟି ଡ଼ୀହି ମାଚେରି । ୧୧ ଜୀସୁ ନୀଡାମାନେସି, ଇଞ୍ଜାଁ ଏ଼ଦାନି ତ଼ଞ୍ଜା ଆ଼ହାମାନେସି, ଈଦାଆଁ ୱେଞ୍ଜାନା ଏ଼ୱାରି ନାମାଆତେରି ।

୧୨ ଏଚେଟିଏ ଈ ବାରେ ଆ଼ତି ଡା଼ୟୁ ଏ଼ୱାରି ବିତ୍ରାଟି ରୀ ସୀସୁୟାଁ ର଼ ନା଼ୟୁଁତା ହାଜିମାଚାଟି ଏ଼ୱାସି ଅ଼ର ୱା଼ଣା ତଲେ ଏ଼ୱାରାଇଁ ତ଼ଞ୍ଜାଆ଼ତେସି, ୧୩ ଇଞ୍ଜାଁ ଏ଼ୱାରି ହାଜାନା ଏଟ୍‌କା ତାରାଇଁ ୱେସ୍ତେରି; ସାମା ଏ଼ୱାରି କାତା ଜିକେଏ ଏ଼ୱାରି ନାମାଆତେରି ।

୧୪ ଏମ୍ବାଟିଏ ଏଗାର ଜା଼ଣା ସୀସୁୟାଁ ତିଞ୍ଜାଲି କୁଗାମାଚାଟି ଜୀସୁ ଏ଼ୱାରାଇଁ ତ଼ଞ୍ଜାଆ଼ତେସି ଇଞ୍ଜାଁ ଏ଼ୱାରି ନାମିହିଲାଆତାକି ଇଞ୍ଜାଁ ହିୟାଁତି ଆ଼ଟ୍‌ୱାତାକି ଏ଼ୱାରାଇଁ ଦାକା ହୀତେସି, ଇଚିହିଁ ଆମିନି ଗାଟାରି ଏ଼ୱାଣି ୱେଣ୍ତେ ନିଙ୍ଗିତାଣି ମେସାମାଚେରି, ଏ଼ୱାରି କାତା ଏ଼ୱାରି ନାମା ହିଲାଆତେରି । ୧୫ ଇଞ୍ଜାଁ ଜୀସୁ ଏ଼ୱାରାଇଁ ଏଲେଇଚେସି, “ମୀରୁ ବାରେ ଦାର୍‌ତିତା ହାଜାନା ବାରେ କୂଡ଼ାତି ଲ଼କୁତା଼ଣା ନେହିଁ କାବ୍ରୁ ୱେହ୍‌ଦୁ । ୧୬ ଆମ୍ବାଆସି ନାମାନା ବାପ୍ତିସ୍ମ†ମୁଞ୍ଜିନାୟି ଅ଼ନେସି ଏ଼ୱାସି ଗେଲ୍‌ପି ଆ଼ନେସି; ସାମା ଆମ୍ବାଆସି ନାମଅସି ଏ଼ୱାସି ଡଣ୍ତ ବେଟାଆ଼ନେସି । ୧୭ ଇଞ୍ଜାଁ ନାମିନାରାକି ଈ ସିନାୟାଁ ଆ଼ନୁ, ଏ଼ୱାରି ନା଼ ଦ଼ରୁତଲେ ବୂତୁୟାଁ ପିସ୍‌ପି କିନେରି, ପୁଃନି ପୁଃନି ହା଼ଡାତଲେ ଜ଼ଲିନେରି, ୧୮ କେସ୍କାତଲେ ରା଼ସ୍‌କା ଆହ୍‌ନେରି, ଇଞ୍ଜାଁ ହା଼ନି ଅସ ଗସ୍ତିହିଁ ଜିକେଏ ଏ଼ୱାରି ଏ଼ନାଆଁ ଆ଼ଅରି; ଏ଼ୱାରି ନ଼ମେରି ଦୁକା ଗାଟାରି ଲାକ କେୟୁ ଇଟିତିହିଁ ଏ଼ୱାରି ନେହିଁ ଆ଼ନେରି ।”

୧୯ ✡କାମା ୧:୯-୧୧ଇଲେକିହିଁ ଏ଼ୱାରାଇଁ ବାରେ କାତା ୱେସ୍ତି ଡା଼ୟୁ ଜୀସୁ ଲାକପୂରୁ ଅ଼ୱିଆ଼ହାନା ମାହାପୂରୁତି ଟିଃନିୱାକି କୁଗିତେସି । ୨୦ ସାମା ଏ଼ୱାରି ହାଜାନା ବାରେୱାକି କାବ୍ରୁ ୱେସ୍ତେରି, ଇଞ୍ଜାଁ ପ୍ରବୁ ଜୀସୁ ଏ଼ୱାରିତଲେ କାମା କିହାନା ତାନି ବାରେ ସିନାୟାଁ ତଲେ ଏ଼ୱାରି ୱେ଼କ୍‌ହାମାନାଣି ସାତା ଇଞ୍ଜିଁ ତ଼ସ୍ତେସି ।