ତୀତସଙ୍କ ନିକଟକୁ ପାଉଲଙ୍କ ପତ୍ର
ତିତସ ତା଼ଣା ପା଼ୱୁଲ ରା଼ଚାମାନି ଆ଼କୁ
ମୂଲୁ ହା଼ଡା
ପା଼ୱୁଲତି ସା଼ରିଗଟା ଆ଼କୁ ବିତ୍ରା ତିତସ ଆ଼କୁ କୁଲମି ପିସ୍ପେ ର଼ ମାଣ୍ସିତି ୱେସିମାନେ, ଏଟ୍କାତି ତୀନିଗଟା ଆ଼ହିମାନୁ, ତିମତି ମୂଲୁ ଆ଼କୁ, ତିମତି ରୀ ଲମ୍ବର ଆ଼କୁ ଅ଼ଡ଼େ ପିଲିମନ । ଈ ଆ଼କୁ କ୍ରୀସ୍ତ ଜାର୍ନାଆ଼ତି ୬୩ ଟିଏ ୬୫ ବିତ୍ରା ରା଼ସ୍କି ଆ଼ହାମାନେ ।
ତିତସ ଏଟ୍କା କୂଡ଼ାତାସି ଆ଼ହାନା କ୍ରୀସ୍ତାନା ଆ଼ହାମାଚି ର଼ ଦାଂଗ୍ଣେଏସି ମାଚେସି, ଏ଼ୱାସି ମାହାପୂରୁ କାତା ୱେହ୍ନି ପା଼ୱୁଲ ତଲେତାସି । କ୍ରିତିତା ମାନି ମାହାପୂରୁ କୁଲମି ସା଼ଲୱି କିହାଲି ପା଼ୱୁଲ ଏ଼ୱାଣାଇଁ ଏମ୍ବାଆଁ ପିସାନା ଈ ଆ଼କୁ ପାଣ୍ତାନା ତୀନିଗଟା ନେହିଁକିଁ ଅଣ୍ପାଲି ରା଼ଚିମାନେସି । ର଼ କାତା ଈଦି କ୍ରିତିତା ମାନାରି ବିତ୍ରାଟି ହା଼ରେକା ଲ଼କୁ ଲାଗେଏ ପ଼ଲେଏ ଅଣ୍ପୁ ଗାଟାରି ମାଚାକି ଏ଼ନିଲେହେଁତି ଅଣ୍ପୁ ଗାଟାରାଇଁ କୁଲମିତି କାଜାରି କିହାନା ଇଟିନାୟି ମାନେ । ଅ଼ର କାତା ଈଦି ବୁଡ଼୍ହାୟାଁଇଁ, ବୁଡ଼୍ହିସିକାଣି, ଡ଼ାଆସିକାଣି, ଦାଂଗ୍ଣାୟାଁଣି, ହ଼ଲିୟାଙ୍ଗାଣି ଏ଼ନିକିଁ ଗଚି ଗଚି କିହାନା ଜା଼ପ୍ହାଲି ଆ଼ନେ । ଡା଼ୟୁତି କାତା ଈଦି କ୍ରୀସ୍ତାନା ଆ଼ହାମାନାରି ଏ଼ନିକିଁ ନୀଡିନାୟି ମାନେ । ଏ଼ୱାରି ଜୀୱୁ ନ଼ନାରି ଅ଼ଡ଼େ ସୁଦୁଗାଟାରି ଆ଼ପେରି, ଲାଗେଏତି କାତାୟାଁ ପିସ୍ପେରି, ଗଡ଼୍ହା କିୱି କିହାନା କୁଲମିତି ଗଚି ଗଚି କିଆପେରି ।
ପତିତା ମାନାୟି
୧. କୁଲମିତା ଦାର୍ମୁଗାଟାରାଇଁ ଆ଼ଚାଲି ୱେହ୍ନାୟି । ୧:୧-୧୬
୨. ଦାର୍ମୁ ଜୀୱୁତଲେ ନୀଡାଲି ଅ଼ଡ଼େ ଜା଼ପ୍ହାଲି ୱେହ୍ନାୟି । ୨:୧–୩:୧୧
୩. ଡା଼ୟୁତି କାତା ଅ଼ଡ଼େ ଜହରା ତଲେ ଆ଼କୁତି ରା଼ପ୍ନାୟି । ୩:୧୨-୧୫
୧
୧ ପା଼ୱୁଲ, ମାହାପୂରୁତି ହ଼ଲେଏଣାତେଏଁ ଇଞ୍ଜାଁ ଜୀସୁ କ୍ରୀସ୍ତ ତା଼ଣାଟି ପାଣ୍ତ୍ୱି ଆ଼଼ହାମାନାତେଏଁ ।
ମାହାପୂରୁ ଆ଼ଚାମାନି ଲ଼କୁତି ନାମୁ ପାଡିକିହାଲି ଅ଼ଡ଼େ କା଼ଲାକା଼ଲାତି ଜୀୱୁ ମେ଼ଡ଼ାଆ଼ନି ଆ଼ସାତି ଦାର୍ମୁତି ନାମୁତା ସାତାତି ଜାଗ୍ରାତା କିହାଲିତାକି ନା଼ନୁ ପାଣ୍ତ୍ୱି ଆ଼ହାମାଇଁ । ୨ କା଼ଲାକା଼ଲାତି ଜୀୱୁତି ଆ଼ସା ହୀହାଲିତାକି, ଏମିନି ମାହାପୂରୁ ଆ଼ଞ୍ଜାମାଚେସି, ଏ଼ୱାସି ଏଚେଲା ମିଚି ଜ଼ଲାଆଗାଟାସି । ୩ ଏ଼ କା଼ଲାକା଼ଲାତି ଜୀୱୁ ସାତା ମାହାପୂରୁ, ହା଼ରେକା କା଼ଲା ନ଼କେଏ ଆ଼ଞ୍ଜାନା ସମାନା ବେ଼ଲାତା ତାନି ବ଼ଲୁ ୱେ଼କ୍ନି ତା଼ଣାଟି ତ଼ସାମାନେସି; ଏ଼ ବ଼ଲୁ ୱେ଼କ୍ନି ବ଼ଜୁ ମା଼ ଗେଲ୍ପାନି ମାହାପୂରୁ ହୁକୁମି ତଲେ ନା଼ ତା଼ଣା ହେର୍ପି ଆ଼ହାମାଞ୍ଜାନେ ।
୪ ✡୨କର ୮:୨୩; ଗାଲା ୨:୩; ୨ତିମ ୪:୧୦ନା଼ ସମାନା ନାମିତାସି ଅ଼ଡ଼େ ନାମୁତା ନା଼ ଜୀୱୁତି ମୀର୍ଏସି ତିତସ ତା଼ଣା ଈ ଆ଼କୁ ରା଼ଚିମାଇଁ ।
ଆ଼ବା ମାହାପୂରୁ ଅ଼ଡ଼େ ମାଙ୍ଗେ ଗେଲ୍ପାନି କ୍ରୀସ୍ତ ଜୀସୁ ମିଙ୍ଗେ କାର୍ମା ଅ଼ଡ଼େ ହିତ୍ଡ଼ି ହିୟାପେସି ।
କ୍ରିତିତା ତିତସ କାମା କିନାୟି
୫ ନା଼ନୁ ୱେସ୍ତାତିଲେହେଁ ରା଼ଆତି କାମାତି ରା଼ପ୍ହାଲି ତାକି, ଅ଼ଡ଼େ ବାରେ ଗା଼ଡ଼ାତା ପ୍ରାଚିନାଙ୍ଗାଣି କାମା ହେର୍ପାଲି ତାକି ନା଼ନୁ କ୍ରିତିତା ନିଙ୍ଗେ ପିସା ୱାୟାତେଏଁ; ୬ ✡୧ତିମ ୩:୨-୭ଆମ୍ବାଆସି ଦ଼ହ ହିଲାଆଗାଟାସି, ରଣ୍ତିଏ ଡକ୍ରିନି*ରଣ୍ତିଏ ବୀହା ଡକ୍ରି ଡକ୍ରା, ଆମ୍ବାଆରି ମୀର୍କା ମା଼ସ୍କା ନାମିତାରି, ଅ଼ଡ଼େ ଲାଗେଏ ପ଼ଲେଏତି କାମା କିଅରିକି ମା଼ନୱି ଆ଼ଆଗାଟି କାମା କିଅରି ଏ଼ୱାରାଇଁ ଆ଼ଚାହାଁ ପ୍ରାଚିନା କିମୁ । ୭ ଇଚିହିଁ କାଜାସି, ମାହାପୂରୁତି ଗୁମୁସ୍ତା ଆ଼ହାଁ ଦ଼ହ ହିଲାଆଗାଟାସି ଆ଼ନାୟି ମାନେ; ଏ଼ୱାସି ଜାହାରା ମ଼ନତଲେ କିନାସି କି ଦେବୁଣିଏ କାର୍ବି ଆ଼ନାସି କି କା଼ଡ଼ୁ ଗହ୍ନାସି କି ଗଡ଼୍ହା କିନାସି କି ଦ଼ନ ଜୂପ୍କା ଗାଟାସି ଆ଼ଆନା, ୮ ଏ଼ୱାସି ଗତାୟାଁଣି ଆକ୍ରା କିନାସି, ଏ଼ନାୟି ନେହାୟି ଏ଼ଦାଆଁ ଜୀୱୁ ନ଼ନାସି, ଜାହାରାଇଁ ଲକ୍ନାସି, ଦାର୍ମୁଗାଟାସି, ସୁଦୁଗାଟାସି, ଇଞ୍ଜାଁ ମେ଼ରା ମା଼ନୱି ଆ଼ନାସି ଆ଼ପେସି । ୯ ଅ଼ଡ଼େ ଏ଼ନିକିଁ ଏ଼ୱାସି ଲ଼କୁତାକି ନେହାଁଣି ଜା଼ପ୍ହାନା ରା଼ହାଁ ହୀହାଲି ଇଞ୍ଜାଁ ମାହାପୂରୁ କାତା କ଼ପାଟି ୱେହ୍ନାରାଇଁ ଲା଼ଗାଲି ଆ଼ଡିନେସି, ଈଦାଆଁତାକି ଜା଼ପାମାନି ନାମିନି ବ଼ଲୁ ଜାଣ୍ଡେ ଆସାଁ ମାଞ୍ଜୁ ।
୧୦ ଇଚିହିଁ ହା଼ରେକା ନାମାଆଗାଟି ଲ଼କୁ, ଉଜେଏତି କାତାତଲେ ନା଼ଡ଼ିକିନାରି ମାନେରି, ହା଼ରେକା ଜୀହୁଦି କ୍ରୀସ୍ତାନା ଲ଼କୁ ବିତ୍ରାଟି ମାନେରି । ୧୧ ଲାଗେଏତି କାତାଟି ଏ଼ୱାରି ଗୂତି ମୁଦା କିନାୟିମାନେ, ଏ଼ନାଆଁତାକି ଇଚିହିଁ ଏ଼ୱାରି ଦ଼ନ ଜୂପ୍କାତାକି ଲାଗେଏତି କାତା ଜା଼ପ୍ହିହିଁ ର଼ ର଼ ଇଲୁ କୁଟମିତି ମାହାପୂରୁ ଜିରୁ ବା଼ଣି କିନେରି । ୧୨ ଏ଼ୱାରି ବିତ୍ରାଟି ରଅସି ଏ଼ୱାରି ମାହାପୂରୁ ଅଣ୍ପୁତି ବ଼ଲୁ ୱେହ୍ନାସି ଏଲେ ଇଞ୍ଜାମାନେସି, କ୍ରିତିତା ବାସା ଆ଼ହାମାନାରି ବାରେବେ଼ଲା ମିଚି ୱେହ୍ନାରି, ଜ଼ନ୍ତ ସମାନା ଅ଼ଡ଼େ ନିସ୍ତା ଇଞ୍ଜାଁ ଟିଣ୍ତିକାୱୁୟାଁ । ୧୩ ଈ କାତା ସାତା । ଏ଼ଦାଆଁତାକି ଏ଼ୱାରାଇଁ ଗାଡି ଦାକା ହୀହାଁ ଲା଼ଗାମୁ, ଏ଼ନିକିଁ ଏ଼ୱାରି ନାମୁତା ପାଡା ଆ଼ନେରି । ୧୪ ସାତାତି ପିସାମାନି ଲ଼କୁତି ମେ଼ରା, ଜୀହୁଦି ଲ଼କୁତି କ଼ହୁୟାଁ, ମ଼ନ ହୀଅରି ଏ଼ଦାଆଁତାକି ଏ଼ୱାରାଇଁ ଜା଼ପ୍ମୁ । ୧୫ ଅଟ୍ହି ଆ଼ତି ଲ଼କୁତାକି ବାରେଏ ଅଡିନେ, ସାମା ପ଼ଲ୍ଆ ଗାଟାରାକି, ମାହାପୂରୁଇଁ ନାମାଆ ଗାଟାରାକି ଏ଼ନାୟି ଜିକେଏ ଅଡେଏ, ଇଚିହିଁ ଏ଼ୱାରି ମ଼ନ ଅ଼ଡ଼େ ଅଣ୍ପୁ ବାରେ ପ଼ଲ୍ଆଗାଟାୟି । ୧୬ ଏ଼ୱାରି ମାହାପୂରୁଇଁ ପୁଞ୍ଜାମାନମି ଇଞ୍ଜିଁ ଜ଼ଲିନେରି, ସାମା ଏ଼ୱାରି କାମା ତଲେ ମାହାପୂରୁଇଁ ପୁନାଆତି ଲେହେଁ ଆ଼ନେରି, ଏ଼ୱାରି ଅ଼ପାଆଗାଟାରି, ଅ଼ଡ଼େ କାତା ଆହ୍ଆଗାଟାରି ବାରେ ନେହିଁ କାମାତା ପା଼ଡ଼ାଆ଼ଅରି ।