Egei Sasafe̱i̱
Jonha̱
Nala̱ma Ne̱i̱
Tawale Ta̱
Yesuha̱ dabai degedi o olo͡u fe̱i̱be 12 kege. O tano͡u ta e̱ hu̱be Jon. Kuguo ko͟͡ume e̱ nala̱i̱.
Damale̱do, Jon e̱ odo degemo͡u, kuguo ko͟͡u nala̱ma, damale̱yodei o sasa̱i̱ kedia̱moko͡u ne̱i̱.
Ta̱ ko͟͡umaha̱ sibige̱ tabe ko͡u gue, Godiha̱ dimoko͡u solo͡u do degei kaha̱ degemo͡u, dige diyo͡u sie yogo tagaiba tagaiba deme.
Sibige̱ tabe ko͡u gue, ni̱me ogo͡u gai egei ke̱ duye deba tawaibo͡u. Ogo͡u gai egei tobo͡u di o kedia̱ge Godiha̱ Dihi e̱ hagueibe, o baga hagueli meiyode tobolo͡u idi. Kegeligi, di ogo͡u gai ta̱ kegei koko͡u damale̱yodele iye.
Godiha̱ ta̱ kuguo olo͡u fe̱i̱ Jonha̱ nala̱gaibe kuhe̱:
Ta̱ Uwo Bolofe̱i̱ Jonha̱ Nala̱i̱
Egei Sasafe̱i̱ Jonha̱ Nala̱ma Ne̱i̱
Egei Sasama Jonha̱ Nala̱ma Ne̱i̱
Egei Koma̱ Jonha̱ Nala̱ma Ne̱i̱
Mogogou Ta̱ Yesu Kelesuha̱ Jonko͡u Hegi
Kuguo 1 Jon ko͟͡umaha̱ ta̱ sibige̱ tano͡u tano͡u olo͡u fe̱i̱be kuhe̱:
Ta̱ Hiye 1:1–3:10
Di hoho̱ya ke̱no͡u suluguame, kegeligi hulia̱ya suluguadi o kedia̱ di ogo͡u gaiye.
Ta̱ Hiye 3:11–5:21
Dige diyo͡u sie yogo tagaiba tagaiba deme.
Di hoho̱ya ke̱no͡u suluguame, kegeligi hulia̱ya suluguadi o kedia̱ di ogo͡u gaiye
1
(Ta̱ Hiye 1:1–3:10)
Fi̱ gehe̱ tofousogo tofolo͡u Ta̱*1:0 Ta̱ ke̱me Yesu Kelesu yo͟͡uno͡u. Na̱ Jon 1:1-5 dugu. ke̱ tama̱ degei
1 A̱ ni̱moko͡u nalolu̱ ko͟͡ume fi gehe̱ tofousogo tofolo͡u Ta̱, afudo yo͟͡u kegeno͡u delei, ifine dala kuhe̱. Ta̱ ke̱me ei dulomo͡u, eiyo͡u ei diho̱ye dugu. Ei Ta̱ koko͡u duguomo͡u, ei dobogo͟͡uye kugulo i. 2 Damale̱do, fi̱ gehe̱ ke̱me tama̱ degeimo͡u ei dugulo i. Ei duguomo͡u, ni̱moko͡u tama̱ dege hehegie tobolo͡u idi ke̱me yo͟͡u tofousogo kegeno͡u dalale. Afudo e̱me yo͟͡u e̱ Aye Godibo͡u de dalali, habage tama̱ degeimo͡u, ei dugulo i. 3 Ei ko͡u duguomo͡u, dulo i ke̱no͡u ei ni̱moko͡u kuhe hehegie tobolo͡u idi, ni̱ne eibo͡u de fi̱ tano͡u degemabadomo͡u. A̱ge dibe Aye Godibo͡u, e̱ Dihi Yesu Kelesubo͡u de fi̱ tano͡u dege dalamebadomo͡u kuhe tobolo͡u. 4 Ei ta̱ ko͟͡u nalolu̱ kaha̱ yobe, di duledube hoho̱ hiyedo degeno͡u dalamebadomo͡u kuhe nalolu̱.
Di hoho̱ya ke̱no͡u suluguame
5 Ta̱ Yesu Kelesuha̱ eimoko͡u tobo͡u mo͡u dulo i ke̱me ei ni̱moko͡u tobolo͡u kuhe̱. Godibe hoho̱ hiyedo, e̱moko͡u be hulia̱ degei ta dala meido. 6 Dige dibe Godibo͡u de fi̱ tano͡u dege dalayode tobo͡u maba, haba hulia̱ya ke̱ kegeno͡u suluguababe, ta̱ di ke̱ toboube gulokoudo, dibe Godiha̱ ta̱ damale̱do ke̱me ta seseiyo mei. 7 Ke̱no͡u si di hoho̱, Yesu yo͟͡u dala saga̱i̱ya ke̱no͡u suluguababe, di olo͡u fe̱i̱be fi̱ tano͡u dege dalaguaba, Godiha̱ Dihi Yesuha̱ e̱ kafei kaha̱no͡u di midiho̱ kasaga̱i̱ milo͡u di kaha̱ hebe ke̱ to̱gule muguba, dibe sibigi ta dalale mei.
8 Dibe midiho̱ kasaga̱i̱ degediyo meiyode tobo͡u babe, ke̱me diyo͡u sieno͡u ogo͡u golu. Ta̱ damale̱do ta̱ ke̱me di duledube ta dala meido. 9 Dige di midiho̱ kasaga̱i̱ milo͡u gadi ke̱ kusigile tobo͡u basi, Godiha̱ gebe meiyodele. E̱ degeiyeno͡u si, dibe sibigi ta dalale mei, do̱u̱do o sasa̱i̱ degele. Yobe, Godi e̱me do̱u̱do milo͡u di o. E̱ degeleyodeibe damale̱do degedi kaha̱ degemo͡u. 10 Godiha̱ge o dibe midiho̱ kasaga̱i̱ milo͡u di oyode ko͡u tobou kaha̱ degemo͡u, haba di dibe midiho̱ kasaga̱i̱ ta milo͡u diyo meiyodeibabe, ta̱ kaha̱ge Godibe ogo͡u gadi oyodili. Di kege tobolo͡u kaha̱ sibige̱be di duledube Godiha̱ ta̱be ta dala mei.